¹ Kuribhaga rinu Petro na Yohana ana bhahairanga na abhantu, makuani na abharindi bha erisyengerero na bhamasadukayo bhakabhagyako. ² Bhabhanga bhagwatirwe na enkoro okubha Petro na Yohana bhehigirya nga abhantu ering'ana kuhitira ku Yesu, na okurarika eguru ya okuyuk kuweki kureka kubhaku. ³ Bhabhagwata na bhakabhatura mwigereja, hadi nyinkyo yendeko, okubha yabhanga emariri okubha mugorobha. ⁴ Nawe abhantu abharu bhanu bha bhanga bhetegereri, ering'ana bhakumya; Na obhwaru bhwa bhasaja bhanu bhabhanga bhakumirye baringa mirongo etanu. ⁵ Hanu ya hika nyinko wendeko, okubha abhakuru bhabho, na abhakaruka na abhandiki, bhakekuman'ya hamwi mumugi gwa Yerusalemu. ⁶ Anasi kuani omukuru yangao na Kayafa na Yohana na Iskanda, na bhonsego bhanu bhangao mbahiri bha kuhani omukuru. ⁷ Anu bhanga bhabhateri Petro na Yohana muagati yabho, bhakabha burya kwa obhuturo ki au kwa erina ki rinu mukokeri ganu?'' ⁸ Kimwi Petro yabhanga yejwiri omutima omurabhu, akabhabhury ega,' bhenyu abhakuru bha abhantu na abhakaruka. ⁹ Okubha bhetu rero turabhuribhwa kuhitira erikorwa erijomu rinu ryakorerwe kumuntu unu omurweri. Nkwa kintuki kinu omuntu hunu yakorwa okubha muhoru? ¹⁰ Okubha rimanyikane riyo kubhenyu na kubhantu bha Israeli, okubha kwa erina rya Yesu Kristu wa Nazaretiunu mwabhamba, ng'o unu Waryubha ya muyukya kureka kubhaku, Nkwa enjira yaye okubha omuntu unu aremirira hanu, mubhukangati bhwenyu yana obhuhoru. ¹¹ Yesu Kristu nirigina rinu bhenyu abhajenga mwari, Nawe ndinu ryakorwa okubha erigina erinene rya mbarika. ¹² Bhutario bhuturya kureka kumuntu urya onsego. Kwa okubha ritario rina rinde hinsi orwire rinu bhahanwa abhantu, ndyo rinu kuhitirs kuryeke twatura okukuribhwa.'' ¹³ Bhono anu bharora obhuhari bhwa Petro na Yohana, ng'o bhakehituka okubha bhabhanga mbantu bhanubhatana obhumanyi, bhaketakya, na kimwi bhakagundura kumbe Petro na Yohana bharingi amwi na Yesu. ¹⁴ Kwa okubha bha murora omuntu urya yaweh nibhwa yemiri amwi naho, bhatabhanga na kinyu kya kugamba eguru wa riyo. ¹⁵ Naawe bhabhanga bhamariri okubha bhurya abhahaya bharekeo mubhwaru bhwa eribaraja, bhahaira bheki, abhene. ¹⁶ Bhakagamba, tubhakore egaki abhantu bhanu? Mbuhene okubha omuujija omubhibhi gukakoreka kuhitira bheki, bhumanyikeni kuhitira kira unu arekara Yerusalemu; Tutature kuryanga riyo. ¹⁷ Nawe, ering'ana rinu ritanyaragana kubhantu, okubha tubhakan'ye bhatagamba kweki kumuntu wonsego urya kurina rinu. ¹⁸ Bhabhabhirikira Petro na Yohana munsi na bhakabhakan'ya, bhatagamba wara okwihigirya kurina rya Yesu. ¹⁹ Nawe Petro na Yohana bhakakyukya na okubha bhurya "Okubha mbujomu mumeso Waryubha, kubhegwira bhenyu kutiga Waryubha, mwiture mumasakyo bhenyu bhene. ²⁰ Okubha bhetu tutature okutiga kugagamba amang'ana ganu twarora na okugegwa.'' ²¹ Ng'o anu bhabhakan'ya Petro na Yohana, bhakabhatiga bhakaga . Bhatatura kunyora ng'ana iryayonsego yakubhkorera. Kwa okubha abhantu bhonsego bhabhanga bharamukumya Waryubha kukirya kyakorekanga. ²² Omuntu unu yabhanga anyoreri emiujija gya obhuwehn'ya yanyora okubha na obhukuru bhwa eribhaga rya mirongo ena. ²³ Kimwi anu bhabhatiga, Petro na Yohana bhakaja kubhantu bhabho okubhabhurya gonsego ganu amakuani abhakuru na abhakaruka ganu bha bhabhurya. ²⁴ Anu bhegwa ego bhakahira eriisi ryabho kwa hamwi kugya ku Waryubha na bhakagamba omukuru uwe unu wabhumba orwire na ekyaro na enyanja na ebhintu bhyonsego muunsi waye. ²⁵ Uwe unu ku omutima omurabhu, kwa omunwa gwa tata wetu Daudi, omutumwa wao, wagamba,"Kwaki abhantu bha ebhyaro bhakora obhusarya, na abhantu bharawaza amang'ana ganu gataku kujomera? ²⁶ Abhakuru bhe kyaro bhemirira amwi na abhatawara bhekuman'ya amwi, kukira omukuru na kukira abhakeribhwa bhaye.'' ²⁷ Na okubha bhonsego, Herode, na Pontio Pilato, amwi na abhantu bhe kyaro na abhantu bha Isareli, bhekumanya amwi, kumugi gunu kutiga omutumwa wao omurabhu Yesu, n'go unu wamuhaka amaguta. ²⁸ Bhakuman'ya hamwi kukora gonsego hanu okubhoko kwao na obhuhanje bhwao bhakamba. Kureka mubhwambiro, ribhaga gatara yeorokya. ²⁹ Bhono, Omukuru, gamahe amatakyo gabho, na obhaturye abhatumwa bhao okurigamba eringana ryao kwa obhuhari bhonsego. ³⁰ Okubha anu orakunyure okubhoko kwao okuwehn'ya, obhuhene bhwao bhwiyorokye kuhitira erina rya omutumwa wao Yesu. ³¹ Anu bhamara okusabha, entengo inu bhekumanya hamwi rikarigitibhwa na bhosnego bhakejura na omutima omurabhu, na bhakagamba ering'ana rya Waryubha kwa obhuhari. ³² Obhwaru obhuhene bhwa abhantu bhanu bhakumya bhabhanga na nkoro imwi na omutima gumwi na hata bhangao hata umwi wabho unu yagamba ega, kinu konsego yanakyo nkyaye mwene okubha kwaye bhabhanga na bhintu bhyonsego amwi. ³³ Kwa eginguru eginene abhagaya bhabhanga bharararika, obhwimiririrya bhwabho kuhitira kubhwinurwa bhwa omukuru Yesu, na entungwa enene yabhanga eguru wabho bhonsego. ³⁴ Hatirangao muntu wonsego urya unu yarebhwa obhwenda bhwaye, kwa okubha abhantu bhonsego bhabhanga na amarina na eginseega, bhakagagurya, kimwi bhakahunjukya egimbirya gya ebhintu bhinu bhabhanga bhagurirye. ³⁵ Na kubhitura hinsi ya amaguru ga abhagaya na bhikagabha nibhwa kira omukumya, Nkyego kira oumwi yendanga. ³⁶ Yusufu Mlawi, omuntu okureka Kipro, yahanwa erina rya Barnabasi na omugaya. ³⁷ Yabhanga na eririma akari gurya na akuhunjukya embirya, akagitura hinsi wa amaguru ga abhagaya.