¹ Too Yesu arefi kuyo mburi kabuna ka, ekavaba vahina ku-u, ² "Mreile ite baada ya ma-aze manu tunekwa na siku nkulu ya pasaka, na M-inyi wakuu Adamu eneguwe asurumijwe." ³ Baadae Vagiru va kirurumo na vazee va vahe vekahe hawe hodi edie mgiru wa kirurumo, Ekasewe Kayafa. ⁴ Kwa hawe vekake njama ya kumdara Yesu kwa siri na kum-ga-a. ⁵ Kwa ite veeyoe, "Isiboike wakati wa siku nkulu, nesa iseegera ghasia he vahe. ⁶ Too Yesu eata Bethania he minda ya Simoni mkoma, ata ⁷ ekunyooshe he meza, mlage muwe ekamlitiya eeti-iye mnkebe wa alabasta weelo malhoma ya samani giru, na ekayasu he m-a wa ku-u. ⁸ Mira vahina ku-u varezaaho ka mburi, vekasanuiwa na kuba, "Ni mburi mina ya hasara ya? ⁹ Ya yesemuruwe kudiwe kwa kiasi kigiru na kuotiwe he vahuye." ¹⁰ Mira Yesu, ilai eiliye ya, ekavaba, "Kwa ahoni mumnyamarisha mlage ya? Kwaite aabo-i kigi kikulho hagho. ¹¹ Vahuye mlo navo ma-aze kabuna, mira temka kwa hawe na ani daima. ¹² Kwaite arekufuntu malhoma ana ya msa gho, ebo-ie to kwa ajili ya majiko gho. ¹³ Kweri nimubaya, Hohose injili ya inehubiriwa he ulimwengu mzime, ya mburi eboiye ya mlage, nacho chinekwa chiyowe kwa kum-hulha." ¹⁴ Niho muwe wa hu ikado na vanu, esewe Yuda Iskariote, ekaso he vagiru va kirurumo ¹⁵ na kuba, "Mnenio ahaoni nikumsaliti?" Vekampimia Yuda vipande mirongo mikai vya hera. ¹⁶ Kuvokia muda ka ekadaa nafasi ya kumsaliti Yesu. ¹⁷ Hata i-aze la bosi isibutuiwe chachu, vahina vekamsoya Yesu na kuba, "Nile udumu tukuandae u-a viaghu vya pasaka?" ¹⁸ Ekavaba, "Soni he mwang'a he mhe fulani na mumbaye, Mhinizi eba, "Muda gho wahe sina. ¹⁹ Nineitimija Pasaka hawe na vahina gho he minda ke." Vahina vekabo-i sacho Yesu evabaye, na veka-andaa viaghu vya pasaka. ²⁰ Irehe chamagheri, ekazokodi ku-a viaghu hawe na hu vahina ikado na vanu. ²¹ Ata vee ku-a viaghu, ekaba, "Kweri nimubaya ite muwe kaghu enenisaliti." vekazika ²² Vekadungurika na kila muwe ekavoka kumlhasu, "He, kweri siyo ani, Dilao?" ²³ Ekalandula, "Hu enebutu mheregha ku-u hawe na ani he ibakuri ni-u enenisaliti. ²⁴ M-inyi wakwe Adamu enehaka, sacho egondiwe. Mira ole ku-u mhe ka enemsaliti M-inyi wa Adamu! Chesekwae kikulho he mhe ka nanga teahoiwe." ²⁵ Yuda, hu anemsaliti ekaba, "He!, ni ani Rabi?" Yesu ekam-ba, "Uyoe mburi ka mwenye." ²⁶ Ata vekuuchera a viaghu, Yesu ekaudori mkate, ekaubariki, na ku-pa-a. Ekavao vahina ku-u ekuba, "Dorini, m-a. ya ni msa gho." ²⁷ Ekadori kikombe na kushukuru, ekava-o na kuba, "Wahani vakabuna he ya. ²⁸ Kwaite ya ni sako ya iaghano gho, isuwe kwa mburi ya vakumure he msamaha wa makusa. ²⁹ Mira nimubaya, sikawaha wa matuunda ya mzabibu ya, mpaka i-aze hu nikunewaha sha hawe na kune he udilao wakwe Aba gho. ³⁰ Vare-heja kuimba lwimbo, vekali kuso he lungori lwa mizaituni. ³¹ Halafu Yesu ekavaba, "Kiama ya kune vakabuna mnekukonta kwa mburi gho, kwaite hegondiwe, Ninem-ma mzemo na ma-alu he ikundi enetawanyika. ³² Mira baada ya kufufuka gho, ninemuka eya kuso Galilaya. ³³ mira Petro ekavabaya, "Hata kai vakabuna venekulhi kwa mburi jinekukupata, ani sika kulhi." ³⁴ Yesu ekalandula, "Kweri nikubaya, kiama ya too nkuruve isinazo, unenikana kagi kakai." ³⁵ Petro ekam-ba, "Hata kai ye kunitara kuga na ari, sikakukane." Na vahina vahali vakabuna vekayo to-oto. ³⁶ Baadaye Yesu ekaso navo hodi hesewe, Gethsemane na ekavaba vahina ku-u, "Zokoni i-i too nikuso are na kutasa." ³⁷ Ekavadori Petro na va-nyi vanu vakwe Zebedayo na ekavoka kudungurika na kuhiri swaho. ³⁸ Halafu ekavaba, Swaho gho ihirisha, sina na kuga. Hemani i-i na mcherije hawe na ani." ³⁹ Ekaso kara habwesu, ekalhu kifudifudi, na kutasa. Ekuba, "Aba gho, kai chimuruika, kikombe ya kiniepuke. Isikwa sa cho ni dumu ani, Mira sa hucho udumu ari." ⁴⁰ Ekavadosa vahina na ekaheya vaagosha lu-ireno, na kumbaya Petro, "Kwa ahoni tem-muruye kucherija na ani neri isaa iwe? ⁴¹ Cherijani na kutasa nesa msibuu he maghesho. Swaho idumu, mira msha ni m-bovu. ⁴² Ekaso ku-u kagi ka kanu na kutasa, ekaba, "Aba gho, kai mburi ya teimuruika kuepukika na lazima nikiwahae kikombe ya, cho udumu ari na chikwa. ⁴³ Ekakirii wa ekavaheya vaagosha luireno, kwaite ma-ila kini ye kuyahi. ⁴⁴ Halafu ekavaro wa ekaso ku-u,. Ekatasa kagi ka- kakai ekuyo mburi wa hu-uhu. ⁴⁵ Baadaye Yesu ekavasoya vahina ku-u na kuvabaya, "Mcherie gosha na kupumzika? Wesiani, saa yaahe, na M-inyi wakwe Adamu etasalitiwa he miheregha ya velo makusa. ⁴⁶ Kani, tuhaka. Wesia, hu enenisaliti aahe sina." ⁴⁷ Too eekuchera yo, Yuida muwe va hu ikado na vanu, ekahe,. Vahe vakumure veelitiye nau vekuli he vagiru va kirurumo na vazee va vahe. Vekalita mahamba na maboi. ⁴⁸ Kahali mhe edumuye kumsaliti Yesu eevaoe ishara, ekuba, "Hu ninem-ma Ibusu, niu ka. Mdarani." ⁴⁹ Upesi ka ekalita hakwe Yesu na kuba, "Nikuholu, Mhinizi!" na ekam-ma ibusu. ⁵⁰ Yesu ekam-ba , "M-aro, libo-i hu likugerae," Niho vekalita, na kum-ku-utuia miheregha Yesu, na kumdara. ⁵¹ Wesia mhe muwe eata ne yesu, ekanyoosha mheregha ku-u, ekagu luhamba ku-u na kumte ilama ku-u. ⁵² Niho Yesu ekam-ba, kiriti luhamba ke to ho uluguye, Kwa ite vakabuna vetumia luhamba veneangamizjwa kwa luhamba. ⁵³ Mfanyanya ite ite simuru kumse Aba gho, nau ekanisughaya majeshi zaidi ya ikado na manu ya malaika? ⁵⁴ Mira iji mina magondo yamuru kutimijwa, Ya nicho chidumuwe kulijanaya.? ⁵⁵ Wakati ka Yesu ekaubaya umati, "He !Mlitie na mahamba na Viboi kunidara sa mgwalo? Kila i-aze nizokodi hekaluni nikuhiniza, na temnidaraye! ⁵⁶ Mira kabuna ya yebo-ika nesa magondo ya valotezi yatimie." Niho vahina ku-u vekamro na ku-ugulu. ⁵⁷ Hu vemdaraye Yesu vekam-tii hakwe kayafa, Mgiru wa kirurumo, Hodi ambaho vaandishi na vazee veeku-umbike hawe. ⁵⁸ Mira Petro ekamdosa mzungure kwa uda mpaka he ikole lwa mgiru wa Kirurumo. Ekabuu za na kuzokodi hawe na valinzi a-aho chinelijanya. ⁵⁹ Nesa vagiru va kirurumo na Baraza kabuna vekudaa ushahidi wa mongo he Yesu, Nesa vamuru kumga-a. ⁶⁰ Hata kai veelijanye mashahidi vakumure, Mira tevepatiye sababu yoyose. Mira baadaye mashahidi vanu vekalijanya mbele ⁶¹ na kuba, "Mhe ya eebaye, "Nimuru kulipu ihekalu la Kiumbi na kulikwa wa kwa ma-aze makai." ⁶² Mgiru wa kirurumo ekauma na kumlhasu, "Tumuru kulandula? Ya vekuyop ahoni ana ke?" ⁶³ Mira Yesu ekata-a chwi. Mgiru wa Kirurumo ekambaya, "Sa kiumbi cho ehemka, nakubaya utubaye, Kai ari ni Kristo, M-inyi wa Kiumbi" ⁶⁴ Yesu ekalandula, "Ari mwenye waayo mburi ka. Mira nikubaya, kuvoka waijiji na kuso unemuaho M-inyi wakwe Adamu ezokodie mheregha wa kuume ulo nguvu, na ekulita he majunde ya mbinguni." ⁶⁵ Niho mgiru wa kirurumo ekararura gomae ku-u na kuba, "Aakufuru! He! tudumu ushahidi mhali wa ahoni? Wesia, Mwaako ekukufuru. ⁶⁶ He! mufanyanya kiahoni? Vekalandula na kuba, "Estahili kigato." ⁶⁷ Halafu vekam-busuya mapae he vubasa na kum-ma mchapa nkundi, na kuchapa makofi kwa miheregha kini, ⁶⁸ na kum-ba, "Tulotijie, ari Kristo. Niji ekuchapie?" ⁶⁹ Wakati ka Petro e-ezokodiye gana he ikole, na mnyamalo wa kilage emsoye na kumbaya, "Na ari weata hawe ne Yesu wa Galilaya." ⁷⁰ Mira ekakana mbele kini vakabuna, ekuba, "Si-iliye kigi cho uyo." ⁷¹ Areso gana ya luhige, mnyamalo mhali wa kilage ekamuaho na kuvabaya veata ta, "Mhe ya nau eata hawe ne yesu wa nazareti" ⁷² Ekakana wa kwa kiapo, "Ani similiye mhe ya" ⁷³ Muda mfuhi baadaeye, hu vee=umaye sina, vekamsoya na kuyo ne petro, "Kwa uhakika na ari ure muwe kini, kwaite hata miyoire ke iaija. ⁷⁴ Niho ekavoka kubusu na kuapa, "Ani similiye mhe ya," na wangu bi nkuruve ikazo. ⁷⁵ Petro ekahulha mburi yoebaiwe ni Yesu, "I-i nkuruve isinazo unenikana kagi kakai."