¹ He kuwesiana na huduma he mburi ya vazadarisha, ni keba hagho kuvagondia. ² Nire-ile kulanga hucho mudumu kune, ake neekukombiye he vahe va Makedonia. Neevabaye ite Akaya yaakwaya pere kulholhoshi mko utahoye. Kise kaghu chaavabutu swaho vakumure kini kubo-i. ³ Iji, naavasugha vabahu nesa ite kukukoiya kanu kulanga kune yaseekwa bule, naho nesa ite nanga mweekwaye pere, sahucho niyoye mweseekwa. ⁴ Kai sicho, kai mhe wowose wa Makedonia ekulita hawe na ani na kumuheya temkwaye pere, tweseeaho yayo -- sizayo chochose he kune -- kwaite jasiri sha he kune. ⁵ Kwacho neeahoye cheekwaye kikulho kuvasemba vabahu kulita hakaghu na kubo-i mipango herecheri kwa mburi ja zawadi jomweeyoyee. Yacho njicho nesa ite jikwa pere sa baraka, naho si sa kigi chitebawe. ⁶ Fanyanyo ni yalo: mhe elha kabwesu naho eneluka kabwesu, naho wowose enelha he ilengo la baraka naho eneluka baraka. ⁷ Iji naho kira muwe agu sacho epangiye he swaho ku-u. Iji naho asigu he huzuni kana hekukengerejwa. Kwaite Kiumbi emdumu huye enegu kwa kinyemi. ⁸ Naho Kiumbi emuru kuongeja kira baraka kwa mburi kaghu, nesa ite, kira muaze, he mburi kabuna, mumuru kuaho makabuna yo mudumu. Yayo inekwa nesa ite mumuru kuongeja kubo-i kukulho. ⁹ Ni sacho chigondiwe: "Ezarishe uzuri ku-u na kuugu he vahuye. Haki ku-u izoko ma-aze makabuna. ¹⁰ Nahuye egu mbeeyu he mzalha na mkate kwa mburi ya viaghau, naho eneguna kuongeja mbeyu kaghu kwa mburi ya kuzalha. Uye eneongeja uluki lwa haki kaghu. ¹¹ Mnekwatiwe vazuri he kira namna nesa ite mumuru kukwa vakarimu. Yayo inegera shukrani he Kiumbi kutahoiya nne. ¹² He kubo-i huduma yayo sio bi inedoa vyovedumu vazadarisha. Naho kuongejisha mibo-ire mikumure ya ntogolo he Kiumbi. ¹³ Kwa mburi ya kupimwa kaghu na kuwesiwa h huduma yayo, naho mnemtogola Kiumbi he kukoiya kwa kuyo kaghu kwa Injili yakwe Kristo. Naho munemtogola Kiumbi he ukarimu wa karama kaghu hakini na he kira muwe. ¹⁴ Veradumu to kwa mburi ya neema giru ya Kiumbi iata ana kaghu. ¹⁵ Ntogolo jikwa he Kiumbi kwa karama ku-u jisiyoika!.