¹ Tureile ite kai maskani ya idi hulo tuzoko atayeneoniwe, tulo likwaiwe kuli he Kiumbi. Ni minda isibo-iwe na miheregha ya vahe, mira ni minda ya ma-aze kabuna, he mbingu. ² Kwaite he hema yayo tureile, tukudumu kuoroijwa he maskani kanu mbinguni. ³ Turadumu he mburi yayo kwaite heku-oro tetuka ahoikane ite tetuoroye gomae. ⁴ kwa kweritoo tukukwa za ya hema yalo, tulhaiwa tukuyahiiwa,Tetudumu kuguwe, Mira iji,tudumu kuoroijwa, nesa ite hucho chigaye chimuru kughujuwe ni uzime. ⁵ Huye etuandae nne he kigi yacho ni Kiumbi, huye etuoye nne Swaho sa kilagha cha hucho chineza lita. ⁶ Kwato mukwa na ujasiri ma-aze makabuna. Mukwa ma-ila ite too tukukwa tuata minda he msa, tuata uda ne Dialo. ⁷ Kwaite tudaha he mdarisho, si he kuaho, Kwato tulo ujasiri. ⁸ Ni keba tukwa uda kuli he msa na minda hawe ne Dilao. ⁹ Kwato tutaibo-i kukwa ilengo kanu, kai tukukwa ang'a kana uda, tumlhamuije uye. ¹⁰ Kwaite chidumuwe vakhabuna tuahoikane mbele ja kikire cha hukumu cha Kristo, nesa ite kira muwe amuru kudoria hucho chiraye he mburi jibo-ike he msa, chikukwa ni he ukulho kana he ukusa. ¹¹ Kwato, he kui-ile futofuto ya kwe Dilao, tuvakengereja vahe, Hucho tukwaye, chiaija pere he Kiumbi. Niarira ite chirailika naho he fanyanyi kaghu, ¹² Tetugali kuvakengereja kune kahali kutuaho nne sa vakweri. Mira iji mumuru kukwa na la kuvalandula he huvo vekukoiya kulanga kuahoikana mira si hucho chiata za ya swaho. ¹³ Chikukwa kai sa twaakwa vilalu, nihe mburi ya Kiumbi. Naho kai tunekwa tuata he akiri kanu kulho, ni he mburi kaghu. ¹⁴ Kwaite udumuisho wakwe Kristo utukengereja, kwa mburi tulo uhakika na yalo: ite mhe muwe eegaye kwa mburi ya vakhabuna, naho kwato vakabuna vegaye. ¹⁵ Ne Kristo eegaye kwa mburi ya vakabuna, nesa ite huvo vezoko vasizoko kahali kwa mburi kini salaghe. Mira iji, chidumuwe vazoko he mburi ku-u uye huye egaye na kufufuka. ¹⁶ He mburi yayo, kulholhoshi wa-ijiji na kusoisha tetumhukumu mhe kuagha na viwango vya vahe, hata kai ata azeto tweemuwesie Kristo sacho. Mira waijiji tetukamhukumu wowose he namna yayo kahali. ¹⁷ Kwato, chikukwa mhe wowose eata za he Kristo, uye ni Kiumbe kisha. Mburi ja azeto jaa-taho. Wesia, yaakwa maku-a. ¹⁸ Vigi vikabuna yavyo vili he Kiumbi. Eetupatanishe nne haku-u salaghe kutahoiya Kristo, naho atupatiya huduma ya upatanisho. ¹⁹ Kwato nikuba, he Kristo, Kiumbi elipatanisha idi haku-u salaghe, si kutara makusa kini he vo. Erakeiya hakanu mburi ya upatanisho. ²⁰ Kwato tusaghurwa sa vawakilishi va Kristo, sa kuba ite Kiumbi eekwaye ebo-i rufaa ku-u kutahoiya nne. Tumusemba kune he mburi ya Kristo: "Mupatanishwe he Kiumbi!" ²¹ Em-bo-iye Kristo kukwa sadaka kwa mburi ya makusa Kanu. Uye ni-u huye tebo-iye makusa. Eebo-iye to nesa kubo-ika haki ya Kiumbi he uye.