¹ Lwezashila izi inkenya abhahabhizya bhane bhimiliye kukona zine izya nsi, bhadindiye impepo zine izya nsi ku maha pekuti yikuvugula mukasi munsi, pamwanya ya minzi pamo pansi yikwi lyolyonti. ² Inkenya uhabhabhizya uwunji ahinza kufumila kubhutukulo, amali nishimanyilo sha Mulungu we mulanzi. Ahalila kwizwi ipiti kubhahabhizya bhane bhebhapelilwe amaha agakunanganwa insi na minzi: ³ "Mutahananganwe insi, aminzi, pamo ikwi paka petwinza twabhiha ishimanyilo mukasi pansi ya matwe gabhabhomvi wa Mulungu witu." ⁴ Ikivwa ulubhazyo lwabhala bhebhabhishilwe ishimanyilo: 144,000, bhebhabhishilwe ishimanyilo kufumila munkolo ya bhantu Bhaiziraeli: ⁵ 12,000 kufumila muluho lwa Yuda bhabhishilwe ishimanyilo, 12,000 kufumila inkolo zya Rubeni, 12,000 kufumula munkola ya Gabi. ⁶ 12,000 kufumila munkolo zya Asheri, 12,000 kufumila munkolo zya Naftali, 12,000 kufumila munkolo munkolo zya Manase. ⁷ 12,000 kufumila munkolo zya Simoni, 12,000 kufumila munkolo zya Lawi, 12,000 kufumila Isakari, ⁸ 12,000kufumila munkolo zya Zebuloni, 12,000 kufumila munkolo zya Yosefu, na 12,000 kufumila munkolo zya Benjamini bhabhishilwe ishimanyilo. ⁹ Lwezashila izi pekwamile, nu bhwinji ubhupiti bhwebhutalipo umuntu amabhondeye kubhubhazya - kufumila munsi yonti yila, inkolo, abhantu, ninjango -bhimiliye pilongolela yitengo lya mwene na pilongiolela lya mwanangole. Bhazwaye inkazu inzelu na bhana bhatusamba twanamachinda munyobhe mumwabho, ¹⁰ pe bhamile bhahaholelaga kwizwi lya pamwanya: "Ubhuposhi kwe kwa Mulungu weatendime mukasi mwitengo lya shimwene, na kumwana wangole!" ¹¹ Abhahabhizya bhonti bhebhamile bhimiliye kuzyungulila itengo lya shimwene nukubhazungulila abhasongo poka nabhala abhabhulanzi bhane, bhahinamila pansi pantope pebhahabhiha ivweni vwabho pamwanya yintope pilongolela lwitengo lya bhumwene bhala bhahamushindiha Umulungu, ¹² bhahayanga, "Amen! Ulushindiho, ubhumwamu, injele, ulusalifwo, umushinzi, uhondeye na maha vibhanje kwa Mulungu witu shima na shima! Ameni!" ¹³ Pe woka mubhala mubhasongo ahabhuzyilizya, "abha bhebhananu bhebhazyaye inkanzu inzelu, pe bhafumuluye kwi? ¹⁴ Inkamubhuzya, "Umwene umupiti, umanyiye wenewe," pe ahati, "Abha bhebhala bhefumile mukasi mumayimba amapiti. Bhazihandile inkanzu zyabho nukiubha nzelu mwibhanda lya Mwana wa ngole. ¹⁵ Panongwa ino, bhali pilongolela lya shitengo sha bhumwene sha Mulungu, pe bhakumutima uwene ubhusiku nu musanya mukasi mushibhanza shakwe. Uwene we atendime pamwanya pashitengo sha bhumwene alibhazenjelela ulubhaga lwakwe pamwanya papabho. ¹⁶ Bhataliyenyaga inzala nalumo, pamo ishumilwa nalumo,. Nizubha litalibhoshaga pamo, ubhutushizu ubhwa kosha (kulunguzya). ¹⁷ Kwekuti Umwana wa ngole wealipakasi pashitengo sha bhumwene alibha mudimi wabho, pealibhalongozya mumbwibhwi ya minzi ga bhulanzi, nu Mulungu alilondola insonsi mukasi mu minso gabho."