¹ Ubhuyanzi ubhu bhusubhaliliwa: Pe inga umuntu akwanza abhanji mwimilizi, akwanza imbombo inyiza. ² Pe inga lumo mwimilizi atabhanje wa kulumbuzya. Yikwanzibhwa abhanje mwanavuli wa mwantanda woka. Yikwanzibhwa abhe ni shipimo,, injele, abhanje ahabhela ahinza, uwakusansamuha. Ahondeye abhanje wasambilizya. ³ Atabhanje wakmwela ivihola, atabhanje nulwisi, loli wakumpuma, wabhwihalo. Yikwanzibhwa atahabhe wakugana impiya. ⁴ Ahondeye abhimililaje ahinza abhantu bha munyumba mumwakwe wuyo weka, na bhana bhakwe bhahondeye ukumwivwila umushinzi wonti. ⁵ Kwekuti ungumuntu atamanyile kubhimilila abhantu bha munyumba mumwakwe wuyo weka, alisunjilila ishibhanz sha Mulungu? ⁶ Atabhanje musubhila umupwa, inga pekuti atahinze ayizuvwaje nukugwa mubhulonzi inza vwe bwula umunanzi. ⁷ Yikwanzibhwa wope abhanje na habhele kubhonti bhebhali kunzi, inga atahinze agwe mumusamu na mulwagulo lwa munanzi. ⁸ Abhadikoni, bhope bhahaondeye bhabhanje mukuhondela umushinzi, bhatabhanje nu bhuyanzi bhubhili. Bhatamwelaje ivihola kushila ishipimo pamo kubha nivinyonywa. ⁹ Bhahondeye kuyilema musibho inyinza bhula ubhwanalyoli nu lwitiho yeyihaloleha. ¹⁰ Bhabhanje bhope bhalolesizye isuti, pe lelo bhahondeye kubhomba panongwa bhata na hapisya. ¹¹ Abhantanda bhwebhwebhulo bhabhanje bhamushinzi. Bhatabhanje bhalima ilenga. Bhabhanje ni shipimo bhabhanje bhasubhalilwa kuvintu vwonti. ¹² Abhadikoni bhahondeye bhabhanje bhanavuli bha mwantanda woka woka. Bhabhanje bhahondeye kubhimilila ahinza abhana bhabho na bhamunyumba mumwabho. ¹³ Kwekuti kubhala bhebhakubhomba ahinza bhakubhwaga ubhwilizi ubhwinza nubhujimvu ubhupiti mu lwitiho lweluli mwa Kirisitu Yesu. ¹⁴ Kunsimba ivintu ivi kukwaho, pe nsubhiye kwinza kukwaho isalizi bhulo. ¹⁵ Loli pe inganahabha, kusimba inga pe uhondeye umanya ukuti bhulibhuli kkujenda munyumba ya Mulungu, sheshi bhanza sha Mulungu we mulanzi, lupanda na mwimilizi wa nalyoli. ¹⁶ Pe yitakuhaninkana ukuti ubhwanalyoli bhwa Bhupeli bhwebhuhamanyiha ubhupiti: "Ahaloleha mumubhili, ahalolenkana mwa Mupepo, ahaloleha nu habhizya, ahaloleha mukasi mubhantu, ahasubhilwa na bhamunsi, pe ahanyatulwa kumwanya mubhumwamu."