¹ Baadae chamagheri ya Sabato, kaaze karehokwa kuoija iaze la bosi la wiki, Mariamu Magdalena, na hu mariamu mhali vekalita kuliaho ikaburi. ² Wesia heelo izingizo igiru, kwa ite malaika wa Dilao edimiye na kubingirisha hu isaheru, halafu ekalizikodiaya. ³ Vubasa ku-u vweekwae sa lumeme, na gomae ku-u jeekwae jiakue sa theluji. ⁴ Hu valinzi vekahuwe ni futo na kukwa sa vegae. ⁵ Hu malaika ekavafafanulia hu valage ekuba, "Msiogohe kwa ite nireile ite mumdaa Yesu, esumirijwe. ⁶ Tehata i-i. mira afufuka sacho emubaye. Litani muaho hodi ho Dilao e-ebodie. ⁷ Soni fiafia mzevabaya vahina ku-u, 'Afufuka kuli ha vegae, Wesiaavakaeya Galilaya. Are niho mnemwaho.' Wesia ani namubaya." ⁸ Hu valage vekahaka too heikaburi upesi velo futofuto na kinyemi kigiru, na vekaugulu kuvabaya vahina ku-u. ⁹ Wesia Yesu ekahe navo na kuba, "Nimuholu" hu valage vekalita na kudara masame ku-u, na halafu vekamtasa. ¹⁰ Halafu Yesu ekavabaya, "msiogohe, soni mzevabaya vabahu gho vakae Galilaya. Are veneniaho. ¹¹ Too hu valage ata veekuso, wesia valinzi vahali vekaso he mwang'a na kuvabaya vagiru va kirurumo mburi kabuna jilijanye. ¹² Navo va giru va kirurumovarehe na vazee na kuiyo mburi ka hawe navo, vekagu kiasi kigiru cha hera hehu askari ¹³ na kuvabaya, "Vabayani vahali ite, 'vahina vakwe Yesu vaalita na-ama vekaugwa msa wakwe Yesu wakati too nne tweebodie. ¹⁴ Kai mburi ya inemhea liwali, nne tunemkengereja na kuvaka-aya kune futofuto kabuna. ¹⁵ Kwato hu askari vekajidori hu hera na kubo-i na kuboi sa hucho veebaiwe. Mburi ya ikaenea sana he vayahudi na ikakwa to mpaka wai. ¹⁶ Mira hu mitume ikado na muwe vekaso Galilaya, he hu lungorilo e-evaerekeje. ¹⁷ Navo varemuaho, vekamtasa, Mira vaghere kini veka-aho futo. ¹⁸ Yesu ekavalitia ekuba, "Na-aowe ugiru mkabuna duniani na mbinguni. ¹⁹ Kwato soni mzevaboi mataifa makabuna kukwa vahina. Vabatijeni he ilhe la Aba, la M-inyi na la Roho Mtakatifu. ²⁰ Vahinizeni kudosa hu mburi kabuna jo nimubaye, Na wesia, ani niata hawe na kune maaze kabuna, mpaka mwisho wa dunia.