¹ Balorka wake Yesu muu nguna itsaahhatimiis wa baraa doo saalingw nee /aymuu Mungu ngure alki/iit, geraharuser uren nee itsaahhatuser hara'ayar kure i daqay dinkwa nee bariise. ² Tare axwees kure bay "Ti adbet morowi ta tlehhit aleesleremuu kur tlehhit agala? Laqa a ma'aa aleesleemusi ngwa hariis. ³ Inos ngire bay "Ani sleeme a mahamiis Oaari. ⁴ Baatiismoo Yohani i dawri dahhi laqa amor muu? ⁵ Tare kiloin axwees tare kah Bara ooan i dawri daahh ti mahaas gidaaba musa haratlintiika? ⁶ Nee baraa' ooan amor muurngin daahh, tundu tlaaqw ner tla/e asma Yohani kwaa tsaahh idor tar aarusmo. ⁷ Gawaa idorihe kure bay ngu xuiyaka amor i dahhi. ⁸ Yesu ngire bay Ani sleeme ngi ooaka aleesleemuu morowi ngur tlehhit. ⁹ Muu ngure slaqaserwi bay Heeko wak qaymor sabiibungina dahaas aluwo ngire saayin dir doosluser sabiibu aluwo inos ire hhayuit amor ayaa saaw ire hoot deelor yariir. ¹⁰ Qoomar bu'uung iwa xeer lawaalmowo's ngure ya/aaw amor doosluser sabiibu as bu'uung nguwa bihha leehhi. Aluwo doosluser sabiibu ngure dif kure ki/iis ner dabaa tawo. ¹¹ Aluwo lawaalmoo hatla ngure male ya/aaw nee inooin kure male diif kure kilqiis waalo nee kure ki/is ner dabaa tawo. ¹² Oo tam ngure male ya/aaw inooin kure tlaqimiis nee kure guus baraa qaymodae. ¹³ Hee qaymo loo ire oo idor ni /iis a idola? Garmaee kwada oo sla'arusmo un ya/aaw dooqa bur kwa ar ngu ilaiwa/iya. ¹⁴ Ala doosluser sabiibu nguwa aan tare kiloin axwees ta kahi, kwi an aliitumowos un gasaan kahho alii a toren. ¹⁵ Kure duux wa baaraaa qaymoda kure gaas. Aso heedoo qaymo loo ador mu /isi a idola? ¹⁶ Bir na hardah aqo dooslusedar sabiibu gan qororo'os nee qaymosi ngire mu'k hatla i hariis. Ala inooin kaangwsi nguwa axaasii tare oo' Mungu aa sii. ¹⁷ Ala Yesu ngire i qaytsiit ngire bay Goirii gidabaro's a mila? Tla/aar qwatsiruseua si aa tla/aar ur tleehhiti ar do ira gawduy? ¹⁸ Umoo hee kwada aa huu gawaa tlaa/ari aqo in qeqetin. Ala kwada tla/aari aa i hur inos in nasusu'ut. ¹⁹ Aluwo wawitoda uren idor kur oohi kare leleehh siwadar kilae asma kana tsaaha slaqaseeda aa axwees an inooin. Ala kuna daayut ooharo asma muu. ²⁰ Ala kure tawo ga/aay ner fuqraangw muu kure ya/aaw oo taa slaqsee muk gana'amuu koom tleehh as kahhoo /aymu kuwa slay baraa' axweesenewose oo kur sakwasleemuuti dir ga/aawsmo wawitoo uren. ²¹ Inooin Yesu kure yohaas ta kaahi itsaahhatusmo aten a xuan kuung tada gana an kat nee an itsaahhatimis moroo loema nee kangw uroo hee u yahamiska ala kuung an itsaahhatimis uruwar loemaa Mungu'. ²² A harimaro waawutmoo muk Roma kuwa kodir i hariisaan laqa aasla'ay? ²³ Ala Yesu fuqrangw in kwad ngure tsaahhi ngire bay, ²⁴ Asso peesmosi laqaamare slaqsewi gawakii dirii nee gooirihe awa ma'aa? Tare oo slaqsewi nee gooirihe awa waawutmoo muk Roma ²⁵ Yesu ngire bay Ar waawutmoo mu'k Romar wa hariim amoro's ti hariise nee ar Mungu' wa hariim amoro' ti hariise. ²⁶ Ala gawaa axweesenewo's kwada a haahi ooharo kwa alesslayka dir geeraa muko tare waa/ooo/as axwesenewos kwada tare xasliit. ²⁷ Mu'k sadukayo bihhale Yesu kure i daqay kwad kahha waslo/a i haahh, ²⁸ Kure mahaas ta kaahi itsaahhatusmo Musa hara'aya ngina atee i gooin ar gidaaba hee bar hhiyawo's aa gwaa nee harer a geexay bira na/ee koondaka hhiyawo's ngi aali as doo hhiyawo's iwa tlay. ²⁹ Hhaekaari faangw i daya ooo geera ina duxun ire gwaa na/aay ngu konka, ³⁰ nee tsar sleeme ngire aal. ³¹ Oo tam sleeme ngire male aal nee sleemeero faangwamawo nee tare hhan. ³² Aluwo haredar kila ire gwa sleeme. ³³ Balodar waslo/a birna hardat inos a haree ma'aa? Asma sleemeero faanqwamawo ka duxuut. ³⁴ Yesu ngire bay mu'k baraa yamuka ir duxuxun nee kin duxuut. ³⁵ Ala kwad hariima waaslo/isaro nee tare dah baraa slafungu alhhhe'ese wasl inooin i duxuna'aka nee ki duxutika. ³⁶ Nee i male hhana'aaka asma inooin a idor malayke nee inooin a na/aa Mungu' asma i waaslo/oo kona. ³⁷ Ala muksi a hhan ku waaslo/aatisi tam Musa nga geehhoutis dir ka igooin a dir kangwdoo sla/a dida Aako nguwa /akaa ner Mungu Ibrahimu nee Mungu Isaka nee Mungu Yakobo. ³⁸ Hindi inos aa Mungu mu'k aa hhanika aa Mungu mu'k slaaf asma sleemeero i hootiya wa diro's. ³⁹ Itsahhatuser hara'ayar Musa tare oo itsahhatusmo ar lo aga o. ⁴⁰ Inooin ngwa qitliika mahasto moroo yariire. ⁴¹ Yesu ngire bay Ner idola muu iwa kaahi gidaaba kristo aa na/ee Daudi? ⁴² Asma Daudi inoso kila baraa' saburi Aako nguna bay Aakoe: Iwiit amor dukw'ee oo doo /uyay. ⁴³ ay dir wakuserok ngay qaas baraa yaawok. ⁴⁴ Daudi Dristo ngun /akaka ner umoo Aako aluwo idor tar garmaa Daudi? ⁴⁵ Muu sleemeero qoomar tawa axamisi eeharuuseros ngire bay. ⁴⁶ Ti harmagahhe nee itsahhatuser hara'ayar mose kwada hiimita nee tlabaa tlet nga dahasii nee kiwa lawe'emisi ner ilaiwa/ame dir bo/ee muu burkwa kay nee kiterii geera kina iwiwiit baraa' maree saalingo nee baraa maree kiwa kwahhas dir moroo/ayma. ⁴⁷ Inooin sleeme tan /ayayin wa baraa' maree kwe'eli nee firor yariir kan tlehhahhiit, muk idor kwi sakwasleemar ur waalo ngi slaya.