¹ Mu'k Yaariir iidigso' morooda' yaariir aa tleehharuut diirene ngwa iia'r gooiro. ² Ido'r kuungwar ate'n i alki/iit nee mukdoo' aang ngwa ar nar ilaain iimir geera'wo nee oo axweesantada' nga alki/iit. ³ Idoorihe anoo kila iidigoowi ukwa lo' wa tsee/aariim iimiir amooda'r iimu/ungw wa ale. Ani ngiwa slaa' sleeme ka hhoo' ngiwa kuu'ng teofilo? Xirif i gooiim ido'r umoo'qo geero ar tleehharut. ⁴ Asma kuung' kawa tsahh ido'r tar lo' tada' kuunga' taar intsaahhatimiis. ⁵ Deelo'r waawutmook oo yaamuu' Yudea oo ta ba'y Herode geeraharusmooko oo saalingw mu'k Yahudi i deer umoowo's kuba'y Sakaria oo barta' mu'k Abiya. Hareero's ar tlahha'y doo' Haruni umoowo's a Elisabeti. ⁶ Inooin tsarkwawo a mu'k ganaa' dir Munguhe haraeyar' Aako slee'meero kana oh nee axweesanto's idooda ir hariin. ⁷ Inooin Na/ay ta kon i kaahh asma Elisabeti a kamparto'o nee inooin tsarkwawo na dimaadine. ⁸ Boolorwake Sakaria ina gadiyer saaliingw geerahara tleehh dir geera Munguhe qooma'r huuman da'r mu'k barto's. ⁹ Ino's tsawdito nguna sleer idooda ta tseehhaahhiiti /imaasiye nee geeraharuuser saalingw mu'k Yahudi iwa dahi baraa' Doo' Aako asma gaoka moya'ngw tsuu' koom ngiwa da/i ilahhooar Mungu' wa ale. ¹⁰ Nee boo/a'y muu slee'meero i afeenir wa firiirin qooma'r gada' mogangw tsuu' koom kawa da/a/an. ¹¹ Malaykimoo' Aako ngure harati'iit aa sihhiit bahhii doo' /uyay oo meesada'r mroodamoya'ngw tsuu' kuwa da/a/an. ¹² Sakana malaykamooda' ngwa wa a'r ire amoqwaa'r da'ayeero. ¹³ Ala kuna ba'y nee malaykamooda' Sakaria ma da'ayumiitaar asma firooro'k kaa axaas nee hareerole Elisabeti Na/ay Garma ngu xwayluu'r umoowo's ku bet Yohana. ¹⁴ Kuu'ng tare qwala'/ tare bara'/ nee mu'k yaariir xwaylaro's kare as qwalalaa/. ¹⁵ Asma uraay nga sla'y dir Aakoowo. Difaai ngi wahhika laqaa' umoo'qo ga'r qo oonitimisa. Ino's ku hatsis iis qeeruu' hhoohhooe iimir la kunguwa laqwaali. ¹⁶ Nee mu'k yaariir oo Israeli ngu ki/is amo'r Aakoo Munguin i ale. ¹⁷ Ino's in geeraawo's wa hi'iit nar munoo' ido'r kwadoo' Eliya nee /uuruuwo's as muner baabu' ngiwa warqeesi iwa amo'r na/ii i ki/, nee mukda' aa dakuu kuwaququra'ngw i hariiri faqurangwdoo' mu'k gan'muu as mu'k Aako nguwa geeraa' wa amohhe'eesi'. ¹⁸ Sakaria malaykimo ngure ba'y "Idoose ani ido'r ngir tsaahh, asma ani a aako nee harer' ee' a aama'r a qaroo' diin'." ¹⁹ Malaykimo ire oo' "Ani a Gabrieli kwada' qeera Mungu' i dirii' ani tina ya/aaw ngiwa diro'k i oo' nee iidigoowi hho' nguwa hariis'. ²⁰ Hinti ku ga/aaweeka ala a afaawasli tleehhit, axweesani a harslaaqat ay bo/oo deelo'r kaangwi i boo/i. Asma axweesante'ee' aka ya/aandika ila ino's iqo bo'/ qoomaaro's birna xee'r. ²¹ Mukda' Sakaria daamaaraa'm ire waa/oo/ as tligmaawo's baraa' doo' Mungu' wa ale. ²² Ala aluuwa nawa ti'iit amor'in i axweesani ngi aleeslayka' kare tsaahh gidaaba' iigu'utu ngwa slay baraa' doo' Munguhe ire amor'in i axwees nar dabaa' axweesani ngire as ili/iika. ²³ Deelo'r huumaandaro's iwa fa'k ire waatl amo'r do'owo's. ²⁴ Deelooda' awa waara'hh hareero's Elisabeti ire tsit tire lu'/ slihheeru kooa'n i kat. ²⁵ "/doori Aako ngina dir ani i tlee'hh baraa' deelooda' slee'meero awa ga/ay, as murer'ee' ngiwa hengeesi dir muko." ²⁶ Qooma'r tsihheewo's tawa slihheerii lahhoo' malaykimo Gabrieli kuna ya/aa'w nee Mungu' ay gixsa'r Galilaya ar ta by Nasareti. ²⁷ Amo'r dasir faangimo tooka ta xabuu's nee heeko ta ba'y Yosefu oo tlahha'y Daudi umoo' faangimooda' a Mariamu. ²⁸ Malaykimooda' ire do'owo's i da'h ir oo' "Laawaay kiing tsuuqa ika slee'r Aako nee kiing a dinkwa." ²⁹ Ino's ire amooqwa't wa lo' asma /ayme'eerido' malaykimo ire baraa' muunoowo's i o' "Laawaaywi' a laawa'y idooda?" ³⁰ Malaykimo ngire ba'y "Ma da'ayuutaar Mariamu asma tsuuqaa' Mungu' ika slee'r." ³¹ Ga/aaweek kiing a tsit na/ay Garma kure laqwal, umoowo's kure bet Yesu. ³² Kwi uraa'y ngun sla'y ku ba'y Garmaa' kwadoo' Gawata' i dirii' nee Aakoo' Mungu' ngu waawti'iimar Daudi i hariis gidaaba' waawuti'iima'r Baaboo'in. ³³ Hhay Yakobo ngin as waawuti'in kureerisleem nee waawuti'iimaro's ka alhhe'eesa'y wasl. ³⁴ Mariamu malaykimo ngure bet "idoose ta akat ido'r tleehharut asma ani ne hhawaata aka alqataanika'." ³⁵ Malaykimo ngire ba'y, Qeeruu' hhoohhoo' ni diro'k i harda'h nee /uuruu' kwada' Gawti i dirii' kiing i tuntuk. Gawaa' idoorihe na/a'y ta laqwaali ku ba'y Oo Hhoohhoo' Garmaa' Mungu'. ³⁶ Slami qaytsiit male'ale mar' afto ooro'k Elisabeti a tsiiha'y wa na/ay Garma baraa' diimaywose. Alihheengwi oo lahhoo' ino's tada geeraawo tawa kaahi kamparto'o. ³⁷ Asma dir Munguhe ga'r si'iitaauut i ka'hh." ³⁸ Mariamu ire oo' "Ani a lawaaliror Aako idooda' ta dandoeeo i tleehharut" Malaykimo ire quut' dirose. ³⁹ Nanga'y deeloodae Mariamu ire tleer nar ganslaay ay baraa' yaamuu' tlom'i dir gixsarka wa'k ar yaamuu' Yudea. ⁴⁰ Ire daqeer ay doo Sakaria ire da't Elisabeti ngire lawe'e's. ⁴¹ Elisabeti laawa'y Mariamu ngwa wa axa's na/ay niinaw ire nee't baraa' guro'owo's wa ale Elisabeti kare hatsii's Qeeruu' hhoohhooe. ⁴² Ire tse' nar afor qwal/amaaye ire oo' kiing ta tsuu'q bara' /ameenaro, nee na/ay ta laqwal kwa tsuu'q Sleeme. ⁴³ idoori ido'r ar tleehharut bili tam aayir Aakooee' nawa amo'ree keer? ⁴⁴ Asma afor laawaaywok ani ngawa axaa's na/a'y niinaw ire laa's nar qwal/ baraa' gurooee' wa ale. ⁴⁵ Amohhoo uso'o a ino's tada a haratlinti asma tada Aako nga ba'y i bo/. ⁴⁶ Mariamu ire oo' "Muunooee' idor Aako kur ur ngwa tsaa'hh ngun sluu'fmu's." ⁴⁷ Nee qeeruuee' in Mungu' as qwa/a/aa/ Ba/amusmooee'. ⁴⁸ Asma lawaalito'ooro's ar leetlaak nga gurtla'y Ga/aaweek iimir hintihe gari slee'meero an i bet tada' tsuuqa nge sleer'. ⁴⁹ Asma kwada' /uuruu' koom ani a gar ur i tleehh nee umoowo's a kwada' hhoohhoo'. ⁵⁰ Nee gurtleemuuwo's i komaamir umoo'qo qarto dir koka ino's ngu ilaiwawa/a'a. ⁵¹ Kangw u'r ngwa tleehh nar /uuruu' dako's kwada ' daara/aama baraa' hhasloenunerine' ire nga diyaa/. ⁵² Na/aa waawita nga hengee's gawaa' waawuti'iimar ire kwadaa' leetlakwen nga uray i hariis. ⁵³ Kwada qwariita' nga axiis nar moroohhoo' nee daqare nga tawo ki/is nar dabaa kahaare'n. ⁵⁴ Alee/iisaay ngwa hariis dir lawaalmoowo's Israeli gurtleemuuwo's ngwa sagaaqwareesiika'. ⁵⁵ (Idooda' ngar axwees dir baabi'iiren) dir Abrahamu nee xwaylaro's alhhe'eesay wasle gidaaba' gurtleemuuwo's iboloo faaki'ika'. ⁵⁶ Mariamu nee ino's Elisabeti tare hoot qooma'r slihheeri ta'm aluuwo ire watl amo'r do'owo's. ⁵⁷ Elisabeti deelor xwaylaro's awa xee'r na/ay garma ngway xwayluu'r. ⁵⁸ Inslaawaywo's nee mar eefoowo's kare axaa's gidaaba' Aako nga lo' wa gurtla'y slee'meero tarti qwalalaa/ nee ino'se. ⁵⁹ Boloo' deelo'r dakate tindina na/ay al/utlo'r ay umoo' geera kuwa tsata awa slai a Sakaria Baaboo' in. ⁶⁰ Ala aayir in ire oo' "A'a uma a kwisiyeeka' umoowo's a Yohana." ⁶¹ Kare ba'y, "Hee' umoosi i kaahh baraa' muk marefouoge." ⁶² Tare dabaa'r ilawaats amo'r baaboo'in i ale as ino's umoo' slai a ma'a'. ⁶³ Baaboo'in Peehhi ngire firin ire gawada' i gooin gidaaba' "umoowo's a Yohana" slee'meero kare waa/oo/. ⁶⁴ Qoomaada'r kila afko's ire gweerit, axweesani ngire ya/a'n ire axwee's Mungu' ngure xirfeemiis'. ⁶⁵ Mu'k yaamuuda' i tseew slee'meero da'aye ngure ee'r nee kaangwi aa tleehharuut slee'meero ire harda'h ay baraa' yaamuu' tlom' i Yudea. ⁶⁶ Muu slee'meero oo kaangwi ngwa axaas kure baraa' muner'in i qaa's tawa kaahi "Na/aywi aluuwo a hee' idoola? Asma /uuruu Aako i baraawo's. ⁶⁷ Baaboo'in Sakaria kure hatsii's qeeruu' Hhoohhooe ire aarin i kaahi. ⁶⁸ "Aakoo' Mungu' Israeli i xirfuuti asma a harda'h dir muko's i ale' nguwa gweeri. ⁶⁹ Ba/amusoo' /uuruu' koom kwa sla'y baraa' tlahha'y Daudi wa ale, lawaalimoowo's. ⁷⁰ Idooda' ngar qaroo' oo' nar afii aaruuseero's ar hhohho'l. ⁷¹ Ate'n tiwa ba/amisi dir wakuuseerene bee gawaa' dakaa kwadaa' slee'meero ate'n tundu ahhita'. ⁷² Idoori ngun /iis asma asma baabi'iire'n ngina gurtlay alqadaooro's tada hhohho ngire insla'y. ⁷³ Alqadooda a garos alqadin dir baaboore'n Abrahamu. ⁷⁴ Gidaaba' ate'n tindi wa gweeri gawaa' dabaa' wakuuseerene nee kuwa asgadiyuusaan nar muner hhohho' nee ar ganaa. ⁷⁵ Baraa' gar'amuuwo tawa da'ayuuni taawaka' dirose deelo'r slafingwren slee'meero. ⁷⁶ Ala kuung na/aay sleeme tu ba'y Aarusmoo' kwada gawata' i dirii asma geera Aako in hiit urduuwo's kiwa amohhe'es asma xeemuuwo's. ⁷⁷ Nee iidgoo' ba/ama kuwa dir muko's i xuu tisi' ar tlakeemaain kiwa gurtla'y. ⁷⁸ Ti in tleehharut ar gurtleemuu' Munguren' kwi gwa/ateema dawri dahha ngi diiren i hardahaas. ⁷⁹ As kwadaa' baraa' giwtir i diriia' nee kwadaa' baraa' mahhtir gwa' ara ngiwa i gwa/aatiya'. ⁸⁰ Na/ayda' ire ura'y /uuruuwo's ire doogin oo qeeru ire hoo't wa baraa' darma ay boloo' deelooda' iwa amo'r mu'k Israeli i ti'iit.