¹ Aluu deelo'r ninaw iwa waaraa'hh Yesu dinkwa nee eeharuueeda mibaa nee tsa'r, tare hhayuu't ay baraa' gixsaduu' nee baraa' ayeemoo' dimbadimbay ya/abitor hho' ar waawitiima'r Mungu' kare alki/iit. ² Nee /ameenarka ta netlamer wa ducuut nee ar a hhoare baraa tiqitir dimbayhe /Ameenari aa Mariamuda' ta bay Magdalena tada' taa neetlaame'r faanqw wa duu'x. ³ Yoane nare'r kusa kwada mor'oo' Herode'e ga/aw, susana nee /amenar hatla ar yariir tada moroin ngwa duxut as inoin. ⁴ Nee siwada' xooro' iwa burumburiit dinkwa nee mukoo hatla oo na haradah amo'r Yesu oo baraa' gixsaduu' dimbabe dahha' Yesu ngire i axwee's ner slaqsisi'i ngire ba'y. ⁵ "Heeko ina dahasingw ay qooma'r iwa dahasin dahaasingw ngure tsafiis dahaasingw bahhaale' ale ire paa'hh baraa' urwa kure kall/a'n nee muu nee tsiro ngure /a'y. ⁶ Dahaasingw bahhaale ire paa'hh gawaa tla/u dida hhape kawa ninaw nee niwa ti'iit ire kah' asuma hhape ka ni naw nee na/ama i kahhiya. ⁷ Dahaasingw bahhaale ire paahh baraa' laqaya', dahaasingwda' ire ti'iit wa baraa' laqaya' kure tliiq nee laqaya ire laqwaliika. ⁸ Ala dahaasingw bahhaale ire paahh baraa haaper hho' ire ti'iit ire laqwaal saga wa tsiru. Yesu axweenti ooaro ngiwa hhe'ee's ire uu' ire oo' "'Hee iaa' axamis ngi koom i axaasi." ⁹ Eeharuusero's ngure male mahaa's gidaaba'r slaqsew. ¹⁰ Yesu ngire ba'y, "kuunga tunda guruwi baa/ as xu'uti kawa sleere' ar lu/are waawiti imar Mungu', nee dir mukoo hatle kan intsahhatiiis ner slaqsi'i as kahho' ta qaytsiti makawa a'r nee ta axaasi makawa tsaa'hh. ¹¹ Nee gaari an gidabar' slaqsewi. Dahaasingw aa /aymuu' Mungu'. ¹² Dahaasingwda a paahh baraa' uruwa ana slaqsee' mukda /aymuu ngwa axaasi nee aluwo tlakuusmoda' nee tlaangw nire hardah axwesantada ar Mungu' ngire hengees baraa' muner'ine, as kahho' makawa haratlintii' nee kire ba/amis. ¹³ Nee kwada' a paahh gawaa' tla/u an slaqsee' mukda' /aymuu' Mungu ng'wa axaasi nee kure ila'oh ner qwala/ ala i de/aro koondaka baraa' muner ine tan haratlintii deelo'r ninaw, nee qooma'r iara bina xeer tare paahh. ¹⁴ Nee kwada a paahh baraa' laqaya' a slaqasee mukda /aymuu' Mungu' ngwa axaasi, ala baraa' hotaine ki harba/aba/ nee dawitime nee daqari'ima nee gwal/oo yarir nee kule tliiq nee i /amuu' kondaka' baraa' Muner ine. ¹⁵ Ala kwada a paahh baraa' hhaper ho' an slaqsee'r mukda' /aymu' Mungu' ng'wa axaasi nee kure oh waalo' ner ilaiwa/ame /amuu ngure laqwaa'l ner qitla. ¹⁶ Hindi, hee i kaahh tam oo wa'k oo tsa'aasi ngi daa'. bira o't ngire tuntuuk ner bakuli laq'a ngire qas baraa' guroo' qoqona. A qoo ngin qaas dir geehhoo' as kahho mukda dara'h gwa/ateea ngiwa ariya. ¹⁷ Asuma umoo gar ta luu/ ar geehhoouaka' i kahh laqa' umoo qaaro ar baraa' lu/aare' dirii ar ta geehhoo'eesika i ka'hh ino's bir baraa' gwa/aatema. ¹⁸ Gawaa' idoorihe iia qasasa waalo' tada' ta axanisa' asuma kwada gar kom kan doog waalo' nee kwada ga'r koomaaka tada ninaw i kon kan hayoh. ¹⁹ Aluwo aayoo'r Yesu nee hha'eewo'r tare amoro's kay nee dirose ta hardahika' asuma muu ku u'r waalo'. ²⁰ Yesu kure ba'y "Aayooro'k nee hha'eewo'k ta sihhimiit wa atem kuung tu slaa." ²¹ Yesu ngire bay', "Aayoor'ee' nee haae'ee' an kwada /ay muu' Mungu' ng'u axamisa' nee ng'u ilaiwawa/a'." ²² Balorka wake Yesu nee eeharuusero's tare tsa/a'n gawaa' malahmo nee ngire ba'y, "Gwese' a waaraahhaan' ay mantlimoo tsa'r." Tare waara'hh. ²³ Tawa tlay Yesu ire guu' bambeeor dihh ar fur'a koom nire harda't, ngire baraa' tlawtii ee'r malalimoda ire hatsamuhi ee's ma'eewo nee inoin ta baraa' tsaxwaa. ²⁴ Yesu eeharuusero's ngure tleesa'r eer ta kaahi, "Aakoo ur aga hhaamaan," Ire tlay fur'ada nee bambeeoda' ar baraa' ma'ay ngire i gahhaat ire xaslit. ²⁵ Yesu ngire male ba'y, "Haratlintaorhung i amola?" Tare da'ayuu't tare wa/oo/amin tare kiloin axwees's takaahi "Heewi a ma'aa' tam fur'a nee maaay bir ng'a i gahhaat kun ilaiwa/a? ²⁶ Tare harda'h baraa' gixsa'r Gerasini tada aluuwi dirii dir Galilayaro. ²⁷ Yesu iwa aweer yamuu ngiwa adah, heeko oo baraa' yamuda tina ihhaatlii, nee heewi a hee neetlaame aa ee'r. Deelor yariire tlaba ngi dahamamisiika, nee baraa' doo' ngi hootatinka' dir i hooti a baraa' bau. ²⁸ Heewi Yesu ng'uwa a'r ire uu' ner afor' ur ire oo', Ani ga'r na kuungi tlee'hh a mila Yesu Garmaa' Mungu' kwada gawti dirii? Un fiririim ani mi sle'eemisaar. ²⁹ Yesu neetlameda' ngire i gahhaa't as iwa ti'iit gawaa' heedadae, asuma deelo'r yariire ngun aaee'r nee kun tsegaagiit ner minyororo daba nee ya'aawo nee kun xumxaaxu'un morooda' kur tsegaagiti ngun tlaqaqaat ne tlaame ngun gusasiin ay baraa' yaamuu' duruq. ³⁰ Yesu ng'ure mahaa's ngure ba'y "Umoowo'k a ma'aa? Ino's ire oo', "Umoo'ee' a " Daqa" Asuma ino's neetlaame'r yariir ngu'na ee'r. ³¹ Neetlame Yesu ngire fiririin as makawa /etiis baraa' bohontoo' qwanaay. ³² Didae daqta bayno i dee'r ar ta de'en wa qawaa' tlooma neetlaame Yesu ngure firiin as iwa dat baraa' daqtada' ar baymu. Yesu idosi ngire ya/a'n. ³³ Gawaa' idoorihe neetlaameda ire ti'it gawaa' heedada'e ire da't baraa' baymuda' nee daqtada' ar bayno ire ti'iin wa baraa' /etaa'ngw tlooma ay baraa' tlawi nire hhane' baraa' ma'aay. ³⁴ Nee mukda' baynor' de'ee'm idoda iwa tleehharut ngiwa ariye tare ti'in tare diya/amiit tada aa tleehharut kare alki/iitoo' a'y baraa' gixisada nee baraa' maree' in slawee' in oo yamuda. ³⁵ Muu idosi kawa axaa's tare tla'y, idoda aa tleehharut kawa qaytsoo ay', tare harda'h dir Yesu heedadoo' nee tlaame aa ee'r ku amohhoo', tlabawo's ng'a daha's nee sagowo's i qon ino's aa iwiit dir ya'aa Yesu, tare da'a yuu't. ³⁶ Aluuwo hee wa'k baraa' tla/angwine oo tada a tleehharut nga ar ngire alki/iit dir muko' hatla idor heedadoo' neetlaame gusasiin kura hhoo'ee's. ³⁷ Muu slee'meero oo baraa' yamuu' Gerasi nee inslawayda' Yesu kure firin iwa tlay ayaine asuma naa da'ayutii waalo' Yesu ire da'h baraa' malalimo'. ³⁸ Heedada' neetlaame kawa duxuu't Yesu ngure firin as tiwa kona nee ino's ala Yesu ngure ki/is ngure ba'y. "kii/ amo'r dook nee tada slee'meero Mungu' naa kuungi tleehh alki/iteek. ³⁹ "Heewi ire tlay, tada slee'meero Yesu aa dirosii tlee'hh ngire alki/iit baraa' gixsa slee'meero. ⁴⁰ Yesu ire kii/, kure kwahha's nee boo/ee muu, asuma kundaamaaran. ⁴¹ Qaytsiit heeko wa'k ta ba'y Yairo nire harda'h, ino's aa hee wa'k baraa' waawitoo' maree' saalingw. Yairo ire huu'dir ya'aa' Yesu ngure firin as tawa amo'r do'o's ka'y. ⁴² Asuma dasiro's tooka wa'k kilo's ar kurerii mibaa nee tsa'r i tiq waalo' tsaxwa gwa'ara. Yesu iwa amoda' kay kure tliiq nee boo/ee' muu. ⁴³ Nee /ameenirka ideer ara tiq kureii mibaa nee tsa'r tiqtiro's a tseerdu in wa/amina' ire hi'imaanit wa mare' qwa slaare moro'wo's ngure fa'k hhilaaro, nee hee gaa hhooees i kaahh. ⁴⁴ Ire harda't dir aluu' Yesu tlinee' iqwariros ngure kwatit, siwaadar kila tseerduda nire qwarii. ⁴⁵ Yesu ire oo', "Hee' ani aa kwatiit?" Tawa sii slee'meero, Petro ire oo', "Aakoo boo/ewi yariir oo muu kuung un gon'omis nee ture tliiq. ⁴⁶ Ala Yesu ire oo', "Hee' wa'k ani ina kwatiit nee una tsaa'hh asuma /uuru ina ti'iit wa amor'ee'." ⁴⁷ /Ameenida ngiwa aan ido'r tir lu/ kiahh gawaa' tada a tleehhi, daaraxaay ngire ay, ire hu yaamu dir geeraa' Yesu ngire alki/it wa dir geeraa' muu slee'eero ga'r tlinee' ungwariro's ngusa watit nee ido'r ira hhoo'eer siwada'r kilae. ⁴⁸ Aluuwo Yesu ngire ba'y, "Dasi, "Haratlintaaoro'k iga hhoo'e's, "Tlaw ner wayda." ⁴⁹ Qooma'r Yesu iwa dir axweenti kahi, heeko nina harda'h i amo'r doo waawitumoo' oo doo' saalingw daahh i kaahi, "Dasiro'k a gwa intsahatusmo mu tawo dawimitisar. ⁵⁰ Nee Yesu idosi ngiwa axaa's ngure ba'y, "Mada'ayuumitar ani haratlintiang nee ino's is slaf. ⁵¹ Ino's iwa da'h baraa' do' ino's nee Petro, Yohani nee Yakobo, baboo' dasi nee aayiro's mu'k hatla ngwa dahhasika baraa' do'. ⁵² Qooma'r muu slee'meero tawa hhimausi nee tawa baahhuusi asuma ne/eesi, Yesu ngire bay, "Ma baahhuusaara' a gwaika' ina qa't. ⁵³ Ino's kure waaqaasen ner waaqaama asuma inoin ngiwa xuiya' a gwa. ⁵⁴ Ala ino's, dosida' ngire dawa oh, ngire /akaa' ner afor ur, ngire ba'y, "Na/a'ay, tlawang!" ⁵⁵ Qeeruuwo's ire kii/ siwada'r kilae ire sihhit, Yesu ire oo, moroo'/ayma ti hariise'. ⁵⁶ Xwayliteero's ire waa/o/waalo/ aluwo ngire hara'eyin ar gidaba, ti a tleehharuut ma ooara' dir heewo.