¹ Ani Paulo, salaghe nimusemba he kunenekera na upole wakwe Kristo. Ani ni mpole nikukwa mbele kaghu, mira nilo ujasiri hakaghu ite, too nikukwa hawe na kune, ² Nimusemba kune ite, too nikukwa hawe na kune, sishindiadumu kukwa jasiri na kukudarisha hagho salaghe. Mira nifanyanya ninedumu kukwa jasiri too nikuvapinga huvo vefanyanya ite tuzoko he namna ya msa. ³ Kwaite hata kai tudaha he msa, tetumayana aku he namna ya msa. ⁴ Kwaite silaha jotujitumia kuwetiana sijahe msa. Mira iji, jillo nguvu ja ki-kiumbi ja ku-oni ngome. Jiraka-aija pere viome vilahatianya. ⁵ Naho, tu-oni kira chilo ugiru kichikuka-aira he viugho vya Kiumbi. Tuchibo-i mateka kila ifaanyanyi he kukoiya he Kristo. ⁶ Naho tupata kufiritiwe kwa kuadhibu kira mibo-ire isilo na kukoiya, Naho bi kukoiya kaghu kunera-akwa kamiri. ⁷ Wesia hucho chighubulike mbele kaghu. Kai wowose eshawishika ite uye ni Kristo, naho iji akuhulhati uye salaghe ite kai choekwaye niwakwe Kristo, kacho nicho na nne naho tukwaye to. ⁸ Kwaite hata nikkukomba kagitutusha kulanga kisatu kanu, huyo Dilao eyaguye kwa mburi kanukuvakwa kune nahe kuva-oni, sika-aho susune. ⁹ Sishindia dumu yalo liahoike ite nimukoija bughu kune he barua gho. ¹⁰ Kwaite vahali he vahe veba-a," Barua ku-u ni nkai naho jilo nguvu, mira kimsa uye ni dhaifu. Viome ku-u teyeye kusikijwa." ¹¹ Hebu vahe va namna kayo va-ile ite hucho tuchiyo he barua too tukukwa uda, ni sachocho na hucho tunezachibo-i too tukukwa too. ¹² Tetuso uda sha sa kukututanya salaghe kana kukuaghati salaghe na huvo ve kutogola sa;laghe. Mira vekunekupima salaghe naho kira muwe klini, tevelo akiri. ¹³ Nne, hatacho, tetukakukombe kutaho mihaka. Mira iji, tunebo-i to bi za ya mihaka huyo Kiumbi etupimiye nne, Mihaka irahe uda sa mikaghu cho ikwaye. ¹⁴ Kwaite tetukuongejije salaghe turevaheiya kune. Tweekwaye vabosi kuhe kwa uda sa kune he injili yakwe kristo. ¹⁵ Tetukakukombe kutaho mihaka kulanga nyamalo ja vahali. Mira iji, tura-arira sa mdarisho kaghu cho ikwaye ite hodi kanu ha nyamalo lineongejishwa, naho hecheri ata za ya mihaka ereyo. ¹⁶ Tuarira he yalo, nesa ite tumuru kubirikira injili hata he mikoa kutaho kune. Tetukakutogole kulanga nyamalo ibo-iwe he maeneo mahali. ¹⁷ "Mira wowose ekutogola, akutogole he Dilao." ¹⁸ Kwaite si huye ekuyoiya salaghe eyoiwa. Mira, nirehuye Dilao emyoiya.