¹ Kwato, kwaite tulo huduma yayo, na sahucho twaadoria rehema, tetupa-a swaho. ² Mira iji tuidoriye mbazi, tetupa-a swaho. Mira iji, twaalhi kwalhi kabuna ja susune naho jikumatuye.Tetuzoko he hila, naho tetubo-iiya kikusa kiome cha Kiumbi. He kuaija eya kweri, tuku-aija salaghe he dhamiri ya kira mhe mbele ja Kiumbi. ³ Mira kai injili kanu imatuike,imatuiwe he huvo tulaha. ⁴ He kusaghura kini, kiumbi wa he idi yalo aavalahatianya kuiliisha kini kusidarisha. Vizelijanya iji, tevekamuru kuaho luatame lwa injili ya unyakhare wakwe Kristo, huye ni mfano wa Kiumbi. ⁵ Kwaite tetukubirikira salaghe, mira Kristo Yesu se Dilao, na nne salahe sa vanyamalo kaghu kwa mburi ya Yesu. ⁶ Kwaite Kiumbi ni-u huye eeyoye, "Luateme luangaja kuli he kidughu." Eangaje he swaho kanu, kugu luatame lwa mi-iliisho ya unyakhare wa Kiumbi he umuruisho wakwe Kristo. ⁷ Mira tulo hazina yayo he vikolhe vya kilongo, nesa ite chi-ilike ite nguvu giru sha ya Kiumbi naho sio kabuna. ⁸ Tunyamarika he kira hali, mira tetufintwa. tUlo futo mira tetuhuwe ni kupa-a swaho. ⁹ Tunyamarishwa mira tetuhiri-iwe. ¹⁰ Ma-aze kabuna tuti-iye he misa kanu kigame chakwe Yesu, nesa ite uzime wakwe Yesu uahoike naho he misa kanu. ¹¹ nne tuata swaho ma-aze kabuna twaaguwe kuga kwa mburi yakwe Yesu, nesa ite Uzime wakwe Yesu uahoikane he misa kanu ya kiuhe. ¹² He mburi yayo, kigame chibo-i nyamalo za kanu, mira uzime ubo-i nyamalo za kanu. ¹³ mira tulo swaho huyohuyo ya mdarisho kuwesiana na hucho cheegodiwe: "Needumuishe, naho neeyoye." Nne naho tudarisha, na hucho iji turayo." tureile ite huye emfufue Dilao Yesu naho enetufufua nne hawe na-uye. ¹⁴ Ture-ile ite enetugera nne hawe nakune he kuata ku-u. ¹⁵ Kira kigi ni he mburi kanu nesa ite, he kadiri ya neema irahe he vahe vakumure, shukrani jitaho kuongejika he unyakhare wa Kiumbi. ¹⁶ Kwato tetuga swaho, hata kai kwa gana tua-alalu, Heza tutabo-iwe uku-a muaze hadi muaze. ¹⁷ He kipindi yacho kifuhi, manyamarisho yayo yesiyahi yetubo-i nne he mburi ya uazeto mgiru wa unyakhare utahoisha vipimo vikabuna. ¹⁸ Kwaite tetuwesia he vigi huvyo viahoikana, mira he vigi visiahoikana. Vigi vyo tumuru kuviaho ni vya madao bi, mira vigi huvyo visiahoikana nivya azeto na azeto.