¹ Ni pala akakidindwili kyakukomelela kya saba, kikayili kinunu kunani ngati nusu ya saa. ² Ni nikaweni wakamalaika saba wala wayima palongolo pa Mulungu; ni sikapelakiki kwake mbata saba. ³ Ni malaika yungi akachiti ni akayimakisi kugainamila mathbahu, wakuya ni kiwiga kya lubani kya Zahabu; ni yikapelakiki kwake lubani yingi, nausi ayipeleke kuyonjakesa pa maluwo ga wawalafu woha gala gayii panani pa mathbahu ga Zahau gayii palongolo pa kitihu kya utwa. ⁴ Ni likakweliti lyosi lya lubasi, pamonga na maluwo ga wawalafu, pa miho ga Mulungu kipitile pa kiwoko kya Malaika. ⁵ Ni malaika akitola kiwiga kya lubani: ni akakimemisi nu mwoto kipitile pa mathbahu, ni akakitumalili mu ndima, ni sikapatiti kuya mbamba sya kuwuluma, ni njwawila, ni mbamba sya kumulika, ni kinyukunyuku. ⁶ Ni wakamalaika awa saba wakuya ni mbata saba wakayiwikili ngai wakuwe. ⁷ Ni wakutumbula akakwiti mbata, ni fikapatiti kuya baho fula ya maganga nu mwoto, wakuhasanga na nu mwasi, ni fikalekelakiki mu ndima; ni lilundu lya kudatu hya ndima likatinyasiki, ni lilundu lya kudatu lya mikango likatinysiki, ni linyasi lyoha liwisi, likatinyasiki. ⁸ Ni Malaika wa kawili akakuwiti mbata, ni ngati kidunda kikulungu kya kutinyika nu mwoto likalekeliki mu nyanja: ni lilunda lya kudatu lya nyanja likapatiti kuya mwasi. ⁹ Ni likafwili lilundu lya kudatu lya fyakupangika fyamu nyanja, fila fyakuya nu wyumi, ni lilundu lya kadatu lya magalawa likayanangiki. ¹⁰ Ni Malaika wa kadatu akakuwiti, ni lukagwili lutondo lukulungu kipitile kunani, lwakutinyika kihanakiso kya mwenge, ni lukagwili pa lihundu lya kudatu lya mikuku ni pakulapukila machi. ¹¹ Ni lihina lya lutondo hula lukemeleka Absintho; ni lilunda lya kadatu lya machi likapatiti kuya Absintho: na wandu wingi, wakafwili pakuya machi gala, pakukita gakawawasiki. ¹² Ni malaika wa ncheche akakuwiti mbata, ni lilundu lya kadatu lya lijuwa likaliwatiki, ni lilundu lya kadatu lya mwesi; ni lihundu lya kadatu lya ndondo; nausi lilundu lya kadatu lya isi lilekalike lwisi, ni musi usilasika pa kwelu lilundu lyake lya kadatu, ni kilo wiwilawila. ¹³ Ni nikaweni, ni nikayufwini kupungu, yiwuluka pangati pa nyingalilo, kujowa ni njwawila nguhungu, yoyo, yoyo, yoyo, kwa wala wakuhwela pa ndima, kwa ndawa ya njowelo, sya kusigala sya mbata sya wakamalaika wakadatu wala nawombe wako nukukuwa.''