¹ Hanu Apolo yaringa Korintho, Paulo akahita orubhara orwa eguru mumugi gwa Efeso, akanyoorayo abhehigira abhandi. ² Paulo akabhakeerya, "Bhono mwaturung'anaa omutima omurabhu anu mwanyikirirya?" Bhakamukeerya "Hamuna tutaatura na tuteegwa ega mutima omurabhu." ³ Paulo akagamba, "Bhono bheengu mwabhatijwa egaki?" Bhakagamba, "Kubhubhatiji obhwa Yohana. ⁴ Mbe Paulo akabhakeerya, "Yohana yabhatiija obhubhatiija obhwa okwikirirya. Akabhakeerya abhantu bharya ega bharenderwa okumwikirirya unu ariija enyuma waaye na ng'o Yesu." ⁵ Abhantu anu bheegwa amang'ana ganu, bhakabhatiijwa kwa eriina erya omukuru Yesu. ⁶ Hanu Paulo yabhaturira amabhoko eguru, omutima omurabhu gukabhejurira bhaamba okuhahira kwa ebhigambo na okuraarika. ⁷ Bhonsego bhariinga abhasaaja ekumi na bhabhiri. ⁸ Paulo akagya mwisyengerero akahahira kwa bhigambo kwa obhuturo eribhaga erya emyeri esatu. Yaringa arorokererya amahahiro na okuruta abhantu okumanya amang'ana aga obhukama bhwa Waryubha. ⁹ Nawe abhayahudi abhandi bhariinga bhaseri na bhanu bharakwigwa, bhakamba kugamba obhubhi bhwa Kristo embere kumuganda. Ng'o Paulo akabhariga akahuura bhanu bheekirirye hagari. Akamba okuhahira nsiku gyonsego kubhukumbi bhwa Tirano. ¹⁰ Yagendererya kwa emyaaka ebhiri, kweego bhanu bhonsego bheekaranga Asia bhakeegwa eng'ana ya omukuru, bhonsego abhayahudi na abhayunani. ¹¹ Waryubha yakoraanga amakorwa amanene kuhitira amabhoko ga Paulo, ¹² kweega nabharweeri bhakawenibhwa, emitima emimwaamu kyabharekako, hanu bhaagega ekitambara ekinyoohu na emyenda gikarwa mumubhiri gwa Paulo. ¹³ Nawe bhangaho Abhayahudi abhahuuti bha omugya bhana orugendo kuhitira ahasi hayo, bhakorera eriina rya Yesu kwa amang'ana gaabho abheene. Bhakakeerya bharya bhariinga na amasaambwa amabhibhi, kwa okugamba, "Ndakukeerya omurekeko kwa eriina rya Yesu unu Paulo aramurarika." ¹⁴ Bhanu bhaakora gayo bhariinga abhaana muungati abha omukuru owa abhasyengeri awa ekiyahudi, Skewa. ¹⁵ Emitima emimwaamu gikabhakeerya, "Yesu mmumanyiri, na Paulo mmanyiri, nawe bheenyu mbawi?" ¹⁶ Omutima omumwaamu kumuntu gu kebhurakira abha omuyaga gukabhakirya eginguru bhakatemwa. Nho bhakakenya okurwa munyumba irya bharingi kinaabhi na bhakanyaharwa. ¹⁷ Nyoora rinu ryamanyika kubhonsego abhayahudi na abhayunani, bhanu bheeka ranga Efeso. Bhakabha na obhobha bhukong'u, na eriina erya omukuru rikagendererya okusuukwa. ¹⁸ Kweeki, abhaaru bhanu bheekirirya bhakaaja okusabha na okorokya amakorwa amabhibhi ganu bhaakora. ¹⁹ Abharu bhakoranga obhureri bhakakuman'ya ebhitabho bhyaabho, bhakabhisaamba embere ewa abhantu. Hanu bhaabhara obhweera obhwa ebhintu bhiyo, bhyaringa bhisinja mirongo etanu ebhya egimbirya. ²⁰ Kweego eng'ana ya omukuru ekerarika kwa obhugari bhukong'u na kwa nguru. ²¹ Aga Paulo okuhikya amang'ana gaaye Efeso omutima gukamorokya okugya Yerusalemu kuhitira Makedonia na Akaya; Akagamba, "Hanu ndarweenu ndeenderwa okurora Rumi yonse." ²² Paulo akabhatuma abheehigira bhaaye bhabhiri, Makedonia Timotheo na Erasto, bhanu bhariinga bhamubhereeri. Omweene akasaaga Asia kwa ebhaga. ²³ Eribhaga riyo rikabhaho erihe enene Efeso eyo kwa enjira hiyo. ²⁴ Sonara umwi eriina ryaaye Demetirio hunu yaakora ebhisusano ebhya egimbirya ebhya waryubha Diana, akakorera abhafundi ebhyasara ebhinene. ²⁵ Kweego akakumanya abhafundi abha emirimu giyo akagamba, "Abhanene, mumanyiriiga kubhyasara bhinu bheetu turasoya egimbirya eginjaru. ²⁶ Mmuraroha na okwiigwa ega, etari Efeso, aheene nawe nkama Asia yonsego, Paulo unu yang'enererye na okubhakyukya abhantu bhaaru. Aragamba ega atario Waryubha unu arakorwa kwa amabhoko. ²⁷ Na etari ega ebhasara bheetu oranyore bhitakwendwa kweeki, nawe kweeki na erisyengero rya Waryubha omukari omunene Diana aratura okujeerwa. Kweeki aratura okubhurya obhunene bhwaaye, unu Asia yonsego na ebhyaaro bharamukumya." ²⁸ Hana bheegwa ganu, bhakajima bhakakora ekituri bhakagamba Diana wa Efeso mumune." ²⁹ Omugi gonsego gukabha na eriihe, abhantu bhonsego bhakang'osa hamwi na mwibhuru erya emihooyo. Bhakabhagwaata bhanu bhariinga bharagyana Paulo, Gayo na Aristariko, bhakareka Makedonia. ³⁰ Paulo yeendanga okusoha ku mugaanda gwa abhantu, nawe abhehigira bhakamukaan'ya. ³¹ Kweeki, abhane abhandi abha mukyaaro kya Asia bhanu bhaanga bhasaani bhaaye bhakamuhirira amang'ana kwa nguru okumusabha atige okusoha mwibhuru erya emihoyo. ³² Abhantu abhandi bhagambangega ekintu kinu na abhandi eng'ana irya, kwa okubha omuganda gwa abhantu bhaang bhajuriri. Abhaaru bhataamanya nkwaaki bhaajiri hamwi. ³³ Abhayahudi bhakamuhurukya Iskanda kibhara kumuganda gwa abhantu na okumutuura eguru embere ya abhantu Iskanda akarokya eking'ooro kwa okubhoko kwaaye kutoonda amang'ana ku abhantu. ³⁴ Nawe hanu bhaaja okumanya ega honse mumuyahudi bhosego bhakakora ekituri kwa eriisi rimwi ebhaga rya nsa ebhiri, "Diana mumunene wa Efeso." ³⁵ Hanu omung'orya wa omugi yaamara okukirya omuganda, akagamba, Bhenyu abhasaaja abha Efeso, niwi atamanyiri ega omugi gunu gwa Efeso gurabhiika erisyengero rya Diana omunene na epicha inu yaagwa okurwa murwiire? ³⁶ Okurorega bhona ega amang'ana ganu garaturika, turenderwa okurerema mutakakora kiyo kyonse kwa bhwangu. ³⁷ Kwa okubha mubhirikiri abhantu bhanu mwibharaja bhanu bhatari bheebhi bha esyengero na bhatari bhanu bhamutuka Waryubha weetu omukari. ³⁸ Kweego, nyoore Demetrio na abhafundi bhana bharingi hamwi nawe bharamugambe omuntu wonse wonse eribharaja ririho na abhanene bhariho. Na bhahirwe mukiina. ³⁹ Nawe nyoore wonse oratuna bhindi kwa amang'ana gandi, garikorerwa emirimu ku kiina kinu kirenderwa. ⁴⁰ Amaheene turatura okujibhibhwa kwa eriine rya urusiku runu. Etariho ng'ana ya kukora ehe rinu, na tutaabhe na obhuturo bhwa okugatonda. ⁴¹ Hanu yamara okugamba gayo, akakubhya ekiina.