¹ Isalizi ulwitiho lya nalyoli lwalinalwo umuntu kuhabhalilo hehakwinza ishintu shimo kumaha. Bhwanalyoli bhwa shintu sheshishili sheshitskuloleha. ² Panongwa abhasokulu bhitu bhahaloleha kulwitiho lwabho. ³ Ku lwitiho tumanyile kuti insi yihapelwa kumaha ga Mulungu, inga kuti shila sheshikuloleha shitagombwa kufumilana ni vintu vyevihalolehaga. ⁴ Yamile panongwa ya lwitiho kuti Uhabili ahamufumizya Umulungu ishifinjile ishinza kushila navyahabhomba Ukaini. Yali kwekuti ahatimwa kubha wanalyoli. Umulungu ahamutima pakuti ahaleta. Panongwa iyo, Uhabili akuyanga, pope shafuye. ⁵ Yali kulwitiho kuti Enoko ahanyatulwa pamwanya nu atahenya ifwa. "Atahaloleha, panongwa Umulungu ahamunyatula" pakuti yayangilwe kukwakwe kuti ahamuhobhosya Umulungu lwashili kunyatulwa kumwanya. ⁶ Pepatali ulwitiho yitangabhwezenkana kumuhobhosya Umulungu, pakuti wakwinza kwa Mulungu yikwanzibhwa ayitishe kuti Umulungu akutendama nakuti akubhapa ishabhulote bhala bhe bhakumulondola. ⁷ Yali ya lwitiho kuti Unuhu, lwe Umulungu ayanzile nawo kuyanjila kumazwi gegatahalolehaga kumushinzi wa Mulungu ahagomba insanduku pakuyiponwa inkaya yakwe. Kwa kubhomba bhwebhulo, ahayilonga insi ahabhamupwana wanalyoli yeyikwinza kujendela ulwitiho. ⁸ Yali kwe kulwitiho kuti Uiburahimu, lwe bhamwitizya ahashindiha nukubhala pankaya yeyihanzibhwa kuposhela ngai wa kupwana. Ahafuma bila kumanya kuti kwekwiyi nkubhala. ⁹ Yali kwekuti ulwitiho kuti ahatendama pansi ya kulajizya ngati mujeni. Ahatendama mumakaratasi poka nu Yisaka nu Yakobh, nabhakupwana abhamwabho bha ndajizyo zyezila. ¹⁰ Ino kwekuti asubhaliye kuposhela inkaya ye weahasibhilila nuwakuzenaga wakwe nke Wumulungu. ¹¹ Yamile kwe kulwitiho kuti Iburahimu, nu Sara wope, bhala poshela amaha gakupata ulwanda pope shebhalibha gosi nkani, pakuti bhahamwenya kuti Umulungu wanalyoli, weahasubhizya umwana umwanavuli. ¹² Pelelo kuti kufuma kwa muntu uno woka wamapalamiye kufwa bhahapwana abhana bhutangabhazya. Bhaliabhinji ngati nzota zya kumwanya nabhamwabho ngati mbeyu zya mulusenga mulubhazu munyanja. ¹³ Abha bhonti bhahafwa kulwitiho bila kuposhela indajizyo. Loli lwe bhazibhenyi nakuzikalibisya kubhutali, bhahitiha kuti bhali bhajeni na bhebhali shila pamwanya pansi. ¹⁴ Kubhala bhebhakuyanga amazwi inziga bhakubhibha ubhubhibhi kubha bhakulondola insi yabho ¹⁵ Pabhwanalyoli, inga bhalibhakuyisibhilila insi ya yakukwabhobhahanzaga, nkebhahabhanga nubhuzilo ubhwa kugaluha. ¹⁶ Loli inza vyeshili, bhakunyonywa insi inyinza yeyakumwanya. Pelelo Umulungu atakwenya insoni kumwita Umulungu wabho, pakuti asenginwe inkaya panongwa yabho. ¹⁷ Yali kweku lwitiho kuti Uiburahimu lwe alingwa, ahamufumwa Uyisaka. Nalyoli, uwene wahaposhela pakuhobhoha indajizyo, ahamufumwa umwana wakwe woka, ¹⁸ wepamwa papakwe bhahayanga, "Kufumwa kwa Yisaka ishipapwa shahobhalishita." ¹⁹ Iburahimu amnyile kuti Umulungu amali ni bhuwezo ubhwa kumuzusya Uyisaka kufuma kubhafwe, nakuyanga kunjango iya iyakuzunguzya, ahamuposhela. ²⁰ Yali kweku lwittiho kuti Uyisaka ahamusaya Uyakobho nu Esabhu kuyanga amazwi gega kwinza. ²¹ Yali kwe ku lwitiho kutiUyakobho pamali nahabhalilo hakufwa, ahabhasaya kila mwana uwa Yusufu Uyakobho ahaputa, ahegamana pamwanya pandisa yakwe. ²² Yali kweku lwitiho kuti Uyusufu kuhabhalilo hakwe ahabhalilo lwehapalamila, ahayanga kwepa kubhana bha Iziraeli Kumisiri na ahabhalajizya kumunyatula poka nawo amafupa gakwe. ²³ Yali kweku lwitiho kuti Umusa, lwahapapwa, bhahamuzyiha amezi gatatu nabhapapi bhakwe panongwa bhamubhwenyi kuti mwana munsi wamali mwinza natahogopa indajizyo zya mwene. ²⁴ Yali ya lwitiho kuti Umusa, lweabha muntu wusongo, ahahana na kuti bhamwitizye kuti mwana wa mulindu Ufarao. ²⁵ Pelelo sheshilipo, ahasebha kulonga amayimba poka na bhantu bha Mulungu pakuti bhahobhoshe ubhubhembu ubhwa mbibhi kuhabhalilo hehapalamila. ²⁶ Ahasibha insoni zyakumulandata Ukirisitu kubha bhudumbwe ubhupiti kushila ivya kusengula ivya Misiri pakuti aha gomwa aminso gakwe pa shilote ishahabhalilo hehakwinza. ²⁷ Yali kweku lwitiho pakuti Umusa ahafuma Kumisiri. Atahanyila ishilaha sha Mwene, kwekuti ajimvile pakwenya watakuloleha. ²⁸ Yali kweku lwitiho ahayilema Ipasaka nakusabhilila ibhanda, ingakuti wakunanganwa ivihomwa vwa bhwandilo atahabhapalamasye abhapapwa abhabhwandilo abhanavuli abha Iziraeli. ²⁹ Yali kweku lwitiho kuti bhahajenda munyanja ya shamu ngati nsi nyumu. Habhalilo Abhamisiri bhahalinjizya kujenda bhahamilulwa. ³⁰ Yali kweku lwitiho ulubhunba lwa Yeriko luhagwa pansi, pakuti bhazunguliye insiku saba. ³¹ Yali kweku lwitiho kuti Urahabu wula umalaya atahalonbha poka na bhala bhebhatali bhanalyoli, pakuti amabhaposheleye abha kupelelezya nakubhasengula ahinza ³² Na injanje ishoni inkani? pakuti ahabhalilo hatakukwilana kuyanga izya Gigeoni, Barak, Samusoni, Yeftha, Daudi, Samweli nizyabhamukubhwi, ³³ bhekujendela ulwitiho bhahazipota intamwo, bhahabhomba ubhwanalyoli, nabhahaposhela indajizyo. Bhahadindila amalomo gansama, ³⁴ bhahazimwa amaha ga mwoto, hansi ahipanga, bhahapona kufuma kumabhinu, bhali bha maha kubhulugu, nabhahaleha abhalugu ahbhajeni kushimbila. ³⁵ Abhantanda bhahaposhela abhafwe bhabho kwidala lya kuzyuha, bhamo bhahayimba, bila kwitiha kuleshelawa inga kuti bhabhwezye kwaga kubhelela kuzyuha ukwinza nkani. ³⁶ Bhamo bhahayimba kwakubhasufwa nakubhahoma, eee, pope kwakukungwa na kugalilwa mukoloti. ³⁷ Bhahabhahoma na mabhwe. Bhahabhadumula ivibina ku musumemo. Bhahabhagoga ni panga. Bhahabhala kumakwela ga ngole namakwela ga mbuzi bhali bhahanzaga, bhahendelelaga mubhubhavu nabhahabhabhombelaga amabhibhi ³⁸ (weinsiyeyitahondeye kubha nabho), bhakuzungulazungula mulugwa, mumagamba, muvigana na muvilibha ivya pansi. ³⁹ Pope shabhantu bhonti ibhwa Mulungu amabhitisile pakuti palwitiho lwabho, bhatahaposhela she amanzile. ⁴⁰ Umulungu ahalongolela kutupa ivintu ivyinza, ingakuti bila twetwe nkebhatahabhweza kuyananwa.