¹ Usipa-aye, na ari usee pa-aiwa. ² Kwa mipa-aire yo upa-a, na ari unepa-aiwa. Na kipimo cho unepima na ari unepimijiwa kacho kacho. ³ Na kwa ahoni uwesia kabasi ka mhatu keata he i-ila la m-bahu ke, mira tuilie kihindi cha igogo ambalo liata he i-ila ke? ⁴ Umurumo kuyo he m-bahu ke, ro nikuka-aiye kihindi chiata he i-ila ke? ⁵ Mnafiki ari; bosi ka-a ihindi liata he i-ila ke, niho iji unemuru kuaho kikulho na kuchika-a kihindi cha mhatu chiata he i-ila la mbahu ke. ⁶ Usiva-o madie hu kitakatifu, na usijibibie gu-a lulu mbele kini. kahali veneji-oni na kujidaha kwa masame, na iji jinekukiria na kukukwara kwara vihindi hindi. ⁷ Ombeja, na ari uneowe. Daa, na ari unepata. Uba mbwanye, na ari unelhaiwa. ⁸ Kwa wowose eneombeja, edoria. Na kwa wowose edaaija, epata. na he mhe ambaye eba mbwanyeni enelhaiwa. ⁹ Kana helo mhe hehakaghu kaghu, m-inyi ku-u enemwombeja kipande cha mkate enem-o isaheru? ¹⁰ Kana kai enemwombeja samaki, na u enem-o bome? ¹¹ Kwato, kai kune muvakusa mreile kuva-o va-inyi kaghu zawadi kulho, he ni kiasi mina sha Aba eata mbinguni enemu-o vigi vikulhohu vemuombeja u? ¹² Kwa sababu ka, ukunedumu kubo-iwa kigi chochose ni vahe va hali, na ari iji inekudumu kuvabo-ia wato-oto. Kwa ite ka ni sheria na valotezi. ¹³ Buuni, kwa kutahoya, he igeti isisiri. Kwaite igeti igiru na kwalhi giru inemuerekeja he kuonika, na helo vahe vahe vangi vetahoa kwalhi kayo. ¹⁴ Igeti ni isisiri. Igeti isisiri ni kwalhi ierekeje he uzime na ni vaghere vemuru kuiaho. ¹⁵ Mkwa chonjo ne valotezi va mambeza, velita ve-oroe bulhe ya i-alu, mira kweri mangugwa makai. ¹⁶ Kwa matunda kini mnevaile. He vahe vemuru kudaa matunda he mihatu ya ilo milhae, kana mtini ulo mbeyu ya mbaruti? ¹⁷ Kwa mburi ka, kila mhatu mkulho unesa matunda makulho, mira mhatu mkusa unesa matunda makusa. ¹⁸ Mhatu mkulho teumuru kusa matunda makusa, wala mhatu mkusa teumuru kusa matunda makulho. ¹⁹ Kila mhatu hu usisa matunda makulho unetewe na kubibiwe he mwalha. ²⁰ Kwato iji, unevaile kutahoya matunda kini. ²¹ Sio kila mhe enise, 'Dilao,Dilao,' enebuu he udilao wa mbinguni, mira ni hubi ebo-i huchidumuwe ni Aba gho eata mbinguni. ²² Vahe vangi veneniba ka i-aze, Dilao, Dilao, tetugue ulotezi kwa ilhe ke, tetugue m'pepo kwa ilhe ke, na kwa ilheke tukabo-i miboire mikumure migiru? ²³ Niho ninemuba wazi, 'sivailie kune! Hakani hagho, kune m-bo-i makusa!' ²⁴ Kwato, kila muwe ikoe mburi gho na kuidosa ene toti sa mhe elo viugho ekakwa minda ku-u ana ya mwamba. ²⁵ Mare ikasi, mafuriko yekalita, na sa-a ikalita na kui-ma minda ka, mira teimuruye kulhu, kwa ite yeekwaiwe ana ana he mwamba. ²⁶ Mira kila mhe ekoye mburi gho ekaro-kuidosa, enetotijwa na mhe kirundu ekwae minda ku-u ana he mpulhe. ²⁷ Mare jikalita, mafuriko yekalita na s-a ikalita na kuima minda ka. Na ikalhu, na kuonika ku-u kukaheja. ²⁸ Ukahe wakati ambao Yesu erefi kuyo mburi ya, makutano vekashangajwa ni mahinizi ku-u, ²⁹ kwa ite ekuhiniza sa mhe elo udilao, na si sa vaandishi kini.