¹ Mwinzaje lelo, imwe mwe bhapamwanya, lilaji kwizwi ilya pamwa pa nongwa iya mayimba gegakwinza pamwanya yinyu. ² Ubhudumbwe bhwinyu bhunanginwe ni nzalo zyinyu zisyolilwe ni vikoko vwakunanganwa. ³ Izahabu zyinyu ni hela zinyu zipotilwe ubhumwamu, nubhunanjisu bhwakwe bhulisimizwa mu mwinyu nukunanjiha amabhili ginyu inzavwe mwoto. Muyibhishiye ubhusengulwa bhwinyu mukasi mu siku zya bhumalilo. ⁴ Yenyi ivilipwa ivwa bhabhomba bhobho-bhala bhe bhatalipilwe ukwa kwinula muvwizi vwinyu-bhakulila! Ni kuta iya bhala bhebhakwinula ivintu vwinyu shimufishiye mumakutwi aga Mwene wa Musirikali. ⁵ Mwatendama ukwa mbibhi munsi nukuyihobhosya mwemwe mweka. Muyinizye mumoyo ginyu kwi siku ilya kubholwa. ⁶ Mwamulonga nu kumugoga uwanalyoli watakuwbhwezya kuhana. ⁷ Pe lelo jimbilili, bhajenzi, paka ukwinza kwa Mwene , inza umukulima vwakugulilila ivwinulo ivwapapamwanya kufuma munsi, akugulila ukwa kujimba panongwa yakwe, paka imvula izya bhandilo na zila izya mwisho kutima. ⁸ Pope nimwe mubhwe bhajimvu; gomwaji amoyo ginyu,panongwa kwakwe Mwene kulipapipi. ⁹ Bhajenzi, mutayilamwaje mwemwe mweka, ukwanza mutahinze mukalongwa. Yenya, umulonzi akwimila pa mulwango. ¹⁰ Mushiholanyo, munjenzi mwenyelezyaga amayimba ga bhujimvu bhwa bhakubhwi bhahaloleha mwinzina lya Mwene. ¹¹ Yenya, tukubhita bhala bhakujimba,"pashi." Mwivuye ubhujimvu ubhwa Ayubu, na mumanyile umwenzo uwa Mwene panongwa ya Ayubu, kunamuna yoni Umwene ayizuye ubhwila ni mpepelezyo. ¹² Pe kugonti, bhajenzi bhane, mutahalapaje, awe kumwanya awe kunsi awe kushilapo isha muholana uwunji. Loli lelo "iii" yinyu na yimanyisye "hagha," inga kuti mutahinze mugwile pansi iya kulongwa. ¹³ Kuli na wowonti pakasi yinyu alinamayimba? Yikwanzibhwa alabhe. Pe, umuntu wowonti pe uwa kusankana?Na ayimbe kumutima. ¹⁴ Pe, kuli na wowonti pakasi yinyu we mubhinu? Na abhitizye abhagosi ahashimbhanza bhapute pamwanya yakwe, bhahamupahazya amafata mwizina lya Mwene, ¹⁵ ni mputo izya lwitiho ziliponwa umubhinu, nu Mwene alimubhusya. Pe inga abhombile imbibhi, Umulungu alimuhobhoshela. ¹⁶ Pe ubhwo zyefwaji imbibhi zyinyu imwe kulimwe, na kuputilana kila woka nu wamwabho, inga mubhwezye kuponywa. Imputo izya wanlyoli zikupapa ivwamwabho ivipiti. ¹⁷ Ueliya ali muntu uwa nsibho ngati zyitu, ahaputa kumaha kuti imvula yitahtime, peyitahatima munsi kuhabhalilo aha maha gatatu na mezi sita. ¹⁸ Pe Ueliya ahalabha habhili, ni mwanya zihagubuha imvula pamwanya ya nsi na nsi yihafumwa ivwakwinula. ¹⁹ Bhajenzi bhane, inga wowonti pakasi yinyu ingakusobhela mubhwanalyoli, lole umuntu uwamwabho abhamulekebisya, ²⁰ ubhwo pe umanye kuti wowonti wakumutobhola uwambibhi kwepa mwidala lyakwe ilya kunanga aliponwa umwoyo wakwe kufuma mufwa pe aligubishila ubhwinji ubhwa mbibhi.