¹ Mwe bhana bhashindishe abhapafi bhinyu ku Mwene, pakuti ino yanalyoli. ² "Mushindishe utata waho nu mayi waho" (Ino ye ndajizyo ya bhwandilo iyalufingwi), ³ "inga yibhe hinza kukwinyu inga mutendame hinza insiku intali pamwanya ya nsii." ⁴ Nimwe bha tata, mutabhandaje abhana nu kubhagombela ishilaha, loli sheshikwanzikwa, mubhasunje nakubhasundanjizya iya Mwene. ⁵ Imwe bhazya, mubhanje mwebhakushindiha abhasongo bhinyu abhapansi ku mushinzi umupiti nu kutetema kwi lyoga ilya kumwoyo ginyu. mubhe mwebhakwivwila kwabho ngati bhula vyemkuvyila Ukristu. ⁶ Kwivwila kwinyu kutahabhe pala pabhalume bhinyu pebhakubhenya inga bhahobhohaje. Loli yakwe, mubhe mwebhakwivwila ngati bhazya bha Kristu. Bhombilaji Ulugano lya Mulungu kufuma mumoyo ginyu, ⁷ bhabhombelaje ku moyo ginyu gonti, kwekuti Umwene na bhala te bhanadamu, ⁸ mkwanzibhwa kumanya kuti ku kila imbombo inyinza umuntu zyahuzibhomba, ataposhele ishishamwabho kufuma kwa Mwene, inga we muzya awu muntu umutabhushe. ⁹ Ni mwe bhamwene bhombaji bhwebhulo ku bhazya bhinyu. Mutabhogofwaje mkumanya kuti wuyo wewu Mwene wa bhonti nu wula weali kumwanya. mkumanya kuti ataliko kuzebhelela mukasi yakwe. ¹⁰ Peloli, mubhanje na maha ku Mwene na ku bhuwezo bhwa maha gakwe. ¹¹ Muzwalaje ivilwilo vyonti ivya Mulungu, inga mwimilile ishingunga nu bhulugu ubhwa mukwalanzi. ¹² Kwekuti kulwa kwitu te yi bhanda ni nyama, loli inkani mubhumwene ni komelezyo iya mupepo na umwenesho wa nsii wa bhibhi nna kushisi, ulwa pepo ku lubhazu zya kumwanya. ¹³ Mwe munumwo, zwali ivilwilo vyonti ivya Mulungu, inga mwimilile hinza ku mbibhi ku habhalilo aha kubhibhi. Pa bhumalilo kila shintu, kutimwimilile ahinza. ¹⁴ Munsimpaje kwimilila ahinza. Mubhombaje pa kuti mukunjile ulamba ubhwanalyoli nubhwinza kushifubha. ¹⁵ Mubhombaje ukuti muzwaye ubhutiyali muvina mu mwinyu wakuyanga amazwi aga mutende. ¹⁶ Ku shila she munganyetula ikwela lya mtende, yeyi kutusunga kudinda impalala ya wula umulugu. ¹⁸ Zwalaji inkofwela ya bhulokole nipanga lya Mupepo, lwe lizwi lya Mulungu. ¹⁷ Poka nukuputa nukulambilizya. Putaji kumupepo muhabhalilo. Ku mukwenya ubhu mubhe mwe bhakwenyelezya ku habhalilo honti pakujimba konti ni mputo kubhafinjile bhonti. ¹⁹ Putaji kujulu yane, inga imupe izwi inga nkugubutula ilomo lyane ,putaji kuti indajisu ubhwanalyoli yeyivwamile yeyikuyanga izwi. ²⁰ Nakujulu ya amazwi ine nu balozi nenkungilwe umunyolo, inga mukasi mumabho injanje kumaha inzavye kunyonywa kuyanga. ²¹ Loli imwe pe mumanye imbombo zyane na vyekujendela, Tikiko umujenzi wane umwinza nu umukristu uwanalyoli kwa Mwene, kutabhabhuzye ivintu vyonti. ²² Munsotelezyizye kukwinyu kuti muzimanyaje izi, inga mumanye izya kumwita inga bhahatazye amoyo ginyu. ²³ Umutende na abhe kumujenzi, nu ulugano poka na ulwitiho kufuma kwa Mulungu tata nu Mwene Uyesu Kristu. ²⁴ Ubhwila bhubhe poka na bhebha bhebhakumugana Umwene Yesu Kristu ku lugano lula lwemutakulingana.