¹ Luvaha mbeho akyarera wathi ku hena mifiri ichie vandu vengi vauleka muitikijo na iivaria iarania ngoo tichilemba ² na mafundisho gha kingoma ghachefundishwa hena mongo na vunafiki. Thamiri tavo taghalutwa. ³ Vamuleghea iondoa na iya fijo Ruva afirumbia filighwe kwa ishukuru hena vaya vaitikijire na iimanya keni. ⁴ Kwa kuu kila kindo kirumbiwe ni Ruva ni kicha. Haghire kyeleghwaho kikamighuwa kwa ishukuru. ⁵ Kwa kuu kideeleshwa iiria kirero kya Ruva kwa itereva. ⁶ Kole findo fyo ukafivika mothia ya venyu lee, kwava mhiri ndima mcha wa Yesu Kristo. kwaku kundethitawishwa kwa firero fya muitikijo na mafundisho mecha kughaivaririe. ⁷ Mira hadithi ta kiithanga tifuriwe ni vakeku utileghe. Handu hakwe ukucheje hena kimruva. ⁸ Kwa kuu mathoethi gha mwiri ghafaa kadu, ira maisha gha ukiruva ni mecha kwa mambo ghoshe. Ghachitunza ahadi kwa maisha gha luvaha na ghaya ghachie. ⁹ Mburi ii ni yeaminiwa na kivie iirikiwe kabitha. ¹⁰ Kwa ku ni kwa thababu yo fuayavwasi na ihira ndima kwa bidii mnu, kwaku fughire ujathiri hena Ruva akei, ewe nighe mghekira wa vandu voshe mira dhaidi kwa vaitikijire. ¹¹ Ufirere na ififundisha findo fyo. ¹² Mndu wowoshe anandeluberesha ujana lwapfho. Badala yakwe uve mfano kwa vaitikijire hena kirero, lughendo, lukundo laminika na iela. ¹³ Mpaka nikicha uikae hena ithoma, ikanya na hena ifundisha. ¹⁴ Kunandeberesha thawadi ike voshi yapfho kuleinikiwe iiria vuroti kwa ivikiwa mavoko ni vaghothi. ¹⁵ Ufithare findofyo. Uishi hena fyo kimetha ileha yapho livonwe ni vandu voshe. Ulolie sana lughendo lwapfho na mafundisho. ¹⁶ Rua hena findofyo kwaku kwa ihira kwio kwakukira kweka na vaya vakyakuirania.