¹ Pu Festo ahinjila mwijimbo ilwo wezyashila insiku zitaatu ahabhala kufuma Kaisaria paka Kuyerusalemu. ² Umuputi umusongo uwabhayahudi wamanyishile bhahaleta uwuyanzi wu Paulo abhombile u Festo, nabhanjoli kumaha kwa Festo. ³ Pe bhamulabhile Festo amwavwe kushila imbembu zya Paulo awezye kumubhilishila Kuyerusalemu inga bhalwezye kumugoga mwidala. ⁴ Ileelo u Festo ahagalusya ahanti u Paulo akungilwe ku Kaisaria, na kuti wuyo mwene ahayiduga ukwa nalubhilo. ⁵ Ahalonga, "Kwe kunti bhala bhebha kuwezya bhawezizye kubhala ukwo nitwe. Anga kuli ahandu ahabhibhi kwa mundu unu, mukwanzilwa kumusitaka." ⁶ We ayihala insiku naane awe ishumi nakushila, ahaduga ku Kaisaria. Pe isiku lwe lihafwaata ahihala mwitengo ilya wulonji nakwamula kunti bhamulete u Paulo kukwakwe. ⁷ Weafiha, Abhayahudi kufuma Kuyerusalemu bhahimilila paapipi, bhahafumwa amanoongwa aminji amamwamu ge bhatawe zizye kugamanya. ⁸ U Paulo ahalamba ahanti,'Te kuti Bhayahudi dihaa, awe ishibhanza, neteku Kaisaria, imbombile imbibhi.' ⁹ Ileelo u Festo ahantinji ayilolesye Kubhayahudi, panapo amugalusya u Paulo na kulonga, 'Awe ukwanza kubhala Kuyerusalemu na kulongwa nine kumambo azagana ukwo?' ¹⁰ Paulo ahalonga, ikwimilila pilongolela pitengo ilya wulonji ilya Kaisari ipo ikwanzilwa indongwe, itabhakoseye Abhayahudi, anziwe shu manyile ahinza. ¹¹ Ingi kosile nangi mbombile lyeli kwanzilwa kufwa, Itakuhana kufwa. Ileelo anga kulongana kwabho tehandu, numo umundu watanga mbiha kukwabho ingumulabha u Kaisari.' ¹² We u Festo kulonga ni balaza ahagalusya, "Kumulabha u Kaisari; utibhale kwa Kaisari." ¹³ Winsiku zimo zyashila, umweene Agripa nu Bernike bhahafiha ku Kaisaria kubhomba kuyata yoli kwa Festo. ¹⁴ We ayihala ipo insiku inyinji, u Festo ahatwala inongwa ya Paulo kwa mweene; Ahalonga, 'Umundu weka asyalile ipa nu Feliki anganti mufungwe. ¹⁵ Wenali Kuyerusalemu abhapiti na zehe abhabhayahudi bhaletile amanongwa iga mundu unu ku kwaani bhope bhehabhuzilizya ulonji wakwe. ¹⁶ Kulili ine ihabhagalusha kuntile mwata yabhaloma kumufumwa umundu kwa kwenya wetewuyo watulile akuanzilwa kubha ni nafaasi kubhalema bhebha musitakile kulama kuzye atulile izyo. ¹⁷ Ileelo, webhinza peeka ipa, intaha wezya kugulila, ileelo isiku lyelihafwaata nihaye mushitengo isha wulonji nakumu umundu uyo bhamule muhanti. ¹⁸ We abhasitaki webhimilila na nakusitaka, kunti kutali nakumusitaka apapiti ge bhalitile kushila awene. ¹⁹ Peepanapo bhali nikazyo zimo peeka nawo kunongwa yikanisa yabho na kunongwa ya Yesu we amali afuye, ileelo u Paulo aweene akunti mwinzabhuulo. ²⁰ Namile bhasulishile kufwatalila ili, pe hamubhuzilizya anga bhalaga Kuyerusalemu kuloongwa ku mambo iga, ²¹ Ileelo u Paulo we bhamubhilishila bhamubhishe pansi alindwaji kunongwa ya wamulo wa mweene, amuye bhamubhishe papa pihamutwale kwa Kaisari.' ²² U Agripa alonjile nu Festo, "Nayigani awinza kumutejeelevwa umundu unu." " UFesto, ahalonga, "Indabhi uhayimutejeelevwa." ²³ Ipo indabhi yakwe, Agripa nu Bernike bhafishile na kusha ukwinji; Bhafishile muwukumbi nabhasongo abha masinjala, na bhandu bhebhamanyile pahaya, pe wu Festo afumwa uwamulo u Paulo bhamuleta kukwobho. ²⁴ U Festo ahalonga, "Mweene Agripa, na bhandu bhondi bhebhali ipa peeka nitwe, mukumulola umundu unu imbali yondi na Bhayahudi bhondi ukwo Kuyerusalemu nipa awinza bhakwanza imbapazye, na bhope bhaha homa ishongo kukwani kunti atadilaje. ²⁵ Pihalola kunti atabhombile ingalyeeka lye likwanzilwa afwe; ileele kwe kuti pa mubhishila umweene, ihamula kumutwala kukwaakwe. ²⁶ Ileelo indali nahandu ahakulosya hindi simbe kwa mweene, kwe kunti ili, imuletile kukwaho, alelo kukwaho iwe, umwene u Agripa, ingi naje imbe nahandu iha kusimba kulolesya inongwa. ²⁷ Kwe kunti nalola itali ni maana kumutwala umukungwe we utalolesizye insitako zyezimulemile.