¹ Lwe lyafiha isiku lya Pentekoste, bhonti bhali poka ulubhazu lwoka. ² Bhahaganduha bhahivwa ahalanga kufumila kumwanya ngati mpepo inkali. Yihayizuzya inyumba yonti mwe bhali bhatendime. ³ ipo zihabhafumila imili, ngati mili zya mwotonzezigabhinkine, zihabha pamwanya yabho wonti mumwabho. ⁴ Bhonti ibho bhahizula nu mupepo Umuzeru pe bhahanda kuyanga ku njango izinji, inza vwe Umupepo amabhapiye kuyanga. ⁵ Pepala bhalipo abhayahudi bhebhaha tendamaga mu Yerusalemu, abhaputa Mulungu, kufuma kila insi pansi ya pamwanya. ⁶ Ukulila uku kuhivwiha, abhantu bhahabhungana poka lwe bhanda nukupulumba pa nongwa umuntu wonti ahabhivwa bhakuyanga ku njango yakwe weka. ⁷ Bhahatetema nu kusukumila, ''Nalyoli, ibha bhonti bhakuyanga te Bhagalatiya? ⁸ Shoni she itwe tukubhivwa, wonti mu njango zyetuhapapwa nazyo? ⁹ Abhaparthia na Bhamedi nabha Waelamu, nubho bhebhakutendama ku Mesopotamia, Ubhuyahudi, ni Kapadokia, namu Ponto ni Asia, ¹⁰ Mu Frigia, Pamfilia, mu Misri, nulubhazu lwa Libya naku Kirene, nabhajeni kufuma ku Rumi, ¹¹ Abhayahudi nabha malenga, Wakrete na Bhaarabu, tukubhivwa bhakuyanga mu njango zyitu izya mbombo zya bhupiti bhwa Mulungu.'' ¹² Bhonti bhaha sukumila na kuswijiswa; bhahayangana bhabho ku bhabho, ''Ino yikumanisya shoni?'' ¹³ Loli bhamo bhahayangana nukuti, ''Ibha bhizuzizwe nipele ipwa.'' ¹⁴ Loli Upeteri ahimilila poka na bhalaa kumi na woka, ahazuvwa izwi, ahabhabhuzya, ''Abhantu bha Ku Yudea na bhonti bhebhakutendama ipa pa Yerusalemu, ili limanyishe papinyu, tejelezyi kunjele amazwi gane. ¹⁵ Abhantu ibha bhataholilwe inza vwe mukusibha, panongwa ahabhalilo iha pe nzanchi ha bhutatu. ¹⁶ Pope ili lihayangagwa kujendela kwa mukubhwi Uyoeli: ¹⁷ Zilibha munsiku zyabhumalilo; Umulungu akuyanga, ndikupula Umupepo wane ku bhantu bhonti . Abhana bhinyu na bhalundu bhinyu bhalifumwa ubhukubhwi, abhalumendo bhinyu bhaliyenya ivitushizya, na bhagosi bhinyu bhalilota ivilota. ¹⁸ Bhwebhwebhulo pa mwanya yabha bhomvi bhane abhantanda insiku izyo, ndikupula Umupepo wane, bhope bhalikubhwaga. ¹⁹ Ndilolesya ivisukumizyo ku mwanya ni visukumizyo munsi ya pansi, ibhanda, nu lubhesu lwi lyosi. ²⁰ Ni zubha liligalunkanwa lilibha shisinu mwezi kubha libhanda, lwe lishili isiku ipiti ilya kwogofwa izya Mwene. ²¹ Pe yilibha ukuti wonti we akulishindiha izina lya Mwene alipona.'' ²² Abhantu abha Iziraeli, yivwi amazwi aga; Uyesu uwa Nazareti, umuntu weahamanyiha nu Mulungu kukwinyu ukwa mbombo uwa maha gakogofwa, ni vilolesyo vwe Umulungu kujendela Uwene pakasi yinyu, inzi mwe mweka mwemumanyile- ²³ Shinisho vwe shapanjililwe nu kugombwa ukufuma pabhwandilo, ni njele zya Mulungu, ahepelwa, ni mwe, mu nyobhe zyabhantu abhananzi, muhamuyimvwa na kumugoga, ²⁴ we Umulungu ahamubhusya, ahabhwefwa ubhubhavu ubhwa fwa kukwakwe, pononga yitahawenzenkana kukwakwe kumubhonela nuwo. ²⁵ Ubhwo Udaudi akuyanga zye zyakwe, 'Nkamwenya Umwene shima pantanzi ya sheni shane, uwene ali kunyobhe yane iya ndilo ubhwo lelo tenkasojelezwe. ²⁶ Mwemwumwo umwoyo wane wali nuluseshelo nu lumili lwane luhahobhoswa. Wope umubhili wane wulitendama mu lusubhilo. ²⁷ Tahabhuleshe ubhulanzi bhwane bhubhale kubhuzimu, pamo teahitishizye Umufinjile waho kwenya ubhunyazu. ²⁸ Iwe undolesizye kukwane amadala ga bhupuma; kuti uleshe nizule uluseshelo pilongolela lya paminso gaho.' ²⁹ Bhajenzi, muleshe injane kwukwinyu kumaha aga tata witu Davidi: uwene ahafwa nukumusyila, nu nimbipa yakwe yilipo poka niswe paka nilelo ili. ³⁰ Mwe, amali mukubhwi na amamanyile ukuti Umulungu amalapile woka mupshililapo shakwe, ukuti alibhiha woa mumpapilwa yakwe kushitengo bhu mwene. ³¹ Ahalyenya ili nzila,pe ahayanga izya luzyuho lwa Kirisitu, 'lelo atahasyala kubhuzimu, nu mubhili wakwe wutalibhola.' ³² Uno Uyesu - Umulungu ahamuzyusya, uwene iswe swenti twebhasimishizyi. ³³ Mwe wumo, ayimiliye munyobhe zya kundilo kwa Mulungu, na lwe aposheleye ulufingwi lwa Mupepo Umufinjile kufuma kwa Tata, uwene ahitilizya ino ulufingwi, uwene imwe mukwenya nu kwivwa. ³⁴ She Udaudi atazuvile kubhala kumwanya, pe ahati, 'MWENE ukuyanga kwa Mwene wane, ³⁵ "tendama kunyobhe yane iya kundilo, paka penabhabhiha abhalugu bhaho shitengo kuvinama vyaho. ³⁶ Pelelo inyumba yonti iya Iziraeli pe yimanye ku bhwanalyoli ukuti Umulungu we amubhwezizye uwene abhe Umwene nu Kirisitu, uno Uyesu we muhamuhomela." ³⁷ Isalizi lwe hivwa bhwebhulo, bha laswa mu mumoyo gabho, bhahamuzyusya Upeteri na bhapositili abhamwabho, "Mujenzi, tubhombeshe?" ³⁸ Nu Peteri ahabhabhuzya, "Leha pe Mulozelwa, wonti mumwinyu, mwizina lya Yesu Kirisitu panongwa ya luhobhoshelo lwa mbibhi zyinyu, pe mulposhela ashabhupi sha Mupepo Umufinjile. ³⁹ Pe uwene lufingwi na kubhana bhinyu nu kubhala bhonti bhe bhali kubhutali, abhantu abhinji kulingana Umwene Umulungu witu vwealibhaholela." ⁴⁰ Ku mazwi aminji ahasimishizya nukubhabhuzya; ahati, "Muyokole mwepe mu mpapilwa ino iya mbibhi." ⁴¹ Pe bhahaposhela amazwi gakwe nu kozelwa, panapon bhahonjeleha ngati isiku ngati bhantu 3000. ⁴² Bhahajendelela muvisambilizyo vwa bhapositili nu kubhapoka, mu kumesulwa mukati na kuputa. ⁴³ Ilyoga lihizula ku bhonti nivisukumizyo ivwinji ni vwakuswijisya vihabhombeha ukujendelela kubhapositili. ⁴⁴ Bhonti bhebhasubhiye bhalipoka nukubha ni vintu vwabho poka, ⁴⁵ pe bhahakazya ivintiu vwabho nu kugabhana kwa bhonti kulingana nu kwanza kwa wonti. ⁴⁶ Pelelo isiku ni siku bhahajendele nu mwa tempeli, na bhahayangaga mukati munkaya, na lyanji ishakulya ku luseshelo nu kuyisya mu moyo; ⁴⁷ bhahamwinula Umulungu lwe bhali nu bhuhobhosu na bhantu bhonti. Umwene ahabhonjezya isiku pi siku bhebha posilwe.