¹ Mumu hino kwa waka kupisika uwifu kwo ala wayii mwa Kristo Yesu. ² Pakuya torah ya Roho wa kulama mwa Kristo Yesu yikanikitiki ukamba pa torah ya sambi ni ya kifwa. ³ Pakuya kila torah nukuhotoleka kukikita, ndawa ya ulegelefu wake nyama, Mulungu, pa akantumiti mwana Mundu mwene pa kihwanakiso kya nyama yene sambi ni pa mihalo ya sambi, akayipisiti sambi uwifu. ⁴ Nausi kilondo kyake torah kimalakasike pa tenga, wakugenda lepa kwa ndingo wa nyama, koma kwa ndingo wa roho. ⁵ Pakuya wala kwa ndingo wa nyama waholalela findu fya nyama, koma wala kwa ndingo wa roho findu fya roho. ⁶ Pakuya maholo ga nyama gayii kifwa, koma maholo ga roho gayii urumi ni kindamba. ⁷ Ndawa Maholo ga nyama gayii mitumba nu Mulungu; pakuya nukuwikika lepa pasi pa torah ya Mulungu, haka kuhotola na kuhotoleka lepa. ⁸ Leka wala wa pa nyama wahotola lepa kunganisa Mulungu. ⁹ Koma Mwenga pa nyama, leka pa roho, wona Roho wa Mulungu ahwela pa mwenga. Koma woma mundu aliyepe nu Roho wa Kristo, uyu nukuya wake. ¹⁰ Leka wona Kristo ayii mugati mwa mwenga, mbili ufwii ndawa ya sambi, koma roho ayii wakulama ndawa ya ugolofu. ¹¹ Koma wona Roho wa yula akansyusiti Yesu pa wakufwa ahwela pa mwenga, uyu akansyusiti miwili yinu ya kufwilika pa Roho wake uyu ahwela pa mwenga. ¹² Mumu, walongo, tiyii ni misigiho, nukuya kwa nyama, kulama kwa ndingo wa nyama. ¹³ Pakuya wona mulama kwa ndingo wa nyama, Mulonda kufwa, Koma wona pa roho mugafwisa makitiko ga mbili, yamulame. ¹⁴ Pakuya woha awa walongoseka nu Roho wa mUlungu, wayii wana wa Mulungu. ¹⁵ Ndawa mukayupiti lepa roho ya uwanda kukila wukila woga, koma mukayupiti roho ya kukitika wana pa yila tikuwa, Abba, Dadi. ¹⁶ Roho mwene alasa ulangamakiso pamonga na roho witu, kukita tiyii wana wa Mulungu. ¹⁷ Ni wona, wakuyingila lipwela kawili, wakuyingila lipwela lyake Mulungu, ni wakuyingila lipwela pamonga ni Kristo, wona tifyuwana mahumbuso pamonga nuyombe, nausi tikwisike pamonga nuyombe. ¹⁸ Pakuya niwalanga kukita malumbuso ga lukumbi ulu nukuhotoleka kuhwanasika ni kukwisika kula yakufunukulike pa tenga. ¹⁹ Pakuya kwilindakisa kwa mapangiko kugalindalila mafunukuliko ga wana wa Mulungu. ²⁰ Pakuya mapangiko gakawikiki pasi pa mfuki wa waka, nukuya kwa kilondo kyake gene. ²¹ Koma pa luhala lwa yula akagawikiti pasi, kuhuwalila kukita mapangika genekawili yakakomboleke kuwuka pa uwanda wa kuwola kuyingila mu ukamba wa kukwisika kwa wana wa Mulungu. ²² Ndawa timanya kukita mapangiko goha gawuwula ni kwinionganionga pamonga mpaka hino. ²³ Leka nukuya iki kyakape, koma tenga kawili, wakuya ni fyakulosa fya Roho, tiwuwula mugati mwitu, kukulindalila kukitika wana, kukombolela ngani kwa mbili witu. ²⁴ Pakuya ni kihuwalilo, tikayokwiki, koma kihwuwalilo kyakuloleka nukuya kihuwalilo, ndawa nani akihuwalila kila akiwona? ²⁵ Koma wona tihuwalila kila tikiwona lepa, kwa luyumalakilo tikilindalila. ²⁶ Leka wiwila Roho kawili atwikila ulegelefu witu, pakuya timanya lepa kusali umu ngati linganili, Koma Roho Mwene apembesa pa mihalo ya tega ni mawuwulla ganga longaleka. ²⁷ Leka yula ayifumbula mioyo amanya maholo ga Roho, ndawa apembesa pa mihalo ya wawalala kwa ndingo wa Mulungu. ²⁸ Leka timanya kukita kwa wala wakungana Mulungu fyoha fihengelana pamonga kwa kinofu, kwa wala wakukemeleka kwa ndingo wa malango gake. ²⁹ Pakuya wala akawamanyi palongolo, wawa akawapatwili palongolo kuya wa ntundu kimonga-monga ni kishwanakiso kya mwana mundu, aye wa kiwele pagati pa walongo wa mahele. ³⁰ Na wala akawapatwili palongolo, wawa kawili akawakemili, na wala akawakemili, wawakawili ga kawagolwisi na wala akawagolwisi, wawa kawili akawakwisiti. ³¹ Kiki Mumu yatijowe pa findu ifi? Wona Mulungu atiyimalila, nani atipindika?. ³² Uyu nuyombe akannotiti lepa Mwana Mundu mwene, koma akamfumbukisi pa mihalo ya tenga tawoha, wuli nukutipele fya neema fyoha pamonga nako?. ³³ Nani yawapele wakuhagulika wake Mulungu mhalo? Mulungu ayii wakogoloseka. ³⁴ Nani yaapise uwifu? Kristo Yesu ayii uyu akafwili, ena mbanga uyu akasyusiki pa wakufwa, uyu atama pasi pa kiwoko kya kulila kya Mulungu, nuyombe kawili apembesa pa mihalo ya tenga. ³⁵ Nani yatipatule pa kiganano kyako Kristo? ³⁶ ati lihumbuso pangi lifinyikiso, pangi kuhyunga, pangi njala, pangi utupu, pangi ulugu pangi upanga? Umu yilembekili ga kudumulika." ³⁷ Koma pa ifi fyoha tihotwili kulutalila, pa yula akatiganiti. ³⁸ Pakuya nimanyila ngani kukita haka kifwa haka kulama, haka wamalaika, haka wene chengo, haka findu fya apa, haka findu fiyii mu kujicha, haka makakala. ³⁹ Haka pakukweseka munani, haka kina kyakugenda kusi, haka kyakupangika kiyi kyoha, yakihotole lepa kutipatula pa kiganano kyake Mulungu, kila kiyii pa Kristo Yesu Bambo witu.