¹ Bhajenzi bhane tebhinji bhwinji bhwinyu mukwanzibhwa kubha bhasambilizi, mumanye kuti tulisobhela kulongwa ukupiti nkani. ² Kwekuti twenti tukunanganwa mumadala aminji. Inga wowonti vwe atakupunula mumazwi gakwe, uyo muntu wa nalyoli, akubhwezya kuwabhiha nu mubhibhi wakwe wonti bhulo. ³ Isalizi inzavwe tukubhiha papipi ni farasi mukasi mumalomo gabho kuzilinga, pe tuhondeye kugalusanya amabhili gabho gonti. ⁴ Mumanyaje pope ukuti nimeli, pe ingampiti yikusunjilizya ni mpepo inkali, zikulongozwa nishinyonjelo ishinsi nkani nukubhala poponti pa ukufumila ukuzisyetusya. ⁵ Ubhwo bhunubhwo, ulumili shilungo ishinsi isha mubhili, loli shikuyitima amapiti nkani. Yenya intundu impiti vweyikubhweza kwaswa utwa bhwapalapwanta ahansi aha mwoto! ⁶ Ulumili lyope we mwoto, ye nsi iya mbibhi, mubhishilwe pakasi iya vilungo ivwa mubhili witu, we wukunanganwa umubhili wonti nu kubhubhiha pamwanya iya mwoto idala ilya bhulanzi, na wenewe kupembwa nu mwoto uwa kubhuzimu. ⁷ Kila she shiyama isha muntundu, inyunyi, sheshikwavula ni vipelwa ivwa muminzi vikulongozwa numwana muntu. ⁸ Loli na wumo umwanamuntu inga woka we angabhwezya kuyananwa ulumili, lwe mbibhi yeyitakutulila, lwizuye isumu iya kuganwa. ⁹ Ku lumili tukumusalifwa umwene nu tata witu, na kulyo tukubhabhuna abhantu bhe bhapelilwe kushifwani sha Mulungu. ¹⁰ Pe mwilomo linilyo likuyanga amazwi kusaya na kubhunwa. Bhajenzi bhane imbombo izi zitakwanzibhwa kubhwa. ¹¹ Pe, ishifula shoka shikubhwezya kufumwa aminzi amanonu naga kubhabha? ¹² Bhajenzi bhane, pe, likwi ilya ibhula lingabhwezya kupapa ivihomwa ivwa mabhula? Pamo imbwibhi ya minzi gi bhenya yitakufumwa aminzi gegatali ni bheya. ¹³ Wunanu pakasi yinyu wali numushinzi nukwelebhwa? Awe umuntu uyo pe alolesye ubhwihalo ubhwinza mu mbombo zyakwe ukwa kuyisya kwekukufuma nu mushinzi. ¹⁴ Loli inga muli nuwivu umuhali ni dala ilya kuyibagula mumoyo ginyu, mutahanyile nu kuyanga amalenga nukuhana ubhwanalyoli. ¹⁵ Ino te mushinzi wula wewukwiha kufuma pa mwanya, loli pe lelo ya nsi, te ya mupepo, yope ya pmpepo. ¹⁶ Kwekuti pepali nu wivu nu kuyibagula kulipo, kulinubhulugu ni njendo imbibhi ¹⁷ Loli umushinzi wewukufumwa kumwanya, iyene ye nzeru, pe nukugana ukusankana, ubhutonsu nu bhwinza, yeyizuye ubhwila ni vihomwa ivwinza, patali kupendelela abhantu bhamu, na nalyoli. ¹⁸ Na ishihomwa isha nalyoli shikubhwala pa lusankano kubhala bhebhakubhomba imbombo izya lusankano.