¹ Naho kwato, kubo-i nyamalo hawe, tumusemba kune msiidorie neema ya Kiumbi neri vinelijanya. ² Kwaite erayo, "Muaze uduiwe neekwaye makini hakaghu, na hemuaze wa wokovu neevalha-ariye." Wesia, iji ni wakati udumuijwe. Wesia iji ni i-aze la wokovu. ³ Tetuke isaheru la kukindija mbele ya mhe wowose, kwa ite tetuijdumuiya huduma kanu igerawe he sifa kusa. ⁴ Badala ku-u, tukuwesia salaghe kwa mibo-ire kanu mikabuna, ite tuvanyamalo va Kiumbi. Tuvanyamlo ku-u he ukumure wa ugumiriji, manyamarisho, vwasi, ukuji wa mizokoire. ⁵ kumawe, kuorowe, aku, he kubo-i nyamalo he bidii, he kubeni lu-ireno na-ama, he kela, ⁶ he utanda, maarifa, ugumiriji, ukulho, he Swaho Mnyakhare, he udumuisho halisi. ⁷ Tuvanyamalo ku-u he kiome cha kweri, he nguvu ya Kiumbi. Tulo silaha ya haki kwa ajili ya mheregha wa kuume na wa kumoso. ⁸ Tubo-i nyamalo he heshima na kuberwa, he kashfa na ntogolo. Tuyoiwa visicho ite tuvaza-ta na wakati tuvakweri. ⁹ Tubo-i nyamalo sa kuba tetu-ilikane naho ture-ilikana kikulho. Turabo-i nyamalo savetaga naho- Wesia! - turacheri hema. Tubo-i nyamlo sa tutaadhibiwa kwa mibo-ire kanu mira si sa vehukumiwe hata kuga. ¹⁰ Tuboi nyamlo sa velo manung'uriko, mira ma-aze kabuna tulo kinyemi. Tubo-i nyamalo sa vahuye, mira tusa vazuri vakumure. Tubo-i nyamlo sa kuba tetupata kigi mira sa tulo na kira kigi. ¹¹ Twaayo ukweri mkabuna hakaghu, Vakorintho, na swaho kanu jalhaika he upana. ¹² swaho kanu teilhiwe ni nne, mira mlhiijwa ni fanyanyi kaghu salaghe. ¹³ Iji he kubadirishana he haki nirayo sa he va-inyi - ghubulani swaho kaghu he upana. ¹⁴ Msikwarianywe hawe na vesidarisha. Kwaite helo uhusiano mina he haki na ukusa? ¹⁵ Naho helo ushirika mina hasi ha Luatame na kidughu? Ni kukoiyana kuhama Kristo emuru kukwa na -wo ne Beliari? Kana uye edarisha elo hodi mina hawe na esidarisha? ¹⁶ Naho helo makubaliano mina yeata hasi ya muaresi wa Kiumbi erazoko na mapupe? Kwaite nne ni muaresi wa Kiumbi erazoko, sahucho Kiumbi eeyoye: "Ninezoko hasi kini na kudaha hasi kini. Ninekwa Kiumbi kini, navo venekwa vahe gho." ¹⁷ Kwato, "Lini hasi kini, naho mzekewe uda navo," eyo Dilao. "Msidoe kigi chikandane, naho ninemukaribisha kune. ¹⁸ Ninekwa Aba hakaghu, kune mnezakwa va-inyi vagho va kiagiru na va kilage," eyo Dilao elo-udilao