¹ Qoomaadae waawutumoo' mu'k Rumi kwada' ta ba'y Augusto hara'eya ngina qaa's gidaaba' umer mu'k baraa' yaamu slee'meero ka gooin. ² Gair an gooir geera qooma'r kirenio tawa waa wutumoo' yaamuu' Siria (Shamu). ³ Idoorihe muu slee'meero tare ume'er'in gooir a'y umoo'qo heewo dir gixsar'in. ⁴ Yosefu ino's sleeme ire Galilaya'r wa tla'y baraa' gixsar Nasaretir wa ale ire tsa/a'n yamuu' Yudea ay dir gixsa'r Daudi ar ta ba'y Beti/ehemu asma ino's tawa oo tlahha'y Daudi. ⁵ As kuwa gooin ino's sleeme tina kone nee Mariamu tada a xabuu's nee ino's a atsihay. ⁶ Tawa amooda i kahhi deelo'r xwaylaro's ire xeer. ⁷ Na/ay Garma oo bariisimay ngure xway/uu'r ngure uutsu's nar inqwaroo' na/ay qawrir i ale. Ngure qaatis baraa' naqimoo' gitso'r hikwa ki i qamaamin asma baraa' doo' dahaayero pa/aangw kwaaslayiika'. ⁸ Nee baraa' yaamuudae de'eemuuserka i deer ar baraa ' tleesaana'y hoo't ar bee/angw xumxaaxuu'm amsiiwo anr hariimadu de'eengw. ⁹ Malaykimoo Aako ngire haraa ti'iit kire igwa/aa't nee xirfu Aako bahhe slee'meero da'ayer u'r ngire eer. ¹⁰ Malaykimooda' ngire ba'y, "ma da'aymiitaara asma ani kuunga' tunduna iidigoo' hho i huu'w oo qwal/oo u'r dir muu slee'meero. ¹¹ Asma bili baraa' gixsa'r Daudiwo ba/amusmoo hung kwa laqwaal a Kristo Aako. ¹² Laya'r ta andaa' a ti "U diida' i eera na/ay qawri oo ta uutsuu's nar inqwarooo' na/a'y qawri kwaa qaatis baraa' naqimoo' gitsa'r hikwa ki i qamaamin. ¹³ Nangay qoomaada'r kilae daqta yaarir ar gawaa' dawri ta dinkwa nee malaykimooda' ta Mungu' xirfeemiis ta kaahi. ¹⁴ Mungu' gawata i dirii' i xirfuuti nee wayda ni hardahi baraa' yaamuu' i ale dir mukda a gurtleemuu' i hariis. ¹⁵ Malaykaadunda' iwa gawaa' dawri i ki/ii de'eemuuseeda' tare axwee's ta kaahi "Gimse a tlawaa'n ay Betilehemu a arta awaa'n tada a tleehharut, Aako naa ate'n i oo'. ¹⁶ Tare gaansle'r tla'y Mariamu kare dida' i ay nee Yosefu nee na/aydoo' qawri kwaa qaaatis baraa' naqimoo' gitsor hikwa ki'i qamaamin. ¹⁷ Idoori ngawa arii kangwad' ka ba'y gawaa' na/aywihe kure oo' dir muu'. ¹⁸ Mukda aa xaas slee'meero tare waa/oo/ asma ti de'eemuuse aa o'. ¹⁹ Ala Mariamu ti slee'meero ngire baraa' muunoowo's i qa's ngiw aldakw . ²⁰ De'eemuuseeda ire ki/ ta hara Mungu' xirfeemiis nee kuwa sluufimiisi asma tada sleemeero ta axaas's nee ta a'r idooda kaar dir'in i oo' nee malaykimo. ²¹ Baloo' deelo'r dakaa't iwa herda't tada'r al/utloo umoowo's kure ba'y Yesu idooda malaykimo ngwar oo' iimir kwa wa tsihiika'. ²² Tsiku nawa huui'i idooda hara'eyar Musa i kat Yosefu nee Mariamu tare Yerusalemu' ka'y kuwa dir Aakoo i hariisi. ²³ ("Ido'r kaar gooin baraa' hara'eya'r Aakoowo Umoo'qo na/ay bariisiima'y oo garma dir aayir ine, ku ba'y oo hhoohhoo' dir Aakoowo"). ²⁴ Gar hatla sleeme inooin a tleehhii a ilahhoa kaa hariisi idooda hara'eyar Aako i kat "tlawaa tsa'r laqaa' na/aa' tsa'r oo tlawaa'. ²⁵ Baraa' Yerusalemuwo heeko i deer umoowo's a Semeoni, ino's a hee' ganaa oo Mungu' ngwa haratlintii' Gurkwa/asar mu'k Israeli ngin daamaara'n nar haraxu'uti, ino's qeeruu' hhoohhoo' ngu ko'n. ²⁶ Ino's kwa geera' wa xu'uti'is nee qeeruu' hhoohhoo' gidaaba' i gwaaiika' ay dir Kristo Aako ngu ari. ²⁷ Deelo'r ka wake ire baraa' doo' Mungu' ka'y kwa wa gerahar nee Qeeru, Yesu kwa wa huu'w nee xwayliteero's baraa' doo Mungu' as harmaaduu' hara'eya kiwa tleehhi ino's wa ale. ²⁸ Simeoni ngure ilaoh nar dabaawo's, Mungu' ngare xirfeemiis ire oo'. ²⁹ "Aako alkwi'i as gdiyuusmoowo'k ya/aamar gwa'ara ngi sla'y nar wayda idooda kaar o'. ³⁰ Asma ilaa ee' ba/amaro' nga arii. ³¹ Balaro'k tada' ta amohhe'ee's dir ilaa' muu slee'meerowo. ³² Ino's tawa Gwa/ateemaa' gwa/aata' dir xoorduuwo nee tawa xirfu dir mukok Israeliwo. ³³ Baaboo'in nee aayir'ine kare waa/oo/amo'r wa a'r tada ta ino's i kaahi. ³⁴ Simeoni ngire tsuuqa i hariis, Mariamu nayo'r na/aay ngire ba'y "ia qaasee, kwi kwa qaa's asma oo yaariir iwa huuiya' nee kooqa niwa sihhiitiya' baraa' mu'k Israeliwo nee iwa laya tleehhiti ar tar kaangaanuusi. ³⁵ Asma hhaslor baraa' muner' mu'k yaariir iwa geehhoour, nee kiing sleeme gurhaami a aa'n baraa' muunoowoge." ³⁶ Aaruso'orka ar /ameeni i deer umoowo's a Ana dasir Fanueli ar tlahhay Asheri, ino's a /ameenir a diin lo' wa ale'. Tana ala hoo't nee hhawaa toowo's kureeri faangw aluu' duuxoro. ³⁷ Nee ino's a kwaalo'or kureeri mibeeri'dakaa't nee tsiyahh. Baraa' Doo' Munguhe i ququtlatliindaaka aqo in saalaliin amsi nee tlaatla/aango iwa gwaa wiwiin nee iwa fiririin. ³⁸ Ino's nina ti'it qoomaada'r kilae i Mungu' sluufimis iidigoo' na/aay ngure o' dir mu'kda' slee'meero oo harafaaro nga qaasil gawaa' ba/amar Yerusalemu. ³⁹ Tada' slee'meero taa oo' baraa' hara'eya'r Aakoowo tleehhemko kawa hhe'ee's tare kii/ Galilaya ay dir gixsa'r Nasereti. ⁴⁰ Nee na/ayda ire ura'y /uuru ngure slehh fuquraango i haats nee i tsuuqa Mungu ko'n. ⁴¹ Xwaylitee'ro's i Yerusalemu' kaakeer umoo kurko qooma'r deelo'r ur ar Pasakaro. ⁴² Ino's qooma'r kureeri miba nee tsa'r ngawa a'y tare tsa/a'n Yerusalemu'r i ale idooda ta ta /iimamisi. ⁴³ Deelooda' ur awa waara'hh qooma'r ki/imaine ma/ay'in Yesu ire aluu' i mee't Yerusalemur ale. Ala xwayliteero's iidig ngu koondaaka. ⁴⁴ Inooin geera kawa xui inooine ta al dinkwa nee Yesu baraa' boo/aydoo' hhaytuuseero. Looa awa da't kure leelehhiit dir mar eefooine nee dir mu'k ta xui. ⁴⁵ Kwa wa slayiika, tare kii/ Yerusalemu kuwa leelehhiiti. ⁴⁶ Deelo'r ta'm awa waara'hh kure baraa' Doo' Mungu' wa sla'y aa iwiit tla/angw instsaahhatuuse ngi iiar i qamin nee ngiwa yaahamiisi. ⁴⁷ Mu'kda' axamiis slee'meero sagalooaro's kare waa/oo/amo'r wa a'r nee ido'r axweesani ngir warqeemiis. ⁴⁸ Xwaylitee'ro's ngwa wa aa'n tare waa/oo/aayo ngure be't "Garmaa'ee' mistinda idoori /is. Aso qaytsiit Ani nee Baaboohung kuung una leelehhaahhitaa'n nar Gurhaami." ⁴⁹ Ngire ba'y, "Ihii ga'r as leeleehhita'? Aa xu'aaaake gidaaba' ga'r ani tiwa hariim an baraa' Doo' Baaboore'n wa hoo't?" ⁵⁰ Ala idooda inooin nga ba'y ngaa tsaahhi'iika. ⁵¹ Tare al tla'y ay Nasareti ino's ire komiit ilaiwa/ameero, Aayir in ti slee'meero ngire baraa' muunoowo's i qa's. ⁵² Yesu ire komiit iwa uraray fuquraango's iwa doogiigin, Mungu' ngure qwala/aa's nee muko.