¹ Pelelo, pakuti tuzungulilwe ni bhingo ipiti ilya bhahomelezyo, natusumbe kila shintu sheshikututesa poka ni mbibhi zyezikutuzungula na lubhilo tushimbilage ulubhilo kumaha pakupotana kwekuli pilongolela papitu. ² Tugatwale aminso gitu kwa Yesu, weahanda nuwakulinganwa ulwitiho lwitu, lwe panongwa ya kuhobhoha kwekuli pilongolela papakwe ahajimba poshi pashihobhenkanyo, ahazisufwa insoni zyakwe, naahatendama pansi panyobhe yakundilo iyakwitengo ilya bhupuma bhwa Mulungu. ³ Pelelo musibhililaje uwene weahajimba amazwi gakuhalalila kufumwa kubhambibhi, kushila wuyo weka inga kuti mutahinze mulite lumo nakuziliha amoyo ginyu. ⁴ Mutapurisite nalumo kuyimba mukupotana ni mbibhi nakubha ngati mukusililwa ibhanda. ⁵ Habhili muluvizye kugomwa amoyo gegakubhalinganwa ngati bhana abhanavuli: "Mwanawane, utahanyatulile agakugalushila aga Mwene, pope utahahatampe pe ngakugomba uwene." ⁶ Pakuti Umwene akumugulushila wowonti we akumugana, naakumulonga kila umwana weakumuposhela. ⁷ Jimbaji izya kubhasunda ngati kwekugalushilwa. Umulungu akuyimba nimwe ngati vyakulinda nabhana pakuti mwana bhuli wu tata wakwe atangamugalushila? ⁸ Loli inga nakumugalushila, kwe itwe twenti tukubhonga, pelelo imwe mwensimbilo nitwe twebhana bhakwe. ⁹ Kushila gonti, twali nu tata witu pansi bhahalugalushila, natubhashindishe. Pe yitakwanzibhwa kumushindiha Utata uwa mwamupepo na kutendama? ¹⁰ Nalyoli tata bhitu bhahatutesa ku maha mansi inzavyeyihaloleha nalyoli kukwabho, loli Umulungu utahatutesa kupata kukwitu inga tubhonje ubhufinjile bhwakwe. ¹¹ Kutalipo amayimba gegakuhobhosya kuhabhalilo aho. Akubha nubhubhavu.Pe sheshilipo, kuhabhalilo akupa ivihomwa vya mutende uwabhuzelu kubhala bhebha manyiye nawo. ¹² Pelelo bhusyaji ninyobhe zyinyu zyezizegemvile nakubhomba ivisugamo vyinyu viyeyebhazu kubha mwebha maha habhili; ¹³ golosyaji injendo zya nyayo zyinyu, inga wowonti walemaye atangalongola kutega pelelo apone. ¹⁴ Londolaji umutende na bhantu bhonti, nehabhili ubhufinjile bhwe bila ubhwo nawumo weangamwenya Umwene. ¹⁵ Mubhe bhakushenjela inga kuti atahabhe nawumo weabhe pabhutalia nubhwila bhwa Mulungu, napakulilitaha bheizi lya bhuhali lyelimela nakugomba intamwo nakunanjiha abhinji. ¹⁶ Yenyaji kuti kutali ubhwamalaya lumo umuntu we tewanalyoli ngati wu Esau, we panongwa ya mulwo woka ahakazya ubhwanalyoli bhwakwe ubhwakupapwa. ¹⁷ Kwekuti mumanyile kuti kwilongolela, lwe ahanyonywa kupwana ivwakusayiwa, bhamuhanila, Pakuti atahaga ubhuzilo bhwa kulamba poka nu tata wakwe, pope she ahalondola inkani kumansizi. ¹⁸ Pakuti mutahinza mwigamba mwenungabhwezya kupalamasya, igamba lwelikwaha umwoto, ishisi, kuhatafwa umwoyo na nkukungu. ¹⁹ Mutahinza kumazwi gamasaji, lumo kumazwi gegakufuma nizwi lyelikubhomba kuti bhebhakwivwa bhatahalabhe izwi lyolyonti kuyangw kwabho. ²⁰ Pakuti bhatahajimba shila shebhayanzile :"Yihabha nivihano vyevikupalamasya igamba, yikwanzibhwa ahomwe kumabhwe." ²¹ Yikogofwa inkani gahagenya Umusa ahati, "Nanyila inkani nahansi nakutetema". ²² Pelelo sheshilipo, mwinzile mwigamba lya Sayuni na ku nkaya ya Mulungu we mupuma, Iyerusalemu ya kumwanya, nakubhahabhizya elufu kumi bhebhakuhobhoha. ²³ Mwinzile kubhungana lwa bhapapwa abhabhwandilo bhonti bhebhabhasimvile kumwanya, kwa Mulungu umulonzi wa bhonti, a mupepo zya bhufinjile bhebhayilinginwe. ²⁴ Mwinzile kwa Yesu wakubhamanyanwa uwa nkomelezyo ipwa, nakwibhanda lyebhasabhiliye yeyikuyanga aminza kulusya ibhanda lya Habili. ²⁵ Yenya utahinze umuhane woka wa kuyanga. Kwekuti inga bhatakupinduha pebhahamuhana woka weaha bhasoha pansi, kubhwa nalyoli tuta lipinduha inga tulipinduha kubhutali kufuma kwa wula wakutusoha kufuma kumwanya. ²⁶ Kuhabhalilo aha izwi lyakwe lihayinzya insi.Loli ishi alajizizye nakuyanga, "Shili habhili tenkayinzwe insi yeka, loli ni mwanya yope." ²⁷ Amazwi iga, "Ku lwoka habhili," yikulolesya kwepa kuvintu vila vyevikutetema ivintu vila vye vipezilwe, ingakuti vila ivintu vye vitakutetema visyale. ²⁸ Pelelo, tuposhele ubhumwene bhwe bhtali kutetema, tuhobhohaje ahayilo hakumutima Umulungu pakwitiha poka na kwiha kwisho, ²⁹ pakuti Umulungu witu wu mwoto wukulya.