¹ Lwe zyashila izi inkamwenya uhabhizya uwunji ahiha pansi kufumila kumwanya. Uwene amali na maha amapiti, ni nsi yihamwa kubhumwamu bhwakwe. ² Ahalila kwizwi ipiti, ahati, "Uguye, uguye, yila inkaya impiti Babeli! Winzile wabha bhuzilo yabhutendamo bhwa nkungu, nubhuzilo bhwa bhutendamo bhwa yonti yila impepo inyazu, pe bhuzilo yabhutendamo bhonti ubhunyazu ni viyunyi akuhalalizya. ³ Kwekuti inkaya zyonti zimweleye ivihola vwa vinyonwa ya bhwamala bhwakwe bhwe bhukumwizila ubhuhalazu. Abhamwene bha nsi bhabhembushile nawope. Abhakukazya bhinzile bhabha bhebha dumbwe ku maha gabhulanzi bhwakwe nu bhunanjisu bhwakwe." ⁴ Pe kivwa izwi ilinji kufumila kumwanya lihati, "Yepaji kukwakwe bhantu bhane, inga pe mutahinze mubhombe mukasi mumbibhi zyakwe, na inga pe mutahinze muposhele inkomo yakwe yoyonti yila. ⁵ Imbibhi zyakwe zilundinkine pamwanya inzavwe mwanya, nu Mulungu agakumbusile imbombo zyakwe imbibhi. ⁶ Mulipaje inzavwe amabhalifile abhanji, pe mumulipe ulwa bhubhili inzavwe abhomvile; mukasi mushikombe sheasanginye, musanganizizye ulwa bhubhili panongwa yakwe. ⁷ Inzavwe ashindikililwe uwene wuyo weka, pe ahatendamaga kubhunzi, mupanje amayimba aminji nu bhusulumanye. Kwekuti akuyanga mumwoyo mumwakwe, 'Intendime inzavwe mulongozi; pamo te mufwile, ntaliyenya shililizi.' ⁸ Penga lumo mukasi munsiku lyoka inkomo yakwe zilimumwamila: ifwa, nishililizi, ninzala. Viliyoshelwa nu mwoto, kwekuti Umupiti Umulungu we mwenesho wamaha, we mwenesho mulonzi wakwe." ⁹ Abhamwene abha nkaya bhebhabhembushile nu nkulunkana poka nawo bhalilila nukulosya lwebhenya ilyosi nukulungulila kwakwe. ¹⁰ Bhaliyimilila pabhutali nawope kwailoga lya bhubhavu bhwakwe bhakutimm "Muhosi,muhosi munkaya impiti, Babheli, insi ya maha! Kuhabhalilo hoka ubhulonzi bhwaho bhwimza." ¹¹ Abhakukazya abhansi mululaje nukulosa panongwa yakwe, kwekuti atalipo mawumo weakazile ivimtu vwakwe sona - ¹² ivintu vwa zahabhu, ihela amabhwe ga pamwanya, lulu, kitani umwinza, zambarau, Inyororo, ishemamu, ni vinji vwonti ivwa makwi iya hanunsi ahinza, na shoshonti ishililo isha nzovu, na shonti ishililo sheshigomvilwe kumakwi aga mutengo, shaba, ishijela, ibhwe, ¹³ mudalasini, iviluminsanye, ukusushizya, manemane, ubani, ishihola, amafuta, ubhusu ubhwinza, ingano, ing'ombe ni ngole, farasi na magari moto, na bhasundikwa, na moyo gabhantu. ¹⁴ Ivihomwa vyewanonizye kumaha gaho gefile kufumila kukwaho. Ubhunyazu bhwaho bhwonti namalubha gefile, gataliloleha nalumo. ¹⁵ Abhakukazya abha vintu ivi vwebhahavwaga ubhwa dumbwe mukwanza kwakwe bhaliyimilila kubhutali kufumila kukwakwe panongwa lwa lunyilo ya bhubhavu bhwakwe, bhakulila kwizwi lya shililizi. ¹⁶ Bhakuti, "Muhosi, muhosi nkaya yila impiti yeuyizwalizizye kitani umwinza, zambarau, na mashemamu, na malubha kuzahabu, nivintu vwa pamwanya nu lulu!" ¹⁷ Mukasi muhabhaliizyo hoka ubhwadumbwe bhwonti ubhwo bhuliyepa. Wonti umulongozi wa meli, yonti muminzi, na bhonti bhebhakulema, na bhonti bhebhakubhomba imbombo paminzi, bhahimilila pabhutali. ¹⁸ Bhahalila lwebhenya ilyosi nu kulungulila kwakwe. Bhahati, "Pe nkaya yoni yeyikulingana ni nkaya ino impiti?" ¹⁹ Bhahasumbila isuto kumwanya ya matwe gabho, pe bhahalila, pe bhahafumwa na mansonzi ni shililizi, "Muhosi, muhosi nkaya impiti ponti pala bhebhamile ni meli zyabho paminzi bhamile bhebhadumbwe kufumila ni vwuma vwakwe. Muhabhalilozyo hoka ahalobha." ²⁰ "Museshelaje papakwe, imwanya, imwe bhasubhaliliwa, bhapositili, na bhakubhwi, kwekuti Umulungu alesite ubhulonzi bhwinyu papakwe!" ²¹ Uhabhizya uwa maha ahalibhusya ibhwe inzavwe libhwe lipiti lyakusyela peahalisumbila paminzi, ahati, "Kwidala ili, Babeli, yila inkaya impiti, yilisumbilwa pansi kwakuyinvwa na utaliloleha nalumo. ²² Izwi lya magitala, bhebhakwimba, bhebhakulizya filimbi, ni shaji bhataliyivwa nalumo kukwinyu. Pamo umumanyi wontu wula ataliloleha kukwinyu. Pamo izwi lya hatuli litaliyivwiha nalumo kukwinyu. ²³ Ubhuzelu bhwa nyale bhutalilama mukasi yaho. Izwi lya mwene bhwinga nu mwene kuzinjiliwa litaliyivwiha nalumo mukasi yaho, she abhakukazya bhaho bhebhamile bhapiti bhansi, na bhamunsi, bhalumilwe ilenga kubhulozi bhwaho. ²⁴ Mukasi yakwe ibhanda lya bhakubhwi na bhasundikwa yihaloleha, ni bhanda lya bhonti bhebhafuye pamwanya ya nsi."