¹ Hanu eriihe ryaawa, Paulo akabhirikira abhehigira akabhasimbiirya. Akama akabharaga akemuka okugya Makedonia. ² Hanu yaahitanga mubhyaro bhiyo yaringa arabhasimbirya abhekirirya, akasoha Yunani. ³ Hanu yeekara harwa ebhaga rya myeri esatu,abhayhudi bhakamurira eniku yariinga hang'i okugya kuhitira enjira ya kunyanja okuweera, Shamu, kweego akahunjuka akahitira Makedonia. ⁴ Mbanu bhagya nawe mpaka Asia mbabhanu Sopatro, omwaana wa Pirho okurwa Berea; Aristariko na Sekundo, bhonsego okurwa kubhekirirya bha Abhathesaronike; Gayo wa Deribe; Timotheo; Tikiiko Trofimo okurwe Asia. ⁵ Nawe ahantu bhanu bharunga bhamuriri okukangata na bhariinga bharatuganyira Troa. ⁶ Kwa enjira eya enyaanja kureka Filipo hanu rwa awa orusiku orwa emikaate ginu gitarimo obhumera, kwa nsiku etanu tukabhahikiira Troa. Tukeekara eyo kwa nsiku muungati. ⁷ Orusiku orwa mbere ku wiiki, hanu twaringa twikumen'ye hamwi okusuura omukaate, Paulo akahahira na abhekirirya. Yaringa seemya okugya ejo yeendeko, akagendererya okuhahira mpaka kwihinda rya obhutiku. ⁸ Gyaamo egintara eginjaru riiko enu twariinga twikumen'ye hamwi. ⁹ Kwidirisya yaringa yekeeriho omumura oumwi eriina ryaaye utiko, unu yaritoherwa na egintiro ndito. Hanu Paulo yagendererya kwa ebhaga etaambi, omumura uyo, okyareeri, akagwa hansi okureeka kugorofa eya kasatu akabhojwa amariri okukwa. ¹⁰ Nawe Paulo akeetuma hansi, akamwibhumbi kako, akamuhumbata. Akamara akagamba, mutige okobhoha, kwa okubha akyari omuhoru." ¹¹ Kweki akatiira kugorofa akasuura omukate akarya. Hanu yaamara okuhahira nabho kwa ebhaga etaambi mpaka ngiinkyo akeemuka. ¹² Bhakamureeta omumura urya muhoru bhakajomerwa bhukong'u. ¹³ Bhetu abhene twakangatira Paulo kwa emeeri tukagya Aso, anu twariingo tugambiri turamugegera eyo. Weeki niigo yeenda okukora, akeenda okuhitira kukigunguri. ¹⁴ Hanu yatuhikiira Aso, tukamugega mumeeri tukagya mitirene. ¹⁵ Kweki bheetu tukareeka eyo orusiku orwa kabhiri tukahika orubhaara oruundi orwa ekigiinga kya kiio. Ejo weendeko tukahika kukiginga kya Samo, ejo weendeko kweeki tukahika mumugi gwa mireto. ¹⁶ Kwa okubha Paulo yariinga na orugendo rwa okugya Efeso, neega atakabhurya ebhaga kumugi gwa Asia, yariinga aranguha okugya Yerusalemu kunyaangi eya Pentekoste, keego akaturiri weki okukora ego. ¹⁷ Okurwa Mireto akatuma abhantu okugya Efeso akabhirikira abhakaruka bha mukanisa. ¹⁸ Hanu bhamuhikako akabhakeerya, bhenyu abheene mumanyiri okureeka orusiku rwa mbere keego nataja Asia hanu, keego nariinga na bheenyu ebhaga ryonsego. ¹⁹ Nakora emirimu gya omukuru kwa okwisuuya kwonsego na kwa amesori, na keego nanyankibhwa kwa obhubhubhi bhwa Abhayahudi. ²⁰ Mumanyiri ega nteribhira okuraarika eng'ana yonse yonse kubheenyu inu yeendwaanga, na keego neehigirya nteebhisa na nkagya munyumba na munyuumba. ²¹ Mumanyiri keego nagendererya okubhakan'ya Abhayahudi na abhayunani kwa okutiga obhusarya ku Waryubha na eimani ku omukuru weetu Yesu. ²² Bhoono mumaahe hanu naariinga ndakora aga omutima omurabhu ndagya Yerusalemu ntige kumanya amang'ana ganu gaanyora eyo, ²³ kwa okubha omutima omurabhu gurandora oni kumigi gyonseego garagamba ekibhohe na enyaako mbyo bhiranganyirira. ²⁴ Nawe oni ntetegerera ega eginsiku gyaani giina bhweera bhwonse kuoni, ng'o mumare orugendo rwaani na eng'ana inu naaturung'ana okurwa ku omukuru Yesu, na okuraarika eng'ana enjomu na ekyaabhira kya Waryubha. ²⁵ Na bhoono, maaha, mmanyiri ega bhonsego, bhanu nagyako okuraarika obhukama, mutarindora obhusu kweeki. ²⁶ Kwa ego ndabhararika reero inu, ega ntaana bhubhibhi ku amanyinga ga omuntu wonse wonse. ²⁷ Kwa okubha nteribhira okubhararika ameega gonseego aga Waryubha. ²⁸ Mwiyangarire bheenyu abheene, na omugunda gonsego gunu omutima omurabhu gwa bhahana obhwangariri. Na mwangarire omuganda gwa omukuru, gunu yaagura kwa amanyiinga gaaye omwene. ²⁹ Mmanyiri ega anu ndirekaho, egiimbwa mwitu egiing'ari girisoha kubheenyu, na gitaryabhira omuganda. ³⁰ Mmanyiri ega nakubheenyu abheene abhantu abhandi bhariija na okugamba amang'ana mabhubhi, naho bharute abhehigira bhabhaseere bheeki. ³¹ Kweego mubhe meeso. Muhitukeega eribhaga rya emyaaka esatu ntatiga okubhehigirya omuntu na oumwi kwa amesori obhutiku na omubhasu. ³² Na bhoono oni ndabhatigira Waryubha, na kwa eng'ana eya ekyaabhira kyaaye, inu yaatura okubhahagaaja na okubhahaana obhweera na bhanu bhonseego bhaseemi bhwa ku Waryubha. ³³ Ntabha na mnamba ya mbirya, ejahabhu, na emyenda. ³⁴ Mumanyiri bhenyu abheene ega amabhoko ganu gang'ana ebhintu bhinu neendanga oni mweene na bhanu twaringa nabho hamwi. ³⁵ Kumang'ana gonsego nabhahana ekirengyo kyeego erenderwa okubhabheera bhanu bheeho nerwa kwa okukora emirimu, na kyeego mrenderwa okuhituka amang'ana aga omukuru Yesu, amang'ana ganu omwene akagamba ega: "Nyakara okuruusya nawe otahaanwa." ³⁶ Hanu yaamara okugamba ego, akeegama akasabha hamwi nabho. ³⁷ Bhonsego bhakakuura bhukong'u bhakamugwiira Paulo mwigoti na okumuhumbata. ³⁸ Bhaasuru mbara bhukongu kuganu yaaringa agambiri, ega kweeki bhatarirota obhusu bhyaaye kweeki. Bhakamara bhakamuheregesya Merikebhuni.