¹ Akunja tena Jova avafufua famo na Kirisitu, jisakeri mpoongo jii yolii konto Kirisitu andikala bao ra kolomo re Jova. ² Riririkani mpoongo jiyoli,reki oririkana mpoongo ja njaa ya weero. ³ Chaafa mwakuya, namwikalo waanyu ovisiwe famo na Kirisitu kore Jova. ⁴ Mpeende Kirisitu ajonekana, hakaaka nawe mwikalo waanyu, nafo naanyu mojonekana kwaachwe kore olaulau. ⁵ Meekaaka jiteji mpoongo jire kore nsee kempero, zinaa, ochafu, weofera kevee, maririkano mavee, na lako, kaaka nayo ibada ya sanamu. ⁶ Nekwaajili ya mpoongo ya gadhabu ya Jova ekeendeja kore vaana vafafu va mato. ⁷ Nekwaajili ya mpoongo ijo nanyu mwatingoka navoo mokendikala na voo. ⁸ Hakaaka faafo lasima mosunche m,poongo ijo joonse. Yaani, gadhabu, fukufuku, ndirikano mbee, vitoki na ndoseka mbee jikesuma melomwi yaanyu. ⁹ Mokesedanganya nyee kwa nyee, chakwafara mosunyire utu wanyu wa kalii na mpoongo jaachwe. ¹⁰ Mwevekeye utu mofeya, ambao okejishiwa mofeya kore maarifa olinganya na mosananiya wa ora wa koomba. ¹¹ Kore maarifa aa, taariko Myunani au Myaudi, wendiwa na odera wendiwa, mosomi, na akare mosomi, motomwa, naakare motomwa, hakaaka Kirisitu ne mpoongo jonse kore vyonse. ¹² Kama vasolwi va Ijova, valaulau na vaanjwi, evekeri utu oreterere, otoolu na ovumilivu. ¹³ Eochiryi nyee kwa nyee. Eurumii kila monto na mwawachwe. Neja monto onuneka kore oonge, amovavarera kwa era mpoongo Monene avavarera nyee. ¹⁴ Kore ijo mpoongo jonse, movee na opendo, ambao nao okejisha cha okamilifu. ¹⁵ Otolu wa Kirisitu na ovadumere miyoo yanyu. Nechafa ya otolu eche ne mwamokwa kore movere omo. movee na okalamya. ¹⁶ Nampoongo ya Kirisitu yikale nyombi yaanyu kwa woore. Kwa otuu wonse efundishi na eshauri nyee kwa saburi, na nyembo ja moyi. Embi kwa kalamya miyoo yanyu kwa Ijova. ¹⁷ Nachochonse mokejisha, kore mpoongo au otomamya jishi vyonse kore riina ra Monene Yesu. Mofi kalama Ijova Baaba olokera wee. ¹⁸ Vaka, vanyenyekeyi valome vaanyu, ja kenfero ekendanjiwa ne Monene. ¹⁹ Nanyu valome, vaanji vaka vanyu, namokiseva vafombu kore voo. ²⁰ Vaana, vaterereri vazazi vanyu kore mpoongo jonse, nafo ekejefererya kwa Monene. ²¹ Vabaaba mokisevadomerya vaana vaanyu ili vakesetaloka na nyuma. ²² Vatomwa, vatereri vanene vanyu kore movere na mpoongo jonse, tere kwa oduma ya meeso neja vanjo vafurahishao tu, nekwa moo wa ochadi. Mofii Ijova. ²³ Chochonse mokejisha jishi kwa osumersa moyi wanyu kempero Monene na tere ja vanto. ²⁴ Omanya mokende kwamba osokera moje ntifi ya omilikaji osuma kore Monene. Ne Kirisitu Monene mokemotumikia. ²⁵ Mekaaka wowonse okejisha vikare terere osokaaje na otola okumu kwampoongo jikareterere ajishirye me nakemo opendeleo.