¹ Ng'o Festo yasoha mwigunguri riyo na hanu gyahwa eginsiku esatu yagya okurwa Kaisaria mpaka Yerusalemu. ² Omusyengeri omukuru na Abhayahudi bhanu bhamanyikeni bhareta obhuhamirirya eguru ya Paulo ku Festo, na bhakahahira kwa enguru ku Festo. ³ Na bhakamusabha Festo yekirirye eguru ya amang'ana ga Paulo abhone okumubhirikira Yerusalemu naho bhature okumwita munjira. ⁴ Nawe Festo yakyukya ega Paulo yaringa obhubhohwa eyo Kaisaria, na kwa ega weki omwene arahunjuka eyo bhwangu. ⁵ Yagambha, "kwa ego bharya bhanu bharatura, bharatura okugya eyo na bhetu. Nyora kiruna ekintu ekibhibhi ku muntu unu, murenderwa okumusitakya." ⁶ Hanu bhekara eginsiku enane kasi ekumi kukira, akahinda Kaisaria. Na orusiku rwa ejo yendeko akekara kukitumbhi ekya obhuji bhya na okuamura Paulo aretwe kuweki. ⁷ Hanu yahika Abhayahudi kurwa Yerusalemu bhakemirira hang'i bhakarusya amasitakyo maru marito ganu bhatatura okurora. ⁸ Paulo akekurira na okugambha, etari kurina rya Abhayahudi, etari eguru ya erisyengerero, na etari eguru ya Kaisari nakora amabhibhi.' ⁹ Nawe Festo yeenda okwijomya kubhayahudi; na kwa ego yamukyukya Paulokwa okugambha, "Orenda okugya Yerusalemu na okujibhibhwa na oni eguru ya amang'ana ganu eyo?" ¹⁰ Paulo yagambha, 'nimiriri mubhukangati bhwa ekitumbhi kya obhujibhya ekya Kaisari hanu ndeenderwa okujibhibhwa. Ntakabhasarinyi Abhayahudi, kya ego uwe omanyiri bhwahene. ¹¹ Nakabheri nsarirye na nkoreri kinu kiranyendera oruku, ntakwanga okukwa. Nawe kama okuhamirirya kwabho kutari ekintu, atariho omuntu unu aratura okundusya kubheki. Ndamusabha Kaisari. ¹² Hanu Festo yamara okuhahira na eribharaja akakyukya, "Oramusabha Kaisari, wakagye ku Kaisari." ¹³ Hanu gyahita eginsiku nyabhurebhe omukama Agriripa na Bernike bhakahika Kaisaria okukora orugendo rwa okugya ku Festo. ¹⁴ Bhakekara hayo eginsiku eginjaru. Hanu gya kwa Festo akahira ekeesi ya Paulo ku mukama; Akagambha, "Omuntu oumwi yatigwa hanu na Feriki kya omubhohwa. ¹⁵ Hanu naringa Yerusalemu abhasyengeri abhakuru na abhakaruka bha abhayahudi bhareta amasitakya eguru ya omuntu unu ku oni, nabho bhabhurya eguru ya obhujibhya gati yaye. ¹⁶ Kurinu oni nabhakyukya ega etari miira ya Abharoma okumurusya omuntu kwa ekisororo enyuma yaye, omuhamiribhwa arenderwa okubha na omweya gwa okusikana na abhasitakya bhaye na okwikuurira gati ya obhuhami rirya bhuyo. ¹⁷ Kwa ego, hanu bhaaja hamwi hanu, ntatura okuganya, nawe orusiku rwa ejo yendeko nekara kukitumbhi ekya obhujibhya na okwamura omuntu urya aretwe munsi. ¹⁸ Kumweya gunu abhasitakya bhemirira na okumusitakya, neganirirya ega gata riho amasitakya manene ganu garetwa eguru yaye. ¹⁹ Enyuma yaye, bharinga na obhuhokani nyabhurebhe na weki eguru ya ediini yabho na eguru ya Yesu unu yaringa yaakwa, nawe Paulo yagamba ega arimuhoru. ²⁰ Naringa ndimani bhwe okwikomya ering'ana rinu, na nkamubhurya kama yaka agiri Yerusalemu okujibhi bhwa eguru ya amang'ana ganu. ²¹ Nawe Paulo hanu yabhirikirwa aturwe insi ya obhurindi kurusumo rwa obhwamuri bhwa omukama, naamura atuurwe mpaka hanu nakauhiririku Kaisari. ²² Agriripa yahahira na Festo, "Ndenda na oni mumwitegerere omuntu unu." Festo, akagambha, "Ejo oramwitegerera." ²³ Kwa ego ejo yendeko, Agripa na Bernike bhahikana enyangi njaru bhahika mwiburu na abhakuru bha erijesi, na abhantu bhanu bhamanyikeni mumugi. Na Festo hanu yarusya eriragiriryo, Paulo akaretwa kubheki. ²⁴ Festo akagambha, "Omukama Agripa, na abhantu bhonsego bhanu bharingi hanu hamwi na bhetu, muramurora omuntu unu; omuganda gonsego ogwa abhayahudi erya Yerusalemu na hanu kweki bhenderi mbhatongere na bheki bhakatema ekituri kuoni ega ataaja kubha omuhoru. ²⁵ Narora ega atakora ri ryoryonse rinu riramwendera oruku; nawe kwa okubha amubhirikiri omukama naamura okumuhira kuweki. ²⁶ Nawe ntaana ekintu kinu kireyorokya ekya okung'ora kumukama, kwa ego, mureteri kuuwe, bhukong'u kuuwe omwene, omukama Agripa, nawe nyore okubha na ekintu ekya okung'ora eguru ya ekeesi. ²⁷ Kwa okubha etaana ensonga okumuhira omubhohwa eribhaga tutaana amasitakya ga okworokya ganu gamu nyooreri.