¹ Ni nikaweni pala mwana ling'osi akadindwilli kyakukomelela kimonga kya fila saba, ni nikayufwini njowela ya kyakulama kimonga kya fila ncheche, ni kajoweko ngati mbamba ya kuwuluma yicha. ² Ni nikaweni, lola farasi yiwalafu. nu uyu wakutama panani pake akayili ni upindi ni kikupiku kikapelakiki kwake, ni akapititi wakuhotola ni kwa kuhotola. ³ Na pala akakidindwili kyakukomelela kya kawili, nikayufwini kya kulama ni kujowa yicha. ⁴ Ni ikapititi Farasi yingi, yikele, ni kwa uyu wakutama panani pake kukapelakiki kuyupa kindumba pa ndima, ni nausi wakomane yungi nu njini, ni ukapelakiki kwa yombe upanga ukulungu. ⁵ Na pala akadinwili kyakukomelela kya kudatu, ni kayufwini kya kulama kya kadatu ni kujowa, yicha. wakutama panani pake akayili ni kipimo pa kiwoko kyake. ⁶ Ni nikayufwini ngati njowelo pagati pa fyakulama ncheche iyi yijowa, kiheneko kya ngano kwa denario yimonga, ni fiheneko fidatu fya shairi kwa denario yimonga; ni ukotoke kwa yombe kuyananga mafuta nu mvinyo. ⁷ Na pala akakindindwili kyakukomelela kya ncheche, nikayufwini njowela ya kyakulama ncheche ni kujowa, yicha. ⁸ Ni nikaweni, ni lola, Farasi yitololo; nu uyu wakutuma panani pake, lihina lyake kifwa: ni pandu pa mahoko pakankisiti yombe. Ni kikapelakiki kwa wombe chengo pa lilundu lya pa ncheche lya ndima, kukoma nu upanga, ni pa njala, ni pa kufwa, ni pa kimpetupetu, ni pa filungu fya ndima. ⁹ Ni pala akidundwili kyakukomelela kya mhano, nikaweni pasipa Mathbahu mawuni ga wala wakakomiti kwa ndawa ya lilowe lyake Mulungu, ni kwa ndawa ya ulungamakiso uwu wakayili nawo. ¹⁰ Ni wakakwiti ni njowelo ngulungu, kujowa, mpaka ndali Bambo, mbalafu ni wa chakaka chakaka, upaula lepa ni kulipisa mwasi witu pa wala wakuhwela pa ndima?. ¹¹ Ni ukapelakiki kwa ayi wa wombe, mwingila uwalafu; ni kukajowiki kwa wombe kukita ngawa pumulili kawili huti, mpaka apa wawanda wayawe na walongo wawe, wala yawakomeke ngati wombe kawili wafwilasike. ¹² Ni nikaweni pala akadindwili kyakukomelela kya sita, ni kikayili kinyukunyuku kikulungu: ni lijuwa likapatiti kuya lipili ngati likong'ondo lya lwangi, ni mwesi wa mfilimilaukakititi ngati mwasi. ¹³ Ni ndondo sya kunani sikayili mu ndima, umu nkuyuupuluputikila mbiki syake, wakudigisika ni mbepo ngulungu. ¹⁴ Ni kanani kukapatukini ngati kitabu pa kuniengeka ni kidunda kiyi kyoha ni kilumba kikawusiki kipitile pandu pawe. ¹⁵ Ni watwa wa ndima, ni wakupelewa chengo, ni wakulungu wa Maelfu ni wakafi, ni wa makakala, ni mbanda ni nkamba ayi yoha wakwifihiti pa makolo ni pa maganga ga pa fidunda. ¹⁶ Ni wafijowela fifunda na maganga, maguwe panani pa tenga ni kutifiha pa kyene kya uyu wakutama pasi pa kitihu kya kiutwa, ni pa kudada kwake mwana ling'osi. ¹⁷ Pakuya lifikili ligono likulungu lya kudada kwake: nu nani ahotola kuyimasika ngani?