¹ Vadumuwa gho, kwaite tulo vilagha yavyo, na tukunyakhare salaghe he kira mburi huyo tuibo-i he kukwa tukandane he misa kanu naho he swaho. Naho tuuda-aije unyakhare he bughu ya Kiumbi. ² Boini ntafasi he mburi kanu! Tetum-oniye mhe wowose. Tetumhiriye mhe wowose. ³ Ni-yo yalo si hekuvakararija. Kwaite naafiriti kuyo ite muata he swaho kanu, hakanu nne kuga hawe na kuzoko hawe. ⁴ Nilo ujasiri mkumure za hakaghu, naho nikukomba he mburi kaghu. Nihuiwe ni faraja. Nihuiwe ni kinyemi hata hasihasi ya manyamarisho. ⁵ Tweelitiye Makedonia, misa kanu teyeelo ipumujiko. Mira iji, tuka-heiya manyamarisho he namna kabuna he kumawe aku bwa ja gana na futo bwa ja za. ⁶ Mira Kiumbi, efariji vegaye swaho, ekatufariji he militiire yakwe Tito. ⁷ Techeekwaye he ulitio kuu bi ite Kiumbi etufarijiye. yeekwaye naho faraja hujo Tito ejidoriye kuli hakaghu. Uye etubaye udumuisho mgiru mulo nawo, huzuni kaghu. naho mweekwaye na futofuto he mburi gho. Kwato nazikaisha kwa na kinyemi sha. ⁸ Hata kai barua gho yeemuboiye kununghurika, ani sikauhiriiye, mira niuhiriiya too nireaho barua kayo imuboiye kune kukwa na huzuni, mira mweekwaye na huzuni he muda mfuhi. ⁹ Waijiji nilo kinyemi, si he mburi ite mweelo na vwasi, mira kwaitehuzuni kaghu jaamugeraa he toba. Mwe-eheiwe ni huzuni ya ki-kiumbi, kwato mweenyamarishwe si he hasara kwa mburi kanu. ¹⁰ Kwaite huzuni ya ki-kiumbi igera toba huyo ikamirisha wokovu neri cha kukwa na makararijo. Huzuni ya he idi, hatacho, chigera kigame. ¹¹ Wesiani huzuni yayo ya ki-kiumbi yesaije azma mina giru za hakaghu? Nihe mburi mina azma choyeekwaye giru za hakaghu kuahoija ite temwekwaye na hatia. He namna mina uchungu kaghu cho weekwaye mgiru, hofu kaghu, midumuire kaghu, bidii kaghu, naho hucho mdumuishisha kuaho ite haki idumuwe kubo-ika! he kira mburi mwa-a-aho salaghe kusaakwa na hatia. ¹² Hata kai neemugondiye kune, sigondiye he mburi ya mza-oni, naho si he mhe enyamarishwe ni vakusa. Nigondiye nesa ite fanyanyi ja swaho kaghu he mburi kanu ibo-iwe kuilikana hakaghu mbele ya ma-ila ya Kiumbi. ¹³ Nihe mburi ya ite tufarijika. He kususuika he faraja kanu salaghe, tulhamuiwa naho, na kutahoisha kwaite kinyemi chakwe Tito, kwaite swaho ku-u yeelhamuijwe ni kune vakabuna. ¹⁴ Kwaite kai neekukombiye haku-u kuwesiana na kune, seelo susune. Kimzungure kuu, kai bi kira kiome cho tuyoye hakaghu cheekwaye kweri, mahiku kanu kulanga kune he Tito yeeahoiwe kukwa kweri. ¹⁵ Udumuisho ku-u he mburi kaghu ni mgirusha, sahucho ehulhaa kukoiya kaghu, hucho mweemkaribishe uye he hofu naho na kuzingiza. ¹⁶ Nilhamuiwa kwaite nilo ujasiri kamiri za kaghu.