¹ Isalizi Upeteri nu Yohani bhahajendaga bha bhahabhalaga kuputa, ahabhalilo aha salaa 9. ² Umuntu wumo, amalemaye kufuma impapilwa, bhahamunyatulaga isiku zyonti bhahamukatihaga pa mulyango wa shibhanza we bhahautahaga umwinza, ingape abhwezye ukulabha ivwabhwila ukufuma kubhantu bhe bhahinjilaga mushibhanza. ³ Lwe abhenya Upeteri nu Yohani bhakusejelela ukwinjila mushibhanza, ahalabhaga isha mwila. ⁴ Upeteri, ahamuntontomela aminso, poka nu Yohani, ahati, "twenye iswe." ⁵ Umulemazu ahabhenya, bhangamuposhelezya ishintu shimo kufuma kukwabho. ⁶ Loli Upeteri ahati, "feza ni zahabhu ine ntenazyo, loli she ndili nasho nkukupa iwe. Mwizina lyakwe Uyesu Kirisitu wa Nazareti, jenda." ⁷ Upeteri ahamugubutula inyobhe yakwe indilo, nukubhusya mumwanya: lubhilo lubhilo ivina vwakwe ivihankala vwa mafupa gakwe vihinza vwabha na maha. ⁸ Ahadomoha mumwanya, umuntu umulemazu ahimilila na ahanda kujenda; ahinjila mushibhnza poka nu Peteri nu Yohani, ahajenda, ahadobha nu kumutima Umulungu. ⁹ Abhantu bhonti bhahamwenya akujenda kumutima Umulungu. ¹⁰ Bhahayanga ukuti weula umuntu we ahatendamaga nukulabha ishabhwila pa mulyango umwinza wa shibhanza; bhahizula nu luswigo nukusukumila panongwa ya shila she shafumila kukwakwe. ¹¹ Ilelo vwe amabhalemeleye Upeteri nu Yohani, abhantu bhonti kwa poka bhahashimbilila munyumba ye bhatili ya Solomoni, bhakusukumila inkani. ¹² Upeteri lwe ayenya ilyo, ahabhamula abhantu, "Imwe bhantu bha Iziraeli, shoni she mukusukumila? Shoni pe mukumwenyelezya aminso ginyu kukwitu, inzavwe ukuti twaleha uno ajende kumaha gitu sweswepamo kumushindiha Umulungu kwitu?." ¹³ Umulungu wa Aburahamu, nu wa Yisaka, Yakobho, Umulungu wa bhatata bhitu, amuzuvwa umubhomvi wakwe Uyesu. Uno wewe imwe mwa mutwaye nu kumuhana pilongololela pa minso ga Pilato, pe uwene ahinza ayamula kusatulwa. ¹⁴ Muhana Umufinjile nu mugolosu, Lole muhagana umugoga abhantu ataasatulwe. ¹⁵ Imwe mwamugosile Umwene wa bhulanzi, we Mulungu ahamuzusya kufuma kubhafwe - iswe swemasimishizi wili. ¹⁶ Isalizi, mulwitiho mwizina lyakwe, umuntu uno we mukumwenya nukumumanya, agomvilwe kubha na maha. Ulwitiho lwe lukujendela mwa Yesu lwamupiye uwene ubhulanzi ubhu ubhukwile, pilongolela lyinyu mwenti. ¹⁷ Isalizi, Bhamanyani, manyile ukuti mwabhomvile mu bhulunkanu, navwe wope vwebhabhomvile abhalongozi bhinyu. ¹⁸ Loli zyonti zye Umulungu amabhabhuzizye nzila kumalomo gabha kubhwi bhonti, ukuti uno Kirisitu aliyimba, isalizi alunjisizye. ¹⁹ Penga lumo, leha mugalushile, ingape ukuti imbibhi zyinyu zihondaye zyepaje nzila, pezwinzaje utubhalilizyo twabhutengano kufumila nu kubha kwa Mwene; ²⁰ nukuti ahondeye kumusontelezya Kirisitu we asebhilwe panongwa yinyu, Uyesu. ²¹ Uwene we paka imwanya zimupeshele paka ahabhalilizyo kugaluswa ku vintu vwonti, vwe Umulungu anaviyanzile hali iya hali kumalomo gabhakubhwi abhafinjile. ²² Nalyoli Umusa ahayanga, 'Mwene Mulungu alizuvwa umukubhwi inzavwe ine kufuma mubhamanyani bhinyu. ²³ Yilifumila ukuti wonti umuntu we atakutejelezya kubhakubhwi uwene alilovwa nzila ayebhe mukasi ya bhantu.' ²⁴ Mwemumo, nabhakubhwi bhonti kufumila Samweli na bhala bhebhahalandata pilongolela yakwe, bhahati nukuyanga isiku izi. ²⁵ Nimwe mwebhana bha bhabhakubhwi nabha lufingwi lwe Umulungu alibhomvile poka na bhasokulu, inzavwe amayanzile kwa Aburahamu, 'Mu nsanga yaho na mumpapilwa zyonti izya nsi zililotwa.' ²⁶ Lwe Umulungu amuzuvwa umubhomvi wakwe, amamutumile kukwinyu isuti, ingape abhalote imwe mukugalunkana kufuma mumbibhi zyinyu."