¹ Utamuhalapilaje umwanavuli usongo. Loli mugomwaje umwoyo inza bvwe utata waho. Ubhagomwaje umwoyo abhalumendo abha navuli kwekuti bhajenzi bhaho. ² Ubhagomwaje amoyo abhantanda abhagosi inza vwe umayi waho, na bhantanda abhalindu inzavwe bhamukulu bhakwe ku bhuzelu bhonti. ³ Mubhashindihaje abhafilwe , bhala bhe bhafilwe nalyolilyoli. ⁴ Loli inza vwe mfilwe ali nabhana pamo abhazukulu, bhakeshe isuti bhasambilizye ukulolesya umushinzi kubhantu bhamunyumba mumwabho bheka. Bhaleshe bhabhanje abhapafi bhabho aminza, kwekuti ili likuhobhosya pilongolela zya Mulungu. ⁵ Loli umufwile nalyolilyoli wewula we aleshilwe weka wuyo. Uwene akubhiha ubhusubhile bhwakwe kwa Mulungu. Insiku zonti akutendama mubhulabho na mumputo ubhusiku nu musanya. ⁶ Inza bhwebhulo, umwantanda bwula we akutendama mubhunanzi afuye na peashili mulanzi. ⁷ Pe uziyanje izi zyonti inga pe kuti bhatabhanje bhakwilamwa. ⁸ Pe inga inzavwe umuntu atakubhasunjilila abhajenzi bhakwe, inzabhala bhebhali munyumba mumwakwe, ayihanile ulwitiho .pe lwe habhibhi kushila umuntu we atasubhiye . ⁹ Loli umwantanda ayandishilwe mubhantu inza vwe bhafilwe abhanje nubhwasongo bhwebhutashizile amaha sitini, abhanje mwantanda wa mwanavuli woka. ¹⁰ Abhanje amanyinkine mumbombo inyinza, ukubha kwekuti akubhasajila abhana, pamo aliwakuseshela kubhajeni, pamo agezizye ivina vwa bhasubhile, pamo ayavizye bhebhamile bhamayimba, pamo ayifumizye kumbombo inyinza. ¹¹ Loli kubhala abhafilwe abhalindu, uhanaje kubhasimba mulubhazu lwa bhafwile. Pakuti inga bhinjila muvinyonywa vwa mubhili mwa Kirisitu, bha kwanza kusendwa. ¹² Mwidala ili kwinjila mubhulonzi kwekuti kuvunza kuyifumwa kwabho ikwabhwandilo. ¹³ Na bhope bhakwinjila muvibhelezya vwa bhuhata. Abhene bhakuzyungula munyumba na munyumba. Te bhulo kwekuti bhahata, loli bhope bhakubha bhamayebho bhebhakwinjila muvintu ivinji. Abhene bhakuyanga ivunti vwe vitahondeye kuyanga. ¹⁴ Pe ingalumo ine kwanza abhantanda abhalindu vimalwaje, bhapapaje abhana, bhimilililaje inyumba zyabho, inga pebhatamupanje umulugu ubhuzilo bhwa kutulonga kwa kubhomba imbibhi. ¹⁵ Panongwa bhamo mumwabho bhamugalushiye usetano. ¹⁶ Inza vwe mwantanda wonti umusubhile alinabhafwil, peabhavwaje, ingape ishibhanza litamwamilwaje, ingape lihondeye kubhavwa bhala bhebhafwile nalyoli lyoli. ¹⁷ Bhope abhasongo bhala abhalongozi abhinza bhabhazilwe ukuti bhahondeye umushinzi ulwinji, bhala bhe bhebhali mukusambilizya izwi lya Mulungu. ¹⁸ Kwekuti ukalata akuyanga, "Utamunkungaje ing'ombe ilomo peyikuswola ishakulya," nu "Mubhomba mbombo ahondeye amalipo gakwe." ¹⁹ Utaposhelaje ubhulonzi izya mugosi loli bhalipo abhasimishizi bhabhili pamo bhatatu. ²⁰ Bhalalapilaje abhananzi pilongolela lya bhantu bhonti inga pe abhanji bhebhasyaye pamo bhanganyila. ²¹ Nkunkulajizya nzila pilongolela zya Mulungu, na pilongolela zya Kirisitu Uyesu, na bhahabhizya abhazelu, ukuti usunjilile ikomelezyo izi kusita kwenyezya paminso wonti wula, nukuti atabhombaje lyolyonti mukwenya kuminso. ²² Utamubhishilaje umuntu wowonti inyobhe lubhilo. Utayisanzwaje imbibhi ya muntu uwunji. Yikwanzibhwa ukuyisunjilila wenewe weka ubhanje muzelu. ²³ Zikuhondeye kumwela aminzi gegakushila apo. Pelelo lelo, umwelaje ishihola hansi panongwa ya lwanda nu bhubhinu bhwaho ubhwa kugalushilagalushila. ²⁴ Imbibhi zya bhamo abhantu zikumanyinka pabhuzelu, na kubhalongolela kubhulonzi. Loli bhamo izya mbibhi zikubhalandata pilongolela. ²⁵ Bhwebhwebhulo, bhamo imbombo inyinza zikumanyiha pabhuzelu, loli zimo izinji zitalivwama.