¹ Pe alipo u farisayo we izina lyakwe wu Nikodemo, woka wabhapiti wa bhulonzi bhwabha yuya. ² Umuntu uno ahamjendela Umwene Uyesu ubhusiku pe ahambhuzya, ''Mwene, tumanyile ukuti we msambilizi kufumila kwa Mulungu, kwekuti atalipo nawumo we angabhomba izi zyonti Umulungu inga atali nawope.'' ³ Uyesu ahamtamla, ''Subhila, Subhila, umuntu atangabhwezya kwinjila mu bhumwene bhwa Mulungu ingaatapapwa ulwa bhubhili.'' ⁴ Unikodemo ahayanga,'' Umuntu angabhwezya kupapwa lwe mgosi? Atangabhwezya kwinjila mu lwanda lwa nyina wakwe ulwa bhubhili nukupapwa, pe angabhwezya?'' ⁵ Uyesu ahatamula, ''subhila, subhila umuntu inga atapapwa ku minzi na kwa mupepo, atangabhwezya kwinjila mubhumwene bhwa Mulungu. ⁶ Sheshipafilwe mumubhili sha mubhili, na sheshipafilwe ku Mupepo pe mupepo. ⁷ Utahaswije pa nongwa nkakubhuzya, 'pakuti yikwanzibhwa kupapa ulwa bhubhili.' ⁸ Inkingu yikuzyungula ponti pe yiganile nizwi lyakwe mukulyivwa, loli mtamanyile kwe yikufumila pamo kwe yikubhala. Vwe yili nahabhele ha wonti wa pafilwe mwa mupepo. ⁹ Unikodemo ahatamula, nukuyanga, ''Ivintu ivi vingabhombeha bhulibhuli?'' ¹⁰ Uyesu ahamtamula, ''Iwe wu musambilizi wa Israeli, pe utavimanyile ivintu ivi? ¹¹ Subhila, subhila, nkukubhuzya, shila she tushimanyile tukusimishizya kushila she tushibhonyi. Loli mutakuposhela ulusimishizyo lwitu. ¹² Inga mbabhuzizye gonti iga pansi pe mtakusubhila, mungabhwezya kusubhila inga nati imbabhuzye ivintu vwa kumwanya? ¹³ Nawumo we amazubhile pa kufumila kumwanya loli uwene we ahiha, Mwana wa Muntu. ¹⁴ Inza vwe Umose ahayizuvwa injoha mulugwa, bhwe bhwebhulo nu Mwana wa Muntu yikwanzibhwa ayimishilwaje, ¹⁵ inga kuti bhonti bhebhangamusubhila bhabhe nu bhulanzi bhwa shima. ¹⁶ Pe zili bhuli ino Umulungu ahayigana insi, kuti ahafumwa umwana wakwe uwa payo, ingape umuntu wowonti we akumusubhila atahalobhe loli abhanje nu bhulanzi bhwa shima. ¹⁷ Panongwa Umulungu atahamusontelezya umwana wakwe munsi ukuti ayilonje insi, loli ukuti insi yiposhilwe mu wuyo. ¹⁸ We akumusubhila Uwene tahalongwe. Uwene we atakumusubhila alonjilwehali panongwa atasubhiye izina lya Mwana weka uwa Mulungu. ¹⁹ Ino ye nongwa ya kulongwa, ya kuti ubhuzeru bhwinzile munsi, loli bhana muntu bhahagana ishisi nkani iya bhuzeru panongwa imbombo zyabho zyali mbibhi. ²⁰ Wowonti umuntu umubhomba mbibhi akuyihalalila ubhuzelu pamo atakwinza mubhuzeru ingape mbombo zyakwe zitahabhe pabhuzelu. ²¹ Loli, we akubhomba ubhwanalyoli akwinza pabhuzelu ingape imbomb zyakwe zilolehaje ukuti zikubhombwa mukwimvila wa Mulungu. ²² Lwezyashila izi, Uyesu poka na bhasundikwa bhakwe bhahabhala mukasi munsi ya Yudeya. Uko ahakata nabhope peamamile ahabhozyaga. ²³ Isalizi Uyohani wope amamile ahozyaga uko Ainea papipi nu Salim she kuti kwamile na minzi aminji pala. Abhantu bhamile bhahinzaga kukwakwe bhahozilwaga, ²⁴ kwekuti Uyohani bhamilile bhatamusumbiye mujele. ²⁵ Kufuma apo pahinza anadali pakasi yabhasundikwa bha Yohani na Bhayahudi izya chaka zyaluzelufwo. ²⁶ Bhahabhala kwa Yohani bhahamubhuzya, "Mwene, wula wewamile nawope kwisyila lyi jenje Yordani, uwene weuhasimishizya amazwi gakwe, yenya, akozya na bhonti bhakubhala bhakumulandata." ²⁷ Uyohani ahamula umuntu atahondeye kuposhela ishintu shoshonti loli inzavwe apelilwe kufuma kumwanya. ²⁸ Imwe mweka mwasimishizya ukuti nayanga ukuti, 'ine te ne Kirisitu', kushila uwene inkayanga, 'intumilwe pilongolela lyakwe.' ²⁹ Uwene we muzinjililwa na we mwene mushi. Lwe mujenzi wa mwenemushi, akwimilila nu kutejelezya akuseshela inkani panongwa yi zwi lya mwene mushi. Ino lelo luseshelo lwane lwabhombeha. ³⁰ Ahondeye avulaje, ine inkondeye inchepaje. ³¹ Wula we afumile kumwanya, weali pamwanya ku gonti. Wula weali munsi akufumila munsi pe akuyanga ivintu vwa munsi. Wula we afumile kumwanya weali pamwanya pa gonti. ³² Uwene akusimishizya ku gala ge ahagenya mu kwivwa, loli atalipo akuposhela isimishizyo zyakwe . ³³ Wula we aposheleye ulusimishizyo lwakwe. amanyile ukuti Umulungu wa nalyoli. ³⁴ Panongwa uwene we ahatumwa nu Mulungu akuyanga amazwi ga Mulungu. Kwekuti atakumupa Umupepo ku shipimo. ³⁵ Utata akumugana Umwana amupiye ivintu vyonti nmu nyobhe mu mwakwe. ³⁶ Wula we asubhiye Umwana ali nu bhulanzi bhwa shima, loli ku wula we atakwivwila Umwana atali yenya ubhulanzi, loli ubhulanzi bhwa Mulungu bhukubha papakwe.