¹ Ni nikaweni kiwalilo kingi kunani, kikulungu ni kya kukangachisa, wakamalaika saba wayii ni mitowo saba, ya kumalakisa pakukita pa ayii gamalakila na ngani kudada kwake Mulungu. ² Ni nikaweni ngati nyanja ya lilolelo yakutumbulila ikanya nu mwoto na wala wakuhotola kipititile pa kilugu ni pa kifwilfwili ni pa kawalangika ka lihina lyaje, wayima pa nyanja ya lilolelo wakuya nayo mihawala ya Mulungu. ³ Ni wayimba nyimbo ya Musa mbanda wa Mulungu ni nyimbo ya mwana ling'osi, kujowa, Makulungu, Mwene mbafu syoha, syakugoloka ni sya chakaka chakaka ndila syako, wenga mutwa wa miaka. ⁴ Nani nakuyogopa, Bambo, ni kulikwisia lihina lyako? pakuya wenga wakape mbalafu; ndawa mihuku yoha yayihiche ni kugwila kimbo palongolo pako; pakuya makitiko gako ga ugolofu galasiki pa kwelu. ⁵ Ni panyuma pa ifi nikaweni, ni ikadinduliki hekalu uya hema ya ulungamakiso kunani. ⁶ Ni wakapititi pa hekalu wakamalaika wala saba awa wakayili ni mitowo saba, wakufwatakiwa ni liganga lya uhemisi, lya kuguyulika ni lya kung'anyima, ni wakukwikungila mipango ya sahabu pa fifimba fyawe kisyungutilile. ⁷ Ni kya kulama kimonga kya fila ncheche akawapili wakamalaika saba fisaya saba fya sahabu fyakumema na kudada kwake Mulungu wakulama kwa miaka ni miaka. ⁸ Ni hekalu yakamemasiki ni lyosi kipitile pa kukwisika kwake Mulungu, ni pa mbafu yake ni pawaka mundu akahotwili kuyingila pa hekalu, mpaka mitowo saba ya wakamalaika saba yayimalakasike ngani.