¹ Kwatonimusemba, vabahu, he mbazi ku-u Kiumbi, iguni misa kaghu ikwa dhabihu irazoko, nyakhare, idumuikana he Kiumbi. Yawo ni-u kuaresi kaghu kulo kitende. ² Naho msidosirije mitotire ya idi yalo, mira mghiritiwe he kuboiwe usha fanyanyi kaghu. Bo-ini to m-muru kuile midumuire y Kiumbi ereyo makulho, yemlhamuija naho ukamirifu. ³ Kwaite naba, he mburi ya neema yo nioiwe, ite kira mhe eata he kune tedumuwe kukufanyanyisha ana ku-u salaghu kutaho chimdumu kufanyanya. Mira chimdumu kufanyanya he viugho, sa hucho Kiumbi emuoye kira muwe kiasi fulani cha mdarisho. ⁴ Kwaite tulo viungo vikumure he msa muwe, mira si vungo vikabuna vilo nyamalo we. ⁵ Warecho, nne tuva kumure bi msa ni muwe he Kristo, naho viungo kira kiwe he m-aro. ⁶ Tulo Karama jikwaye uda uda he kadiri ya neema muoiwe. Chikukwa karama ya mhe ni ulotezi, na ibo-ike he kuagha na mdarisho ku-u. ⁷ Chikukwa karama ya mhe ni huduma, na atumike. Chikukwa mhali elo karama ya kuhinisha, iji, ahinishe. ⁸ Chikukwa karama ya mhe ni faraja, iji, afariji. Chikukwa karama ya mhe ni kugu, abo-i to he udumuisho. Chikukwa karama ya mhe ni kukaeti, naho libo-ike he kuwesiisha. Chikukwa karama ya mhe ni he ku-aija mbazi, na chibo-ike he kinyemi. ⁹ Udumuisho usikwa na unafiki. Lhini ukusa; Mdaraishe yemakulho. ¹⁰ He udumuisho wa bahu, dumuiyanani kune kwa kune. he heshima, muheshimiane kune kwa kune. ¹¹ He mburi ya bidii, msikwa valegevu. He mburi ja swaho, mukwa na kise. He Dilao, mnyamrikieni. ¹² Lhamuiwani he ujasiri mulo nawo he ma-aze yelitiye. Mukwa na ugumiriji he vwasi kaghu. Muzokoishe he kuaresi. ¹³ Mlha-ariane he vidumuwe ni vazadarisha. Daani kwalhi kumure ja kuaija udumuisho. ¹⁴ Vaduiyeni baraka vakabuna vemunyamarisha kune; muvabariki naho neri musivabusu. ¹⁵ Lhamuiwani hawe navo velhamuiwa, zoni hawe nahu vezo. ¹⁶ Mukwa na fanyanyi we kune kwa kune. Msifanyanye kwa kukukomba, mira vadumuijeni vahe va hali ya di. Msikwa na viugho ana ya fanyanyi kaghu salaghe. ¹⁷ Musimlhanu mhe wowose ukusa kwa ukusa. Bo-ini mburi kulho he ma-ila ya vahe vakabuna. ¹⁸ Kai chinemuruika, sahucho chikeiwe hakaghu, mukwa na m'polele na vahe vakabuna. ¹⁹ Vadumuwa, msikughitiye nkuru salaghe, mira hakanyeni malhaha ya Kiumbi. Kwaite hegondiwe, "Nkuru ni gho; Ani ninelhanu,' eyo Dilao." ²⁰ Mira chikukwa mnkuru kechi elo kela, mpasi. Ekukwa na kasu, muwahari. Kwaite ukubo-ito, unemharia makale ya mwalha ana he m-a ku-u." ²¹ Usitahowe ni ukusa, mira utaho ukusa he ukulho.