¹ Wesi-ishisha usiboi vigi vikulho he vahe ili kukuaija, kwa kuboito tukapate thawabu kuli he Aba eata mbinguni. ² Kwato iji ukugu usima tarumbeta na kukutogola mwenye sa vanafiki cho vebo-i he masinagogi na he mitaa, nesa ite vahe vavatogole. Kweri nimubaya vaaheja kudoria thawabu kini. ³ Mira ari ukugu, mheregha ke wa kumoso usi-ile chibo-iwe ni mheregha wa kuume, ⁴ Nesa kuba zawadi ke zawadike iguwe kwa siri. Niho Aba -mke eaho sirini eneku-o thawabu ke. ⁵ Na ukukwa utasa, usikwa sa vanafiki, kwa ite vedumu ku-uma na kutasa he masinagogi na he kona ja mitaani ili kuba vahe vavawesie. Kweri nimubaya vaaheja kudoria thawabu kini. ⁶ Mira ari, ukutasa, buu chumbani. Lhati luhige, na utase hakwe Aba mkaghu eata sirini. Niho Aba mke eaho sirini eneku-o thawabuke. ⁷ Na ukukwa utasa, usikirie-kirie mburi jisilo maana sa mataifa cho vebo-i, kwa ite vefanyanya ite venesikijwa kwa ite velo mburi kumure jo veyo. ⁸ Kwato, usikwa sa vo, kwaite Aba mke, ereile cho udumu hata usinaso kwa ombeja haku-u. ⁹ kwato tasa to: Aba mkanu uata mbinguni, ulitogole ilhe ke. ¹⁰ Udilao ke ulita, hucho udumuisha chibo-ike i-i duniani sa are mbinguni. ¹¹ Utu-o wa-i mkate kanu wa kila i-aze, ¹² utuhereje madeni kanu, sa nne cho tuvahereja vadeni kanu. ¹³ Na usitugera he maghesho, mira utuhakanyishe kuli hehu mkusa. ¹⁴ Kai mnevahereja vahe makusa kini, Aba mke eata mbinguni na-u enevahereja kune. ¹⁵ Mira kai temkavahereje makusa kini, neri Aba mkaghu tekamuhereje makusa kaghu. ¹⁶ Kutaho vikabuna, ukunekwa ulhatie, usiaije vubasa vya vuhuye sa vanafiki cho vebo-i,n kwa ite vekoma vubasa kini ili ite vahe vava-ile ite velhatie. Kweri nikubaya, vaaheja kudoria thawabu kini. ¹⁷ Mira ari ukukwa ulhatie, lhomi malhoma he m-a ke na u-onti vubasa ke. ¹⁸ Kwato techikakuaije ha vahe ite ulhatie, mira bi inekwa he Aba ke eata hekufisie. Ne Aba mke e-aho hekufisie, eneku-o thawabu ke. ¹⁹ Usikukee hazina ke mwenye i-i duniani, kwaite nondo na nkutu ji-oni, na vagwalovepu na kugwa. ²⁰ Badala ke jitunzie hazinake mwenye mbinguni, kwaite nondo neri nkutu tejimuru ku-oni, neri vagwalo tevemuru kupu na kugwa. ²¹ Kwaite hazina ke ho iata, niho na shwaho ke inekwa iata naho. ²² I-ila ni kijari cha msa. kwato, kai i-ila ke ni izime, msa mkabuna uneangajwa ni nuru. ²³ mira kai i-ila ke ni ibovu, msa ke mkabuna uhue kidughu kigirusha. Kwato, kai nuru iata za hake ni kidughu kweri, ni kidughu kigirusha kimomo? ²⁴ Tehelo neri muwe enemuru kuvatumikia madilao vanu,kwaite enemsanuiwa muwe na kumdumuisha mhali, kana sicho enekuguisha he muwe na kumnyagaha mhali. Temkamuru kumtumikia Kiumbi na Uzuri. ²⁵ Kwato nikubaya,usikwa na futofuto he kuhema ke, ite une-a ahoni kana unewaha ahoni, kana ite msake, uneoro ahoni. He kuhema si zaidi ya vi-aghu nazaidi ya mioroire.? ²⁶ Wesia madeghe eata ana. Tevelha neri te-e-luka na te-ekusanya na kuke hemaghala, Mira Aba kaghu wa mbinguni evapasi vo. He kune siva samani sha kutaho vo? ²⁷ Ivi niji hakaghu kune kwa kukunyamarisha emuru kukuongeja dhiraa we he uzime wa kuhema ku-u? Na iji kwa ahoni mlo futofuto he mioroire? ²⁸ Fanyanya he malua he mbuva, cho yekwae. teebo-i nyamalo na teemuru kuku oroija. ²⁹ Bado nimubaiya, hata Sulemani he utukufu ku-u teoroijwe sa neri iwe laya. ³⁰ Kai Kiumbi e-oroja mahako he mbuva, ambayo yedumu I-aze iwe na lhenu yebibiwe he mwalha, he kwa kiasi mina enemuoroija kune, kune mlo imani gitutu? ³¹ Kwato msikwa na futofuto nakuba, 'He tunea ahoni?' kana "He tunewaha ahoni?" kana "He tune-oro gomae mina?" ³² Kwa ite mataifa vedaa mburi ya, na Aba kaghu wa mbinguni ereile ite mdumue kayo. ³³ Mira kabosi da-ani Udilao ku-u na haki ku-u na ya makabuna uneyaowe. ³⁴ Kwato, usiaho futo kwa ajili ya lhenu, kwaite lhenu inekunyamarikia njenye. Kila I-aze litosha kukwa na mburi ku-u njenye.