¹ Anu twakeribhwa ega turenderwa okugya Italia okuitira kumanji bhamuana Paulo na abhabhohwa abhandi kumukuru oumwi wa erijeshi rya ekiroma unuyabhirikirwanga Jurio, wa erikemba rya Agustani. ² Tukatiira emeeri okurwa Adramitamu, una yaringa arasafiri embarika wa Pwani wa Asia. Ego tukasoha munyanja. Aristaka okurwa Thesoronike ya Makedonia akagya amwi na bheetu. ³ Ejo wendeki tukaika mumugi gwa Sidoni, anu Jurio yamukorera Paulo kwa obhugenihya na akamwikirirya okugya kubhasani bhaye okuramira obhugenihya bhwaye. ⁴ Tukareka ayo tukagya kunyanja tukasafiri okwinara ekisiwa kya Kipro, kinukyaringa kisikirye omuyaga, kwao kubha omuyaga gwanga guratunya nkya. ⁵ Anu twaringa turagya kumanji ganu garingi ang'i na Kirikia na Pamfilia, tukaja Mira, omugi gwa Lisia. ⁶ Anu omukuru wa erijesi rya ekirooma, akainyora emeri okurwa Alexandria inu yaringa eragya Italia. Akatutirya muno waye. ⁷ Anu twaringa tumariri okugya ng'ora ng'ora kwa ribhaga rya eginsiku njaru tukabha tuhikiri kwa enyanko okuika aang'i na Kinidas, omuyaga gu tatwikiririrya kweki okugya kunjira iyo, ego tukagya embarika wa ekiririkya Krete tukasiikya omuyaga, mkabara na Sarimone. ⁸ Tukagya embarika wa Pwani kwa obhukongu mpaka tukaika ahasi anu yabhirikirwanga Fari Haveni anu aringi ang'i na Rasi. ⁹ Twaringa tegegeri eribhaga eritambi bhukong'u eribhaga rya omufungo gwa ekiyahudi gwaringa guhitiri kweki bhono yaringa hatari okugendererya okugya, ego Paulo akatutongera. ¹⁰ Na okugamba, "Abhasaja orugendo runuturenda turugege obhusarya bhwaru, etari ya emijigo na emeri nawe kweki eya amamenyo getu." ¹¹ Nawe omukuru wa erijesi rya ekiroma akamwite gerera eguru ya omukuru waye na omutungi wa emeri etari kumang'ana ganu gaairwa na Paulo. ¹² Kwa okubha ekigobho kyanga asi ang'i kwikara kwibhaga rya embeho, Abhagobhya abharu bhakatongera tugende okurwa rya ebhe ega turature okuikira kumugi gwa Foinike, twikare harya kwibhaga rya embeho. Foinike na ekigobho eyo Krete, eramairira kaskazini na mashariki na kusini mashariki. ¹³ Omuyaga gwa kusini anu gwamba okutema ng'o yang'ora, abhagobhi bhakamanya bhanyoreri kinu bharibharatuna. Bhakemuka bhakagya embarika wa Krete eng'i na Pwani. ¹⁴ Nawe kwibhaga rya omuda omuke omuyaga omuhari gunu gwabhirikirwanga gwa kaskazini mashariki gukamba okututema kureka embarika wa ekisima. ¹⁵ Anu emeri yatamwa okwinagirirya kumuyaga tukekiriran'ya tukairwa nago. ¹⁶ Tukakenya okuita kurubhaara rurya rwaringa rurasikya omuyaga gwa ekisiwa kinu kirabhirikirwa Kauda; kwenyanko enene twatura okuon'ya obhwato. ¹⁷ Anu bhamara okuiruta, bhakorera bhakorera ngoye okurutira emeri. Bhobhoha ega tukaturiri okugya husasi omusenyi omwaru rya Syitii ego bhakagobha bhakendesya embarika. ¹⁸ Twatemwa kwa eginguru bhukong'u na omuyaga kwego orusiku runu rwaja abhagobhi bhakamba okwesa emijigo gyabho okurwa mumeri. ¹⁹ Orusiku rwakasatu, abhagobhi bhakamba okurusya amanji kwa amabhoko gabho abheene. ²⁰ Kwa eribhaga rinu eryubha na eginjoto gitatu rabhira kwa eginsiku eginjaru, omuyaga omwaru gwatutema, twanga turamanya ega turaturibhwa gukawa. ²¹ Anu bharinga bhagiri kwa eriibhaga eritambi bhatana ebhakurya, Paulo akemirira agati wa abhagobhi akagamba, "Abhasaja mwenderwanga munyitegerere, tutakemukiri okurwa Krete, nho okubhurwa. ²² Nabhono ndabhasimbirya mwihane omutima, kwaokubha kuribhaho na obhubhuri amamenyo genyu gati yenyu, nawe obhubhurwa bhwa emeri. ²³ Kwaokubha obutiku bhunu bhwaita maraika wa Waryubha, unu Waryubha uyo oni ng'waye ng'unu oni ndamusyengera kweki, maraika waye yemirira embarika wani. ²⁴ Naokugamba, "Otabhoha Paulo. Niga wimirire embere wa Kaisari, ndamaha Waryubha kubhujomu bhwaye akueri bhanu bhonsego bhanu bharagya hamwi nawe. ²⁵ Ego abhasaja mwiane omutima, kwaokubha ndamukumya Waryubha, ega eribha nkyego nabhakerya. ²⁶ Nawe niga tunyaarike kwa okutemwa kubhuke bhwa abhantu.'' ²⁷ Anu bhahika obhutiku bhwa ekumi na ena, twaringa trendeyse ayo na eyo kunyanja ya Adratiki, nkya obhutiku obhunene ega abhagobhi bhamanyanga ega bhahikiri ekyaro ekyomu. ²⁸ Bhakorera emirio okurenga obhutambi bhwa amanji bhakanyoora obhutambi mirongo esatu na sita kwibhaga erike bhakarenga kweki obhutambi mirongo ebhiri na muhungati. ²⁹ Bhobhoha embere turatura okwitema amatare ego bhakagobha kane okurwa kuhasi wa okugobha na bhakasabha ega nyeenkyo ekajiri bhwangu. ³⁰ Abhagobhi bharya bharinga bharatutuna ekisigo kya okubhurya emeri irya bhetumya egiboti mumanji eginke, nke egya okuturirya amamenyo bhakekorya ega bharagobha okurwa embere wa eboti. ³¹ Nawe Paulo akamukerya omusirikare wa erijesi rya ekiroma na abhasirikare, "Mutakutura okuhona naho abhantu bhanu naratigara mumeri." ³² Nho, abhasirikare bhakabhutura egingoye gya eboti irya bhakaitiga egegwe na amanji. ³³ Anu obhurabhu bhwa nyeekyo bhwaringa bhurarobhoka, Paulo akabhasabha nyaka bharye hake. Akagamba orusiku runu ndwa ekumi ena muraganya mukyari kurya ekintu. ³⁴ Kwego ndabhasabha mugege ebhyakurya bhike kwaokubha inu nkwa orusumo rwa okumenya kwenyu; na rutariho rutukya hata rumwi runu ruribhura. ³⁵ Anu yamara okugamba gayo akagega omukate akamkumya Waryubha embere ya ameeso gokira omuntu, Nho akasura omukate akamba okurya. ³⁶ Nho bhonsego bhakaanwa omutima abheki bhakagega ebhyakurya. ³⁷ Twaringa bhantu 276 munsi wa emeri. ³⁸ Anu bhamara okurya ebhyakurya bha okwisa, bhakora emeri ng'uhu kwaokwesa engano muunsi wa enyanja. ³⁹ Anu yaringa mubhasu, bhatakimanya ekyaro ekyomu. Nawe bhakamaha ahasi wa ekyaro ekyomu inu yasoha, muunsi wa amanji, inu yaringa na omusenyi omwaru bhakagambana nyoore bharatura okwendesya emeri okugya ayo. ⁴⁰ Kwego bhakarengejya egingoye bhakagitiga munyanja. Kwibhaga riyoriyo bhakaregeja egi ngoye bhakemukya ahasi wa embere okugya kumuyaga, kwego bhakagya ahasi wa omusenyi. ⁴¹ Nawe bhakaja ahasi anu eginjira ebhiri gya manji girasikana emeri ekagya mumusenyi. Nahasi wa embere arya wa emeri ekangira harya na etatura kurwaho, nawe ahasi wa embere wa emeri akamba okubhunika kwa obhuhari bhwa amuyaga. ⁴² Ekisigo kya abhasirikare bharya kyaringa okubheta abhabhohwa, ega atakabheriho ookusama na ong'ose. ⁴³ Nawe omusirikare wa erijesi rya ekiroma urya yendanga okumuturya Paulo, kwego akakimirirya ekisigo kyabho, akabhasing'irirya bhanu bharatura okusama, bhebhururuke okurwa mumeri bhagye mukyaro ekyumu. ⁴⁴ Nho abhasaja abhandi bharasuntare, abhandi eguru wa ebhibhara bhya egimbau na abhandi eguru ya ebhintu ebhindi okurwa mumeri kwa enjira inu eriyorokya ega bhonsego turahika bhwahene mukyaro ekyomu.