¹ Pe lelo mubhe bhatatu bha kubhapoka Numulungu ngati bhana bhakwe bhabhaganile. ² Mujendaje mulugano, bhwebhulo ngati wu Kristu vya ahatugana itwe, ahayifumwa weka kukwitu itwe, uwene kujulu yitu. Uwene amile shifumwa ubhufinjile, kubhamufungo nyinza yakumuhobhosya Umulungu. ³ Ubhubhembu awu ubhupopo bhwobhwonti nivinyonywa ivibhibhi zitayangwaje kukwinyu inzavye, yikwanziwa kubhafinjile, ⁴ patahabhe kuhalala gatahayangwe, injango izya bhuyubhwi, awu bhutani ya fuzyo, geteganalyoli, shikwanzibhwa papakwe pabhe ni nsalifwo. ⁵ Mungabha ni shimishizyo kuti kuli nubhubhembu, ubhunyazu, pe akunyonywa, uyo wakuputa sheshitakuyanga, atali nubhupwano bhwobhwonti kushina mwene sha Kristu nu Mulungu. ⁶ Umuntu wowonti atahakuhopesya kumazwi geka, kushifukwa sha igo ishilaha sha Mulungu shiliyinga pamwanya kubhana bhebhatakushindiha. ⁷ Bhwebhulo atahabhe poka nabho. ⁸ Kwekuti imwe kubhwandilo twali shisi, loli ishi mulipabhuzelu kwa Mwene. Habhili jendaji ngati bhana bha kubhuzelu. ⁹ Pakuti ivihomwa vya kubhuzelelu vikubhunganiha ubhwinza bhwonti, ubhugoloso nu bhwana lyoli. ¹⁰ Londola shila sheshikuhobhosya kwa Mwene. ¹¹ Bhutahabhe ubhupoka ni mbombo izya sinsi zyezitali nivihomwa, loli muzibhishe pabhuzelu. ¹² Pakuti imbombo zya zyabhakubhomba nabhene kushisi ni nsoni inkani pe kwelezyezya. ¹³ Imbombo zyontu, lwezikubha pabhuzelu nu bhuzelu, zikubha luhozyo, ¹⁴ kwekuti ivintu vyeviliapazelu vikubha luhozyo. Habhili akuyanga bhwebhulo,"Damuha, wusupiliye, na ubhushe kubhafwe nu Kristu alizelupa pamwanya papaho." ¹⁵ Habhili mubhe hinza vyemukujenda, tengati bhantu bhebhatashevile loli ngati bhashevu. ¹⁶ Mushindihaje ahabhalilo kwekuti nsiku zya mbibhi. ¹⁷ Mutahabhe bhayubhwi, loli mumanye shoni ulugano lya Mwene. ¹⁸ Mutahaholye kwi pele, likutobhola kubhubhibhi, loli mwizuye Umupepo Umufinjile. ¹⁹ Yangaji nu kila woka uwinyu kunyimbo, izya kumutima, ninyimbo zya mupepo. Mwimbaje nakumutima kumwoyo kwa Mwene. ²⁰ Yikwanzibhwa kufumwa ishakumupa ku mbombo zyonti kwizina lya Kristu Yesu Mwene witu kwa Mulungu Tata. ²¹ Muyifume mwenemwe kila woka kwa wamwabho kumshinzi ya Kristu. ²² Bhantanda, yifumwe ku kubhalume bhinyu, ngati kwa Mwene. ²³ Pakuti umwanavuli lye litwe lya mwantanda, inga Ukristu vwali litwe lya shibhanza. Muposhe wa mubhili. ²⁴ Kuti ngati shibhanza vyeshili pansi pa Kristu, bhwebhulo abhantanda yihondeye bhabhombe bhwebhulo kubha bhalume bhakwe ku kila shintu. ²⁵ Bhanavuli, bhagane abhashibhinyu ngati wu Kristu vya abhaganile ishibhanza nakushimwa weka kujulu yakwe. ²⁶ Ahabhomba bhwebhulo inga libhe lizelu. Ahalizelufwa na minzi kwizyi. ²⁷ Ahabhomba bhwebhulo inga yilolesye wuyo pashibhanza isha mushinzi, lyelitali nibhala nu bhunyazu nishintu sheshikuholana nigo loli shikwanziwa ifinjile, lye litali nubhubhibhi. ²⁸ Kwidala lyelila, abhanavuli bhakwanziwa kubhagana abhashi bhabho ngati mubhili wabho. Wula wa kumugana umushi wakwe akuyigana wuyo. ²⁹ Nawumo ingawoka wakuhalalila umubhili wakwe. Loli wuyo, akubhulisya nu kuugana, inga Ukristu vya ashigana ishibhanza. ³⁰ Pakuti itwe tulipoka uwa mubhili wakwe ³¹ "Kushifukwa ishi umwanavuli alimuleha utata wakwe nu mayi wakwe na bhalibha poka nu mushi wakwe, na abho bhabhili bhuliyima mubhili woka". ³² Ubhu bhwavwamile. Loli kuyanga kusubhila Ukristu mushibhanza. ³³ Loli, kila woka winyu amugane umushi wakwe ngati wuyo, nu mushi lazima abhe mshindishe umulume wakwe.