¹ Lwe Uyesu amanya ukuti Amafarisayi bhivuye ukuti Yesu amamile na bhalandatizi nu kubhozya kushila nu Yohani, ² (peinga Uyesu wuyo weka amali atahozyaga loli abhasundikwa bhakwe), ³ amafumile Yudeya pe ahabhala Galilayi. ⁴ Pezyamile nyinza kujendela Kusamaria. ⁵ Pe ahafiha munkaya ya Samaria, wewukutakwa Sikari, papipi nubhuzilo bhwe Uyakobo amamupiye umwana wakwe Uyosefu. ⁶ Pe nishilibha sha Yakobho shamilile panapo. Uyesu amamile amalisite panongwa yidala pe ahatendama papipi nishilibha. Peyanile habhalilizyo ha musanya. ⁷ Umwantanda Umusamaria ahinza kutapa aminzi, nu Yesu ahamubhuzya, "Nampa aminzi imwele ." ⁸ Panongwa abhasundikwa bhakwe bhamile bhasogoye kukwabho munkaya kukala ishakulya. ⁹ Wula umwantanda ahamubhuzya, "Zikubha bhulibhuli iwe Muyahudi, ukundabha ine nemwantanda Musamaria ,ishintu sha kumwela?" Panongwa Abhayahudi bhatakusangana na Bhasamaria. ¹⁰ Uyesu ahamwamula, "Inzavwe ingawamanyile isha bhwila sha Mulungu, na wula weakukubhuzya 'Nampa aminzi,' penge wamulabha, pengeakupa aminzi ga bhulanzi." ¹¹ Umwantanda ahamwamula, "Mwene ute nishitapilo ishakutapila, ni shizibha shitali. Ugaje kwinyi aminzi ga bhulanzi.? ¹² Pe wenewe we mupiti, kushila utata witu Uyakobho, we amatupiye ishilibha ishi, na wuyo weka na bhana bhakwe poka ni vihano vwakwe bhahamwelaga aminzi aga nishizibha ishi?" ¹³ Uyesu ahamwamula, "Wonti weakumwela aminzi aga aliyivwa ishumilwa sona, ¹⁴ loli we akwanza kumwela aminzi genkumupa ataliyivwa isumilwa sona. Loli aminzi gendimupa galibha mbwibhi yeyikuduvuha na shima." ¹⁵ Wula umwantanda ahamubhuzya, "Mwene, nkulabha aminzi ago ingape ntahabhe nishumilwa, pe ndeshe kwinza apa kutapa aminzi." ¹⁶ Uyesu ahamubhuzya,"Bhalaga umuholele umulume waho, ingape winze." ¹⁷ Umwantanda ahamubhuzya, "Nte numwavuli."Uyesu ahamula, "Wayanga ahinza, 'Ute nu mwanavuli;' ¹⁸ she nkuti ulinabhanavuli bhasano, pe woka we ulinawope isalizi te mulume waho. Mwili wayanga bhwanalyoli!" ¹⁹ Umwantanda ahamubhuzya, "Mwene nenya ukuti iwe we mukubhwi. ²⁰ Abhatata bhitu bhahaputaga mwigamba ili. Loli imwe mukuyanga izyakunti Yerusalemu bhwebhuzilo bhwa bhantu bhahondeye kuputa ." ²¹ Uyesu ahamwamula, "Mwantanda, subhila, ahabhalilizyo hakwinza he mutaliputa abhatata mwi gamba ili pamo Yerusalemu. ²² Imwe bhantu mukuputa kushila shemutashimanyile, loli iswe tukuputa shetushimanyile, panongwa ubhuposhi bhukufumila Kubhayabhudi." ²³ Inza bhwebhulo, ahabhalilizyo hakwinza, nisalizi halipo, bhebhakuputa ubhwanalyoli bhalimuputa Utata mwa mupepo nu mwanalyolii, panongwa Utata akubhanza abhantu abhabhwebhulo ukuti abhantu bhakwe bhebhakumuputa. ²⁴ Umulungu we Mupepo, nabhala bhebhakumuputa bhahondeye ukumuputa kumupepo nu bhwanalyoli." ²⁵ Umwantanda ahamubhuzya, "Imanyile ukuti Umwene aliyinza, (akutakwa Kirisitu). Uyo angaayinza alitubhuzya zyonti." ²⁶ Uyesu ahamubhuzya, "Ine weukuyanga nine wuyo." ²⁷ Ahabhalilizyo hanaho abhasundikwa bhakwe bhahagaluha. Bhope bhahasukumila shonni amile ayanzanyaga numwantanda, loli atalipo nawumo weahayezya kumubhuzilizya, "Ukwanza ishoni? pamo "Shoni she ukuyanga nawope.?" ²⁸ Bwebhulo umwantanda ahashileha ishaji shakwe ahabhala munkaya nu kubhabhuzya abhantu, ²⁹ "Nzaga mwenye umuntu weambuzizye ivintu vwonti zyenzibhomvile, pe zihondeye abhanje wuyo wu Kirisitu?" ³⁰ Bhahepa munkaya bhahabha kukwakwe. ³¹ Ahabhalilo ha musanya abhasundikwa bhakwe bhahamubhuzya bhahayanga, "Mwene ukulya ishakulwa." ³² Loli uwene ahabhabhuzya, "Ine ndinashope ishakulya shemutashimanyile imwe." ³³ Abhasundikwa bhahabhuzilizyanya, nawumo weamwinziye nishintu shoshonti, " Pe bhinzile?" ³⁴ Uyesu ahabhabhuzya, "Ishakulya shane kwekubhomba ukwanza kwakwe wuyo weantumile nukukwilanya imbombo yakwe. ³⁵ Pe, mutakuyanga, 'Gashili amezi gasano agamvuno gamile gafisile?' Nkubhabhuzya yenyelezya amagunda gegasenginye mumvuno! ³⁶ Wula weakuvuna akuposhela amalipo gakubhunganiha ivihomwa panongwa ya bhulanzi bhwa shima, ingape kuti uwene akubhwala nawe akuvuna bhaseshelaje poka. ³⁷ Kwekuti ubhuyanzi ubhu bhwebhwanayoli, 'Woka akubhwala nu wunji akuvuna.' ³⁸ Nabhatumile kwinula she mutabhomvile, abhanji bhabhomvile imbombo nimwe mwinjiye muluseshelo lwa mbombo zyabho." ³⁹ Abhasamaria abhinji munkaya yila bamusubhiye panongwa ya nsi ya mwantanda amile ahasimishizyaga, "Weamambuzizye ivintu vwonti zyenzibhomvile." ⁴⁰ Pe Bhasamaria lwe bhinza bhahayanga atendame nabhope pe ahatendama kukwabho kusiku zibhili. ⁴¹ Pe abhinji nkani bhahamusubhila panongwa ya lizwi lyakwe. ⁴² Bhahamubhuzya wula umwantanda, " Tusubhiye te kwekumazwi gaho, bhwelele panongwa iswe sweka twivuye, nisalizi tumanyile ukuti nalyoli uwene wemuposhi wa munsi." ⁴³ Lwe zyashila isiku izyo zibhili, ahepa mukubhala Kugalilayi. ⁴⁴ Panongwa uwene wuyo weka amamile ayanzile ukuti mukubhwi ate numushinzi munkaya yakwe wuyo weka. Lwe ayinza kufuma mwi Galililayi, ⁴⁵ Abhagalilayi bhahamuposhela. Bhamile bhabhonye ivintu vwonti vwe abhomvile Yerusalemu pachaka, panongwa nabhope bhope bhalipo pachaka. ⁴⁶ Ahinza sona ku Kana ya Galilaya uko ahagalunkanwa aminzi gabha shihda. Amaliko numulongozi we umwana wakwe amali mubhinu uko Kukapernaumu. ⁴⁷ Lwe ayivwa kuti Uyesu afuma ku Judea na kubhala ku Galilaya, ahabhala kwa Yesu nakumubhuzya ayishe amuponwe, we apalamiye papipi nu kufwa. ⁴⁸ Pe Uyesu ahamubhuzya, ''Imwe inga mutenya ishimanyilo na mafindago mtangabhwezya kusubhila. ⁴⁹ Umulongozi ahayanga, ''Mwene yiha pansi lwe umwana wane atafuye. '' ⁵⁰ Uyesu ahamubhuzya, ''Sogola umwana waho apona.'' Wula umuntu ahasubhila izwi lye ayanga u Yesu pe ahepa penepo. ⁵¹ Lwe akwiha, abhabhomvi bhakwe bhahamuposhela nu kumubhuzya umwana wakwe aponile. ⁵² Pe uwene ahabhabhuzilizya pe habhalilo honi he aminzile apona. Bhahamtamula, ''Mabhwila muhabhalilizyo ha bhusano na bhubhili ubhubhinu bhuhepa.''' ⁵³ Pe utata wakwe ahamanya habhalilizyo he hala he Uyesu ahayanga, ''Umwana waho apona.'' Pe uwene na bhaluho lwakwe bhaha subhila. ⁵⁴ Ili lyali shimanyilo shabhubhili she ahabhomba Uyesu lwe afuma ku Yudea kubhala ku Galilaya.