¹ Ni nikayufwini njowelo ngulungu kipitile pa hekalu kuwajowela wakamalaika saba wala, mubitaye ni kufipungulila fisayi saba fya kudada kwake Mulungu kiyingalile pa ndima. ² Ni akalutiti wakutumbula ni akapungulili kisayi kyake kiyingalile pa ndima; ni kikapatiti kuya kilonda kiwifu ni kya usokosi pa wandu wakuya ni kiwalalilo kya kilugu kila, ni wala wakugwilakimbo kifwilifwili kyake. ³ Ni wakawili yula akapungulili kisayi kyake kiyingalile pa nyanja , ni kikapatiti kuya mwasi ngati mwasi wa mfwili nu wumi uyi woha ukafwili, fifi fila fya mu nyanja. ⁴ Ni yula wakadatu akapungulili kisayi kyake kigingalile pa mikuka ni pakulapuka pa machi, kikapatiti kuya mwasi. ⁵ Ni nikayufwini malaika wa machi ni ajowa, wakugoloka wenga, uyu wakuya ni uyu akayili baho, mbalafu ndawa ukapawili wila. ⁶ Pakukita wakapungwili mwasi wa wawalafu ni wa wakulweta, nu mwasi ukawapelakili wanywe wakulinganila wayii. ⁷ Ni nikayufwini masabahu kujowa, ena Bambo Mulungu, mwene mbafu syoha, ga chankaka ni ga ugolofu mapaulo gako. ⁸ Ni wancheche akakipungwili kisayi kyake pa lijuwa ni kukapelakiki kwake kuwawawula wandu nu mwoto. ⁹ Ni wakawawuliki wandu nu mwoto ukulungu, ni wakalikitili lihana lya Mulungu bulesifemiya uyu ayii ni chengo panani pa mitowo iyi, ni wakapeliti lepa kumpela yombe kukwisika. ¹⁰ Ni yula wa muhano akapungwili kisayi kyake pa kitihu kya kilugu; ni utwa wake ukalekaliki lwisi; ni wakalumiti nimi syawe kwa ndawa ya kuwinisa. ¹¹ Ni wakankitili Mulungu wa kunani bulesifemiya kwa ndawa ya mawiniso gawe ni filonda fyawe; ni wakaleliti lepa kugaleka makitiko gawe. ¹² Ni yula wa sita akapungulili kisayi kyake pa nkuka ukulungu Efulati; ni gakuyumasika machi gake, nausi yiwikile ngani ndila ya watwa wala wahuma pa kipita lijuwa. ¹³ Ni nikaweni kipitile pa ndomo pa liyoka likulungu, ni kipitile pa ndomo pa kilugu ni kipitile pa ndomo pa wakulweta wa mageya, roho sidatu sya wafu, ngati manyoto. ¹⁴ Pakuya siyii roho sya madaimoni, sikukita fiwalalilo isi sipita kunja mpaka kwa watwa wa ndima woha, kuwawunganisa pamonga kiyingalile pa ngondo ya ligono lila likulungu lya Mulungu, mwene mbafu syoha. ¹⁵ (Lola, nihicha ngati mwifi wakusengwa uya aya miho, ni afigoha fifwato fyake, nausi asigendagenda wa ukengele, ni walolalela lihamu lyake.) ¹⁶ Ni wakuwunganisa wala pamonga pandu pakemeleka pa Kihebulaniya Hali-Mgedoni. ¹⁷ Ni yula wa saba akapungulili kisayi kyake pa nyngalila ni yikapititi njowelo ngulungu pa hekalu, pa kitihu kya kiutwa, kujowa gakitiki. ¹⁸ Ni ikayili mbamba sya kumulika, ni manjowelo, ni mbamba sya kuwuluma; ni kikayili kinyukunyuku kikulungu, kya ntundu wula kikayili lepa kitumbulile pala wandu wakayili pa ndima. ¹⁹ Ni likaya likulungu likagawiki pa malundu gadatu na makaya ga mihuku gakagwili, ni Babeli ukulungu ukakumbukuliki palongolo pa Mulungu, kuupela ntimbo wa mvinyo wa makeko ga kudada kwake. ²⁰ Ni kilumba kiyii kyoha kikakimbili, ni fidund fikakolaliki lepa. ²¹ Ni fula ngulungu ya maganga ngati talento pa kutopalela kwake iselela kihumile kunani pa wandu; ni wandu wakankitili Mulungu bulesifemiya kwa ndawa ya ntowo wa fula ya maganga; pakuya ntowo wula uyii ukulungu muni.