¹ Ni kwa Malaika wa kanisa lya pa Sardis ulembe Aga ajowa uyu ayii ni Roho saba sya Mulungu, nu ndondo saba. Nimana Makitiko gako, kukita uyii ni lihina kukita ulama, ni uyii wakufwa. ² Uye wakutama miho ni ufitamise ifi fisigala, fila fika londiti kufwa; pakuya nikalolili lepa Makitiko gako gakufwilanila palongolo pa Mulungu wangu. ³ Mumu ukumbukile umu ukayupiti ni umu ukayufwini ni ufigohe ni kupela. ⁴ Mumu wona ulema kutama miho, yanihiche ngati mwifi, ni yaumanye lepa saa wuli yanihiche pako. ⁵ Uyu wakuhotola wiwila yafwikike ni mingila miwalafu ni yanisimise lepa lihina lyake pa kitabu kya kulama ni yanilifumbule lihina lyake palongolo pa Dadi wangu, ni palongolo pa wamalaika wake. ⁶ Uyu ayii ni lukutu, ayufwe iki Roho agajowela makanisa. ⁷ Ni kwa Malaika wa kanisa lya pa Filadelfia ulembe, Aga ajowa mbalafu, wa chakaka, uyu ayii ni funguo ya Daudi; uyu adindula ni payilpe wakudinda, ni adinda ni payilepe wakudindula. ⁸ Nimanya makitiko gako (lola, nipeliki palongolo pako ndyango ndinduliki, uwu payilepe wakuhotola kuundinda) kukita uyii ni mbafu nyoko, ni ukaligohiti lilowe lyangu, ni ukalikaniti lepa lihina lyangu. ⁹ Lola, nipeleka wa pa sunagoge lya shetani, wala wajowa kukita wayii wa Yehudi, ni wayilepe, koma wadeta lola, yaniwakite kuhicha ni kugwilakimbo palongolo pa njayo syakeo, ni kumanya kukita nikuguniti. ¹⁰ Pakuya ukaligohiti lolowe lya kwisinga kwangu, nenga nani yanikugohe pa saa ya kugeseka, iyi yilonda kuhica pa ndima wa mfilimila, kuwagesa wala watamasika bahapa pa ndima. ¹¹ Ni hicha nyati; kikangamakile iki uyii nakyo, nausi mundu asinyaka kikupiku kyako. ¹² Uyu wakuhotola, yaninkite lipanda pa hema ya Mulungu, wangu ni yapite kawili lepa kunja kuku: ni yanilembe pa yombe lihina lya Mulungu wangu ni lihina lya likaya lyangu Mulungu wangu, Yersalem wa hina, uwe uselela kipitile kunani kuhuma pa Mulungu wangu, ni lihina lyangu lila lya hino. ¹³ Uyu ayii ni likutu ayufwe ikio Roho agajowela makanisa. ¹⁴ Ni kwa Malaika wa kanisa lya pa Laodikea ulembe, Aga ajowa Amen, ndungumakiso wakukeleka ni wa chakaka kuitumbula kwake mapangiko ga Mlungu. ¹⁵ Ni manye makitikiko gako, kukita uyii nukuya wakusisima haka wakuwila, mbanga ngauyili wakusisima pangi wakuwila. ¹⁶ Wiwila pakuya upyupa wako, nukuya wakusisima nu kuya wakuwila, nilonda kukutapika pa ndomo panu. ¹⁷ Pakuya ujowa, nenga nkafi, ni nitopela, ni nakulemeka kandu: ni umanya lepa kukita uyii wakuhumbusika ni wakulonda lipyana, ni ngaju ni wakukoyoka miho ni wa ukengele. ¹⁸ Nikupangila lahala uhemele kwa nenga Zahabu yakuguyulika nu mwoto, nausi uye nkafi, ni mingila miwalafu nausi wifwatike, ni lihamu lya ukengele wako lisiwoneka pa lulanga: ni mitenda kubakasa miho gako, nausi ulole. ¹⁹ Woha awa niwagana, niwakila ni kuwayaumbulisa, mumu ukite ukiki ni kupela. ²⁰ Lola niyima pa ndyango ni kukungunda, mundu wona ayufwane njowelo yangu ni adindula pa ndyango, yaniyingile kwake, ni yamilye nuyombe pamonga nu nenga. ²¹ Uyu wakuhotola yanimpele kutama pasi pamonga nu nenga pa kitihu kyangu kya kiutwa, umu nenga nani nikahotwili, ni nikatamili pasi pamonga nu Dadi wangu pa kituhi kyake kya kiutwa. ²² Uyu ayii ni likutu, ayufwe, iki Roho agajowela makanisa.