¹ Kirero ki ni kya keni: Kole mndu akyashigha ighemkia, akyalangwa ndima njicha. ² Henaikyo mghemkia ni mithari anava mndu welahwa. Nimithari ave mmi wa mka umwi. Nimithari ave wa kiringanyo, buthara aghire utaratibu mgheora, kana mghefunya. Aghire ngu yelosha. ³ Anava mgheirwa njafi, anava mghelwa ave mhoo, aghire mborere. Ni mithari anava mghefura matundu. ⁴ Kimvaie ivamkia vandu va kenyi kwakwe weka, na vana vakwe kimvaie iarania hena shima thoshe. ⁵ Kole mndu arakyairima imkia vandu va kenyi kwakwe weka, alilesha kwia ikanisa lya Ruva? ⁶ Anava mwamini msha, kimacha anagheghwa akakubaha akawa hewa inyanyiriwa thawia mvichwa. ⁷ Nithari aghire matumbi mecha, kwa voshe vake bwan'ga kinetha anaghecha akawa hena iraghwa na mdego wawia mvichwa. ⁸ Mashemasi, kwiokwio, mvashighwa vave mvanikwa matumbi ghavo. vanava vandu va firero fivi. vanatumia kyeirusha mnu. kana ighira ngwinw mbichwa. ⁹ Vairime ivwarilia ivona lyakwa icha lyia lya keni lya miirilie irughuliri we. ¹⁰ Vave kuvemirerewa kicha kwanza, halafu vairime ihirira kwaku varakyashaghwa. ¹¹ Vaka kwio kwio vave vaghire shima. vanava vaghelembetera. Vairime ikuwara, na iaminika kwa findo fyoshe. ¹² Mashemasi nimithari vave vamka umwi umwi. Vairime ivamkia vana vavo kindokicha nava kenyi kwavo. ¹³ Kwaku vaya vachihira kindo kicha naimkia kindo kicha na nguju naighera kwa nzinya hena mirikilie hena Kristo Yesu. ¹⁴ Nnaandika mambogha kwafwo, nnaririkana ifika kwafwo mifiri ya hawifi. ¹⁵ Mira nikava nindechelewa nnaandika kimacha mumanye funsu mwaghenda hena nyumba ya Ruva, ningeyo kanisa ya Ruva akei, mfighi na mgheghenja wa keni. ¹⁶ Wala haghire ngani ku keni ya Ruva ifunyirirwe ni ndue: "Alevonirwe hena mwiri akarerewa kicha na mbeho, akavonirwa ni malaika, akarerwa hena vaithanga, eaminiwa ni ithanga, na akaondolewa kaghu hena vurwe."