¹ Ulwisi ni bhulumani pakasi yinyu bhukufuna kwii? Vitakubhuha kufuma mushinyonywa shinyu ishibhibhi sheshikuleta ukulwa mukasi iya bhantu bhinyu? ² Mukunyonywa shila shemutali nasho. Mukugoga na kushimbilila shila shemuta kubhwezya kubhanasho. Mukuhomana na kulwa, pe mushili mutakuvwaga she nongwa mutakunulabha Umulungu. ³ Mukulabha na mutakuposhela pe nongwa mukulabha panongwa iya vintu ivibhibhi, ingakuti mubhwezye kuvibhombela ku shinyonywa shinyu ishibhibhi. ⁴ Imwe mwe bhamalaya! Mutakumanya kuti ubhumanyani ubhwa nsi pe bhulwani panongwa iya Mulungu? Pe ubhwo, wowonti wakwitiha kubha wumanyani uwa nsi akuyibhiha wuyo mulwani wa Mulungu. ⁵ Awe mukuti indajizyo zitali nubhwanalyoli pezikuti Umupepo wabhisile mukasi yitun alinuwivu inkani panongwa yitu? ⁶ Lole Umulungu akufumwa ubhwila nkani, shenansi amazwi gakuti,"Umulungu akumuhana uwashiburi, lole akumupa kubhwila wakuyisya." ⁷ Ubhwo, yifumwaje kwa Mulungu.Muhanaje umukwalanzi na wope alishimbila kufuma kukwinyu. ⁸ Palamili papipi nu Mulungu, na wope alipalamila papipi nimwe. Yozyaji inyibhe zyinyu, imwe mwebha mbibhi, na zerufwaji amoyo ginyu, imwe mwebha madala gabhili. ⁹ Pelaji ihisiya, kutaji na kulila! Galunkanwi isyeho zyinyu kubha shisa nu luseshelo lwinyu kubha nkuta. ¹⁰ Yisyaji mwemwe pantanzi iya mwene, alibhabhusya pamwanya. ¹¹ Mutahayinjilane kunsinzi imwe kulimwe, bhajenzi. Umuntu wakuyanga shinguga numujenzi wakwe, awe kumulonga umujenzi wakwe, akuyanga shingunga nindajizyo nu kuyilonga indajizyo ya Mulungu. Inga wayilonga indajizyo, mutakuyivwa indajizyo, lole mukuyilonga. ¹² Pe woka bhulo wa akufumwa indajizyo pe. Umwamula nongwa, Umulungu, uwene wali na maha aga kupoha na kunanganwa. Iwe we nanu weukulonga uwapapipi yaho? ¹³ Tejelezyi, imwe mwemukuyanga, "Ilelo awe indabhi tulibhala munsi ino, na kutendama umwaha uko, na kubhomba ubhuchuluzi, na kugomba ukungeleha." ¹⁴ Wunanu wamanyile ishoni shilifumila indabhi, na ubhwihalo bhwinyu pe shoni lelo? Panongwa mukuholana ngati lubhesu yeyikufumila kuhabhalilo ahansi panapo kutega. ¹⁵ Pe lole ngemuhati, "inga she shikunzi isha Mwene, tulitendama nukubhoba ishi awe shila." ¹⁶ Loli isalizi mukuyibada pamwanya iya vintu vwinyu. Ukuyila konti uko kwe mbibhi. ¹⁷ Pe ubhwo kuwene wamanyile kubhomba aminza loli atakubhomba, kukwakwe uyo ye mbibhi.