¹ Yesu are aho ukumure, ekahaka na kuso he ngori. Ata ezokodie di, vahina ku-u vekalita haku-u. ² Ekaghubula m-o ku-u na kuvahinisha, ekuba, ³ "Keba ve masikini va shwaho kwaite udilao wa mbinguni ni mkini. ⁴ Keba velo vuhuye, kwa ite venekengerejwa. ⁵ Keri velo upole, kwaite venepala idi. ⁶ keba velo kela na kasu ya haki, kwaite ka venekutiwe. ⁷ keba velo rehemakwaite venepata Rehema. ⁸ keba velo shwaho i-akue kwa ite venemuaho Kiumbi ⁹ Heba vapatanishi, kwaite ka venesewe vai-inyi va Kiumbi. ¹⁰ Keba hu venyamarishwa kwa mburi ya haki, kwaite Udilao wa mbinguni ni mkini. ¹¹ Keba kune ambavo vahe vene mu-olhu na kumutesa, au kuba kila aina ya ukusa hakaghu kwa mambeza kwa ajili gho. ¹² Lhamuiwani na kinyemi, kwaite thawabu kaghu ni giruana mbinguni. Kwaite ya nicho vahe vevasumirije valotezi vehemie kabla kaghu. ¹³ Kune ni mnaro wa dunia. Mira iji mnaro ukulahati kulhamu ku-u, inemuruika kimomo kuwa mnaro hu mjenye? Neri teika muru kukwa kulho kwa kigi kihali chochose kahali, ila bi kubibiwe kaga na kudahawe na masame ya vahe. ¹⁴ Kune ni nuru ya idi. Mwang'a ukwaiwe ana he ngori teukufisika. ¹⁵ Neri vahe tevekati kijari na kuchike di he kiteju, mira he kinara, nacho chivaangaza vakabuna veata za minda. ¹⁶ Roni nuru kaghu iangaze mbele ja vahe kwa namna ambayo ite, veneoaho miboire kaghu mikulho na kumtogola Aba kaghu eata mbinguni. ¹⁷ Msifanyanye nilitie kuioni sheria wala Valotezi. Silitie kuoni mira kutimija. ¹⁸ Kwa kweri nimubaya ite mpaka mbingu na dunia kabuna jitaho tehelo yodi we neri nukta we ya sheria ineka-awe he sheria hadi ata kila kigi chinekwa cha-akita kutimijwa. ¹⁹ Kwato wowose enepu amri kitutu neri we ya amri ya na kuvahiniza vahali kubo-i kacho enesewe mgitutu he udilao wa mbinguni. Mira wowose enejidara na kuhinisha enesewe mgiru he udilao wa mbinguni. ²⁰ Kwaite nimubaya haki kaghu ikusa-azidi haki ya vegonda na mafarisayo, kwa vyovyose hu temkabuu he udilao wa mbinguni. ²¹ Mkoe iyoiwe kae ite, "usiga-a" na 'wowose ega-a eata he hatari ya hukumu.' ²² Mira nimubaya wowose emsanuiwa mbahu ku-u enekwa he hatari ya hukumu. na wowose em-baya mbahu ku-u ite , ' Ari u mhe usiye!' enekwahe hatari ya baraza. Na wowose eba, 'Ari kirundu' enekwa he hatari ya mwalha wa jehanamu. ²³ Kwato kai ugu sadaka ke he madhabahu na ukahulha ite mbahu ke elo mburi yoyose na ari , ²⁴ iro sadaka mbele ya madhabahu, halafu dara kwalhi ke. Mze patana ini na mbahu ke, na halfu ulita kugu sadaka ke. ²⁵ Patana na mshitaki ke upesi, mwe-ata hawe kwalhi kuso mahakamani, kaisicho mshitaki ke emuru kukuro he miheregha ya hakimu, ne hakimu akuro he miheregha ya asskari, na ari unebibiwe he igereza. ²⁶ Amini nimubaya, neri tukarowe huru mpaka ukwa waa riha senti ya mwisho ya hera udaiwa. ²⁷ Mwaako iyoiwe ite, 'usizini.' ²⁸ Mira nimubaya wowose enemuwesia mlage kwa kumtamani enekwa a-azini na-u he shwaho ku-u. ²⁹ Na kai i-ila ke la kuume likubo-i kukuma kisatu, limg'ofule na ulibibi uda na ari. Kwa ite ni keba kigi kiwe hemsa ke kionike kuliko msa mzime kubibiwe he jehanamu. ³⁰ Na kai mheregha ke wa kuume ukuboi kuhiri, ute halafu uze ubibi uda na ari. Maana ni keba kigi kiwe he msake kionike kuliko msa mzime kubibiwe jehanamu. ³¹ Iyoiwe kahali, wowose enemu-uguluti mlage ku-u, na am-o hati ya talaka. ' ³² Mira ani nimubaya, wowose ane mro mlage ku-u, komobi kwa mburi yazinaa, embo-i akwa mzinzi. Ne wowose enemdoribaada ya kuowe talaka ebo-i uzinzi. ³³ Kahali, mwa-ako heyoiwe kwa hu va kae, 'Msiape kwa mambeza, bali ti-i-ni viapo kaghu hakwe Dilao. ³⁴ 'Mira nimuba, msiape hata kabwesu, chikwa he mbingu, kwaite, ni enzi ya Kiumbi; ³⁵ wala kwa dunia, maana ni hodi maana ni hodi hakukeya kikire cha kudahaya majato ku-u, au he jerusalemu, kwaite ni mwang'a wa mfalme mgiru. ³⁶ Neri usiape kwa m-a ke,kwaite tumuru kubo-i lu-alhu muwe kuwa u-aku kana mkuhame. ³⁷ Mira miyoiye kaghu ikwa, 'eee,eee, hai, hai.' kwaite yenetaho ka yeli hehu mkusa. ³⁸ Mwaako iyoiwe ite, 'I-ila kwa i-ila, na i-iki kwa i-iki. 'Mira ani nimuba, msihimane na mhe mkusa; ³⁹ Mira mhe ekukuma he ishavu la kuume mkiritie na ihali nalo. ⁴⁰ Na kai wowose edumu kuso na ari mahakamani na ekakula nkanzu ke, mroe na ijoho nalo. ⁴¹ Na wowose enekulazimisha kuso na-u maili we, so na-u maili nu. ⁴² kwa wowose enekuombeja m-oe, na usee m-i wowose edumu kukuopa. ⁴³ Mwaako heyoiwe, 'Umdumu jirani ke, na umsanuiwe adui ke.' ⁴⁴ Mira nimubaya, vadumuni maadui kaghu, Vatasieni ve muuzi, ili kuba mukwa va-inyi va kwe aba kaghu eata mbinguni. ⁴⁵ Kwaite ebo-i ka-aze keangaza vakusa na vakulho, na evasi-ijija mare vakusa na vakulho. ⁴⁶ Kai mkuvadumu vevadumue kune, mnepata thawabu mina? Mbona vezadara ushuru tevebo-i to? ⁴⁷ Na kai mkuvaholu vabahu kaghu bi mnepata kiahoni kuliko vahali? He! vahe va mataifa tevebo-i to-to? ⁴⁸ Kwato mudumuwe mukwa vakamirifu, se Aba kaghu wa mbinguni cho emkamirifu.