¹ Muda wa chalhenu urehe, vagiruvakabuna va kirurumo na vbazee va vahe veka-a njama yakwe Yesu ili vam-ga-a. ² vekam-oro, vekamkaetija, na kumheti hakwe liwali Pilato. ³ Halafu too Yuda, hu emsalitiye, eka-aho ite Yesu a aheja kupa-aiwa, ekajuta na kukiriti vibesu mirongo mikai, vay hera he mgiru wa kirurumo na vazee, ⁴ na ekaba, "Naabo-i ukusa kwa kuisaliti sako isilo na hatia." Mira vekalandula, "Itutara kiahoni nne? Yawesie mwenye. ⁵ Halafu ekavibibi di hu vibesu vya hera he ihekalu, na kuhaka na kuso kwa kufufa mwenye. ⁶ Mgiru wa kirurumo ekavudori hu vubendo vywa hera na kuba, "Si halali kuike hera ya he hazina, kwaite ni gharama ya sako. ⁷ "Vekayoijanya kwahawe na hera ikatumika kuweya mbuva ya mfinyanzi la kujikia vagalho. ⁸ Kwaite ya mbuva ka yeekwaye ikusewe, "Mbuva ya sako" mpaka wa-i. ⁹ Halafu hu mburi ye yoiwe ni mlotezi Yeremia likatimia, kuba, "Vedorie vipande mirongo mikai va hera, gharama ikeiwe ni vahe va israel kwa ajili ku-u, ¹⁰ na vekatumia kwa mbuva ya mfinyanzi, se Dilao cho enierekeje." ¹¹ Iji Yesu ekauma mbele ya liwali, ne liwali ekamlhasu, "He!ari ni dilao wa Vayahudi?" Yesu ekalandula, "Ari waayo to." ¹² Mira too areshitakiwa ni vagiru va kirurumona vazee, telandule kigi. ¹³ Halafu Pilato ekambaya, "Tuyakoe mashitaka ke makabuna make"? ¹⁴ Mira telandule neri mburi we, kwato liwali ekahuwe ni lundolo. ¹⁵ Iji he sikunkulu nee desturi yakwe liwali kumlamaya mza-orowe muwe enesaghurwa ni vahe. ¹⁶ Wakati ka heelo na mzaorowe sugu ilhe ku-u Baraba. ¹⁷ Too varekwa vaatutana hawe, Pilato ekavalhasu, "Niji mdumu tumlhamaye kwa ajili kaghu? Baraba kana Yesu esewe Kristo?" ¹⁸ Kwa ite e-eliye ite vaamdara kwa mburi ya chuki. ¹⁹ Too ekuzokodi he kikire ku-u cha kupa-aya, mlage ku-u ekamsughaya mburi na kuba, "Usibo-i mburi yoyose he mhe ka esilo na hatia. Kwa ite naanyamarishwa sana mpaka wa-i he kuoshwa kwa sababu ku-u. ²⁰ Niho Vagiru va Kirurumo na vazee vekavashawishi makutano vamwombeje Baraba, ne Yesu aga-awe. ²¹ Liwali ekavalhasu, "Ni mhama he ya vanu mdumu nimlhama hakaghu? Vekaba, "Baraba." ²² Pilato ekavabaya, "Nimsamo ahoni Yesu esewe Kristo"? Vakabuna vekalandula, "Msulubishe" ²³ Nau ekaba, "Kwani, ni ikosa mina ebo-iye?" Mira vekazika ma kilondo kwa sauti ya ana sha, "Msurumije." ²⁴ Kwato too Pilato areaho temuru kubo-i chochose, mira badala ku-u vurugu jaanavoka, ekadori ma-i ekaonthimiheregha ku-u mbele ya umati, na kuba, "Ani silo hatia ana ya sako ya mhhe ya esilo hatia. Wesiani ya kune venye." ²⁵ Vahe vakabuna vekaba, "Sako ku-u ikwa ana kanu na va-inyi kanu." ²⁶ Halafu ekamlhamaya Baraba hakini, mira ekam-ma mijeledi Yesu na kum-oti hakini kuso kumsurumija. ²⁷ Halafu askari va liwali vekamdori Yesu mpaka Praitorio na ikundi igiru la maaskari vakabuna vekamtutikia. ²⁸ Vekam-gu goma ku-u na kum-oroija nkanzu ya rangi ibayu. ²⁹ Halafu vekabo-i taji ya milhae na kuike ana he m-a ku-u, na vekamkea mwanzi he mheregha ku-u wa kuume. Vekakoma mamuro mbele ku-u na kumtera, vekuba, "Tukuholu, Dilao wa Vayahudi? ³⁰ Na vekambusuya mapae, na vekadori mwanzi vekam-ma he m-a. ³¹ Too vekumtera, vekamgu nkanzu na kum-oroija gomae ku-u, na kum-kaetija kuso kumsurumija. ³² Vareli gana, vekamwaho mhe kuli Krene ilhe ku-u Simeoni, vekamlazimisha kuso navo nesa auti-i msalaba ku-u. ³³ Varehe hodi hesewe Golgotha, maana ku-u, "ieneo la ifwara la M-a." ³⁴ Vekam-o siki ikwarianywe na nyongo awaha. Mira areigali, temuruye kuiwaha. ³⁵ Too vare msurumisha, veka kakaana gomae ku-u kwa kujimaya kura. ³⁶ Na vekazokodi kumwesia, ³⁷ Ana he m-a ku-u vekake malaho ku-u yekasomeka, "Ya ni Yesu, dilao wa vayahudi." ³⁸ Vanyang'anyi vanu veesulumijwe hawe na u, muwe bwa wa kuume ku-u na mhali wa kumoso. ³⁹ Hu veekutaho vekam-bera, veku-kusha mi-a kini ⁴⁰ na kuyo, "Ari we kudumu kulioni ihekalu na kulikwa he ma-aze makai, kuokoe mwenye! Kai u M-inyi wa Kiumbi, dimi di uli he msalaba. ⁴¹ He hali huhu vagiru va kirurumo vekuta mtera, hawe na vaandishi na vazee, na kuba, ⁴² Evaokoe vahali, mira temuru kukuokoa mwenye. U ni Dilao wa Vayahudi. Na adimi di kuli he msalaba, niho tunemwamini. ⁴³ Emwarire Kiumbi. Ro Kiumbi amwokoe iji kai edumu, kwaite eebaye, 'Ani ni M-inyi wa Kiumbi. ⁴⁴ Na hu vanyang'anyi veesulubiwe hawe na u navo vekayo mburi ja kumtera. ⁴⁵ Vaijiji kuli saa sita heelo kidughu he idi ikabuna mpaka saa kenda. ⁴⁶ Irehe saa kenda, Yesu ekazo kwa sauti giru, "Eloi, Eloi. lama thamakithan?" ekumaanisha, "Kiumbi gho, Kiumbi gho, kwa ahoni waaniro?" ⁴⁷ Wakati ka vahali kini vee-umaye too vekako, vekaba, "Etamse Eliya." ⁴⁸ Upesi muwe kini ekaugulu kudori sifongo na kuihuti chakuwaha chinyera, ekaibutu he mhatu na kuibutu nesa awaha. ⁴⁹ Naka veeshighale vekaba, "Mroni mwenye, roni tuaho ite Eliya enelita kumwokoa." ⁵⁰ Halafu Yesu ekazo wa kwa sauti giru na kuigu swaho ku-u. ⁵¹ Wesia, Pazia la hekalu lika-ka-aika hodi hanu kuli ana mpaka di. Na idi likazingiza na miamba ikabasuka vihindihindi. ⁵² Makaburi ekalhaika, na misa ya vatakatifu vakumure vee-bodiye luireno vekafufuliwa. ⁵³ Vekali he makaburi baada ya ufufuo kini, vekabuu mwang'a mtakatifu, na veka-ahoika he vakumure ⁵⁴ Basi hu akida nahu veekumuwesia Yesu veka-aho izingizo na mburi je kulijanya, vekahuwe ni bughu giru na kuba, "Kweri ya ne M-inyi wa Kiumbi." ⁵⁵ Valage vakumure ve-ekumdosa Yesu kuli Galilaya ili kumyamarikia, veeta too vekumuwesia kuli uda. ⁵⁶ He vo nee Mariamu Magdalena, Mariamu lage kini Yakobo ne Josefu, ne lage wa va-inyi vakwe Zebedayo ⁵⁷ irehe chamagheri, ekalita mhe mzuri kuli Arimathayo, eekusewe Yusufu, nau ne mhina wakwe Yesu. ⁵⁸ Ekamsoya Pilato na kuombeja Msa wakwe Yesu. Halafu Pilato ekasugha aowe. ⁵⁹ Yusufu ekadori msa ekauoro na gomae ya sufi iakue, ⁶⁰ na kuubodija he kaburi isha ku-u lo elituye he isaheru. Halfu ekadongorosha isaheru igiru likalhati luhige lwa kaburi na ekaso ku-u. ⁶¹ Mariamu Magdalena ne Mariam mhali vee ata too, vezokodie kuwesiana na kaburi. ⁶² I-aze lidosie nee iaze la maandalio, vagiru va kirurumo na mafarisayo vekakututa hawe hakwe Pilato. ⁶³ Vekam-ba, "Dilao turahulha ite too hu mza-ta bado e-ekuhema, ebae, 'Baada ya ma-aze makai enefufukawa. ⁶⁴ Kwato sugha ite ikaburi liwesiiwe kikulho mpaka iaze la kakai. Kai sicho, vahina ku-u vemuru kum-gwa na kuyo ha vahe, "Afufuka kuli ha vegae. 'na kutawe kwa mwisho kunekwa kukusa kutaho hu wa bosi." ⁶⁵ Pilato ekavaba, "Dorini valinzi. Soni mzeboi hali ya usalama sacho mmuru. ⁶⁶ "Kwato vekaso na kuboi ikaburi kukwa salama. isaheru likakontwa mhuri na kuke valinzi.