¹ Kwidala ili, imwe mwe bhashi muhondeye kuyifumwa ku bhalume bhinyu mwemwe, ili, bhabhe bhamo bhabho bhehatakushindiha izwi, kujendela mujendo zya bhashi bhabhi bhabhwezizye kukwesa pepatali izwi, ² panongwa bhabho bheka bhakubha bhenyizye injendo zyinyu inyinza poka nu mushinzi. ³ Ili libhombeshe kwekutali amapambo ga kunzi kutabha insisi ivintu ivya zahabu awe ivizyalo ivwa mitindo. ⁴ Loli uwene yibhombeshe ku bhuntu ubhwa mukasi bhwa mwoyo, na bhwanjele kubha bhwinza ubhwa mushinzi ubhwakujimbilila nu kutulila ku mwoyo, bhwe bhwa pamwanya pilongolela zya Mulungu. ⁵ Kwekuti abhatanda abhafinjile bhahayipamba bheka kwidala ili. Bhali nu lwitiho ku Mulungu nu kubhashindiha abhalume bhabho bheka. ⁶ Kwi dala ili Usara ahamushindiha Aburahamu nu kumwita uwene"umwene" wakwe. Imwe isalizi mwe bhana bhakwe pe mukubhomba gegala aminza napemutakupasya imbibhi. ⁷ Kwidala ilyo ilyo, imwe bhanavuli mukwanzibhwa kutendama na bhashibhinyu mumanye kuti kubha abho bhahibhashilindu bhabhinu, mumanye bhabho kuti bhakuposhela abhamwabho abhinji bhabhupuma. Bhombaji shinisho ili kuti iputo zyinyu zitahananjishe. ⁸ Pe, imwe mwenti, mubhe niniya yoka, mubhe nubhwila, ulugano ngati mujenzi, abhamushinzi, na abhapole. ⁹ Mutahalipizye ubhubhibhi ku bhubhibhi, awe ululigo ku luligo. Ishingunga shakwe, mujendelele kusayiwa, panongwa ili muhitwa, ili kuti mubhweze kupwana ubhulotwe. ¹⁰ " Uwene weakwanza kugana ubhwihalo nu kwenya isiku linza we ulidinde ulu lwakwe kumabhibhi na nilomo lyakwe kuyanga imbibhi. ¹¹ Na agalunkane nu kuleha amabhibhi nu kubhomba aminza. Alondole ulusangalusu nu kuyilandata. ¹² Aminso ga Mwene gakumwenya uwanalyoli na amakutwe gakwe gakwivwa imputo zyakwe wope kuminso ga Mwene uko shingunga sha bhala bhebhakubhomba imbhibhi." ¹³ Pe wunanu wekutavwalazye imwe, inga lwe muganile lyelili lyinza? ¹⁴ Loli lwe mukuyimba kwa nalyol, mulotwaje. Mutahogope gala ge bhabho bhakunyila mutahabhe bhakupasyapasya. ¹⁵ Loli uwene, mumubhishe Ukirisitu Mwene ku moyo ginyu ngati mufiinjile. Pe habhili mubhe bhakuyisenganwa kumutamula kila muntu wakubhabhuzilizya imwe shoni mukusubhalila kwa Mulungu. Bhombi ili kubhutonsu na kumushinzi. ¹⁶ Mubhe nu kusuchila ukwinza ili kubha bhantu bhebha kuligana ubhwihalo bhwinyu bhwinza kwa Kirisitu abhwezizye kupezya insoni shinishi bhakuyanga ishingunga konjela kwinyu pa lwe mulikubhomba amabhibhi. ¹⁷ Pe ihinza nkani, lwe Umulungu akugana lwe mukuyimba kwa kubhomba amabhibhi. ¹⁸ Ukirisitu pe ahayimba habhili poka panongwa yambibhi. Wuyo we alimwanalyoli ahayimba panongwa yitu, lwetutali bhanalyoli ili lwe atulete itwe kwa Mulungu. Ahafwa pa mubhili, wope ahabhomba hinza kubha kwa mupepo. ¹⁹ Loli umpepo, ahajenda nukulumbilila umpepo we isalizi aliko kubhipinywa. ²⁰ Zitali nu muhinzi pe ubhujinvu bhwa Mulungu pe bhwali bhukugulilila pe wa Nuhu., insiku zya kuzenga kwa safina, nu Mulungu ahapoha abhantu bhansi--inafasi nane--kufuma ku minzi. ²¹ Ishi shimanyilo sha lyozyo lwe lukupoha itwe isalizi, telwokuti kozya ubhunyazu kufuma kumubhili, loli inga alabha pakusuchila hinza kwa Mulungu, kufumila kuzyuha kwa Yesu Kirisitu. ²² Uwene aliko munyobhe ya kwandilo wa Mulungu. Ahabhala kumwanya. Abhahabhizya, bhebhakubhomba, na maha bhahabhalazimisya kubhashindiha uwene.