¹ Penga lumo pabhwandilo ya gonti , nkwanza imputo, nukulambilizya, nizyakulabha, nulusalifwo libhombeshe panongwa ya bhantu bhonti, ² Panongwa ya bhamwene nabhonti bhebhali mubhulongozi, ingapekuti tuhondeye kutendama ubhulunzi bhwabhwihalo nubhutonsu mubhufinjile wonti numushinzi. ³ Ili lyelyinza lyelyitinkine lya Mulungu umposhi witu. ⁴ Uwene akwanza ukuti abhantu bhonti bhapone pebhahondeye bhamanye ubhwanalyoli. ⁵ Kwekuti alipo u Mulungu woka, nuwakubhunganiha woka pakasi nu Mulungu nu mwana mntu we wu Yesu Kirisitu. ⁶ Ahayifumwa wuyo weka inza vwe vwilipwa ku bhonti, inza vwe lusimishizyo mhabhalilizyo ahenesho. ⁷ Panongwa ino, ine neka nayibhisile kuyanga amazwi nu mpositili. .Nkuyanga nalyoli. Ntakuyanga ilenga. Ine ne msambilizi wa bhantu Bhamnkaya mlwitiho nubhwanalyoli. ⁸ Penga lumo nkwanza abhanavuli ponti pala bhaputaje na kwimiliha inyobhe ifinjile kusita kuhalala na bhasita kudalinkana. ⁹ Inzabhwebhulo, nkwanza abhantanda bhayizwalizye izwalo yeyikwitinkana, kumshinzi na kuyidinda. Bhatabhanje ninsisi zyezitabhilwe, pamo zahabu, pamo Lulu, pamo nzwalo zyapamwanya nkani . ¹⁰ Wope nkwanza bhazwale inzwalo zyezibhahondeye abhantanda bhebhakwitiha ubhwitisi bhwakujendela mumbombo inyinza. ¹¹ Umwantanda pe amanyile mhabhele ahabhutosu namkwivila konti. ¹² Ntakumwitishizya umwantanda kusambilizya, pamo ukubha namaha pamwanavuli loli atendamaje mhabhele hakupuma. ¹³ Kwekuti u Adamu uhapelwa pabhwandilo, ahalandata u Eva. ¹⁴ Adamu bhatahamsyobha, loli umwantanda ahamsyobha nzila mbhunanzi. ¹⁵ Inzabhwebhulo, alipona mkujendela mkupapa abhana, inza vwe bhalijendelela mlwitiho nu lugano mubhufinjile ninjele inyinza.