¹ Paulo akabhamahirira rumwi ego abhantu eribharaja na okugambha, "Bhahiri bhani nekeeri kubhukangati bhwa Waryubha kwa ameganiriryo majomu mpaka rero inu." ² Omusyengeri omukuru Anania akabhasingirirya bharya bharinga bhemiriri hang'i nawe bhamuteme omunwa gwaye. ³ Ng'o Paulo akagambha, "Waryubha arakutema uuwe, endigi inu ekakirwe echokaa wikeeri oranjibhya kwa amaragiriryo, uuwe oraamura ntemwe enyuma ya eriragiriryo?'' ⁴ Bharya bharinga bhemiriri hang'i nawe bhakagambha "Ego nigo oramutuka omusyengeri omukuru wa Waryubha?" ⁵ Paulo akagambha, "Bhahiri bhani, oni nanga ntamanyiri ega unu nu omusyengeri omukuru. Kwa okubha eng'orerwi otaahahira bhubhibhi eguru omutungi wa abhantu bhaho." ⁶ Paulo hanu yarora ega orubhaara orumwi rwa eribharaja mmasadukaayo na abhandi mmafarisayo akarusya eriisi na okugambha, "Bhahiri bhani oni mufarisayo, omwana wa omufarisayo. Kwa ekisigo kinu ndganyirira obhuhyuko bhwa abhaku bhunu ndajibhi bhwa nabho." ⁷ Hanu yagagambha gayo obhakani bhuhene bhukarobhoka gati ya abhafarisayo na abhasadukayo na amaganda guka ahukana. ⁸ Kwa okubha abhasadukayo bharagambha ega obhuhyuko bhutariho, bhamaraika kora gutariho omutima. ⁹ Erihe enene rikeebhuka na abhamwi bha abhang'ori bhanu bharinga orubhara rwa abhafarisayo bhakamirira okugambhana bhakagambha, "Tutararora kyokyonse ekibhibhi eguru ya omuntu unu. Egaki omutima kasi maraika ahahiri nawe?" ¹⁰ Eribhaga riyo rihe ebhuke erihe enene, omukuru wa erijeshi akabhoha ega Paulo akatamwirwe bhibhara bhibhara na bheki, kwa ego akaamura kurwa kubhantu bha eribharaja na okumureta muruhwa. ¹¹ Obhuntu bhwendeko Omukuru yemirira hang'i nawe na okugambha, "Otige kobhoha, kwa okubha unyimiriri Yerusalemu, kwa ego ora rusye obhwi miriri Roma kweki." ¹² Hanu bhwakya abhayahudi abhandi bhakakora eriragano na okubhirikira ekiwi eguru yabho abhene. Bhakagambha, ega bhatarirya kura okunywa kyokyonse mpaka hanu bhara mwite Paulo. ¹³ Bhabhangaho abhantu kukira mirongo ena bhanu bhakora ekiina kinu. ¹⁴ Bhakagya kubhakuru bha abhasyengeri na abhakaruka na okugambha, "Twikiriri abhene kukiwi ekinene tutarya kyokyonse mpaka hanu twakamwite Paulo. ¹⁵ Kwa ego bhoono, eribharaja rimubhurye omukuru wa erijeshi amurete kubhenyu, nyore ega mrende okwamura ekesi yaye kwa obhuhene. Kubheetu bhanu tuuna obhwangu bhwa okumwita nyoora akyari okuhika hanu.'' ¹⁶ Nawe omwana wa omuhara wabho na Paulo akeegwa ega yangaho ekiina, akagya akasoha munsi ya oruhwa na okumukerya Paulo. ¹⁷ Paulo akamubhirikira akida oumwi akagambha, "Mugege omumura unu kujemedari kwa okubha yaana eng'ana ya okumukerya." ¹⁸ Mbhe akida akamugega omumura urya akamuhira kumukuru wa erijesi akagambha, "Paulo uraja omubhohwa yambhirikira akenda nkuretere omumura unu kuuwe. Yaana eng'ana eya okukukerya." ¹⁹ Urya omusirikare omukuru akamugwata kwa okubhoko akeyahura nawe hagari, na akamubhurya, "Nkintuki kinu orenda kunkerya? ²⁰ Omumura urya akagambha, "Abhayahudi bharengereren'ye okukusabha omurete Paulo ego mwibharaja muna ega bharenda bhanyore amang'ana gaye kwa obhuhene bhukong'u. ²¹ Mbe uuwe otekirirya kwa okubha abhantu kukira mirongo ena bharamwiteganira.Bhebhoheri kwa ekiwi, bhatarya kora okunywa mpaka haje bhamwite. Hata bhono bhesemerye, bharaganyi rira okwikirirya okurwa kuuwe.'' ²² Mbhe urya omusirikare omukuru akamutiga omumura agye gyaye, hanu ya muragirirya "Otamukerya omuntu wonse wonsego ega ankererye ganu." ²³ Akabhabhirikira bhaakida bhabhiri akagambha muhasemye abhasirikare magana gabhiri okugya Kaisaria na abhasirikare bhanu bharatira efarasi mirongo muhungati, na abhamatumu magana gabhiri, mwakemuke kumweya gwa eginsa egisatu egya obhutiku. ²⁴ Akabhakerya okusemya egintyenyi unu Paulo arimukorera na okumugega bhwahene mpaka ku Feliki Gavana. ²⁵ Akang'ora enyarubha ega, ²⁶ Klaudio Lisia liwali wa obhukuru Feliki, ndakukeran'ya. ²⁷ Omuntu unu yagwatwa na abhayahudi bhakabha hang'i okumwita, ng'o nkagya hamwi na omuganda gwa abhasirikare nkamuturya, hanuu nanyora amang'ana ega weki mumenyi wa Kirumi. ²⁸ Nendanga okumanya kwaki bhamusi takirye, kwa ego nkamuhira mwibharaja. ²⁹ Nkarora ega yaringa asitakibhwe kwa orusumo rwa amang'ana ga amaragiriryo gabho, nawe atasita kibhwa kwa ering'ana ryoryonse erya okukora yeetwe hamwi okubhohwa. ³⁰ Kweki ekamanyikana kuoni ega niina ekina eguru yaye, kwa ego bhwangu nkamutuma kuuwe, na okuragirirya bhanu bharamusitakya kweki bharete amasitakya eguru yaye kubhukangati bhwaho. Bhakaragana." ³¹ Mbhe abhasirikare bharya bhakeegwa eriragiriryo: bhakamugega Paulo bhakamuhira Antipatri bhutiku. ³² Ejo yendeko, abhasirikare abhaaru bhakabhatiga bharya bharya bhatiira egifarasi bhagye hamwi nawe, nabho bhahinda gyabho murubhwa. ³³ Na bhanu bharatira egifarasi hanu bhahika Kaisaria, na okumuhana riwari enyarubha irya, bhakamutura Paulo kubhukangati bhwaye. ³⁴ Na riwali hanu yaisoma enyarubha, akamubhurya Paulo yarwira egunguriki, hanu yamanya ega muntu wa Kilikia, ³⁵ akagambha, "Ndakwigwe uuwe hanu bharaje bharya bhaakusitakya," Akaragirirya aturwe mubhukama bhwa Herode.